【来稿】每上错一次巴士，都是一次挥霍生命的过程

我敢讲，搭港铁系完全体现咗“坐立不安”呢四个字——你坐又怕畀人批斗，企嘅话，繁忙时间又迫到你心口贴住人哋背脊、臀部又紧贴返人哋大脾，完全失去人类尊严。仲要一埋站就要非常俐落地移去一个阻唔到人上落车嘅位置。
不幸的话，更要长期忍受车厢内啲人唔用earphones听歌、以接近吼叫嘅声浪倾偈、畀推喼嘅乘客撞击你膝头等等。有得拣嘅话，平时出入我都宁愿搭巴士。
但搭错巴士，亦都可以造成灾难性后果。随时由天光搭到天黑，都去唔到你嘅目的地，好似入咗结界咁。

有一啲巴士路线，车站多到好似要环绕香港一周咁，搭完一程，人哋都去到转台湾。不过咁，亦都有人认为，畀10元8块就可以游车河，同女朋友拍拖都唔使谂节目，成个下昼就喺架巴士上度过，绝对系穷人恩物。

以下我就严选咗几条经典路线，献畀一日有72小时可以挥霍嘅你，又或者咁啱好钟意游车河嘅你：

53号巴士（元朗 <-> 荃湾）

呢条号称全港最多站嘅巴士线，全程74个站，喺元朗头站上车，到荃湾西尾站落车，搭西铁只不过系需要11分钟，如果你搭呢架巴士，就要91分钟先到达目的地。即系你搭西铁来回咗4次，53号巴士可能仲喺深井徘徊紧。

试过有一次做完嘢，喺元朗大马路揾紧搭咩车返去位于荃湾嘅公司。突然有架53号巴士驶过，车头写住去荃湾，我梗系狗冲上车啦。上咗车后开返个九巴app，谂住揾吓边个站落车最就脚，当我发现个车站表碌极都未碌到底𠮶阵，我个心即刻寒咗寒。然后，我选择喺张凳都未坐暖嘅时候，就狗冲返落车。

不过对于钟意睇风景嘅小情侣，或者独独的巴士迷都好，搭呢条线可以途经元朗、天水围、屯门、入埋黄金海岸睇海、再兜埋深井、出返荃湾，用嚟睇风景，或者认识成个新界西，都只系$10.8，真系抵到烂。

106号巴士（黄大仙 <-> 柴湾）

呢条路线都可以话系另一个经典，九龙港岛畀你玩晒，都只系$9.8。不过我就试过一个好诡异嘅经历，同地铁太子站嘅永远轮回传说有过之而无不及。

话说好几年前我喺柴湾返工，每日几乎都要加班系常识，朝9晚10系常态，返到九龙城嘅屋企都11点左右。𠮶阵我一般放工都系搭118，去到旺角再转小巴返屋企嘅。我记得有一日我难得早放，8点就离开咗公司，一心谂住返到去要煮餐好嘅奖励下自己，再追加薯片雪糕relax下。行到去118个站，等等下见到有架106开埋嚟，车头写住去黄大仙、经九龙城。咦，我以前都无留意公司有一程车直返屋企咁笋嘅，于是我上咗车。

经过一日嘅工作其实都好攰，所以一坐低我就瞓到不省人事，但恐怖嘅事就随即发生。由柴湾上车嘅我，第一次醒𠮶阵，我见到巴士喺北角兜紧。

第二次醒𠮶阵，仲未过海——去到铜锣湾。

第三次醒，我已经再瞓唔返，因为我觉得自己好似瞓咗一世纪咁耐。我谂紧系咪架车已经到咗终站兜返转头，但sorry，佢只系啱啱过咗海，去到土瓜湾一带。由于我已经无晒睡意，我决定睇实架车究竟仲要兜几耐先入九龙城。结果架车喺土瓜湾嘅大街小巷之间出出入入、兜嚟兜去，搞咗成半粒钟，佢终于出发去九龙城。去到富豪东方酒店个站，基本上我系冲落车。返到屋企，望下个钟，同平时一样，都已经系10点几11点，我觉得好似畀人欺骗感情，心好累。

64K巴士（大埔 <-> 元朗）

虽然64K嘅站无咁多，车程又唔够106咁长，但呢条路线嘅经典之处，系在于司机一定要有超卓嘅驾驶技术，先至驾驭到林村、八乡、锦田一带嘅山路。尤其系林锦公路一带又窄又斜，车长入职要求真系要加多项识得扭发夹弯先得。

闻说搭呢条线嘅乘客，好多都有支药油跟身，你知啦，尤其系老人家，chok多两chok真系会早餐都呕返出嚟，真系要搽返两滴油先可以保平安。至于后生嘅，其实仲着数啦，搭巴士嘅价钱，已经畀到玩过山车嘅享受你，离心力呢家嘢，去新界走一转就可以体验到，欢迎各位区内外人士挑战。

呢几条经典路线，相信大家总有亲身体验过一两条。其实啲路线存在咗咁耐，究竟系特登编排到咁，定系一早就应该重整？另外，究竟驾驶呢啲攞你命路线嘅车长，工作时到底系享受？定系呕吐袋、预防痔疮水泡随时候命？人有三急时，又可唔可以将架车泊埋一边，冲咗厕先？