【新居屋2019】6大屋苑位置　随时影响老板印象　哪区最有钱途？

“哎呀，房委会个网Down咗呀！”同事Peter于5月23日的早上喺Office大叫咗一句。话说新一期居屋及白居二计划的申请表格开始派发，Office入面有几个同事都打算抽，今期居屋一共有六个屋苑，我问Peter：“心仪边个屋苑呀？”佢抛出一个香港人唔会陌生嘅答案：“有得拣咩？住边都好啦！最紧要有得住！”

作者：诗宁

居住区域，或暗暗影响升职？

一向住新界嘅我，就深深明白“住边度”对职场发展有不明文嘅影响。

例如，有部份细公司，请人会考虑埋求职者住边区，因为公司资源有限，老板希望请个有钱嘅员工，可以利用埋佢嘅人际网络，带更多生意畀公司，而大家都会普遍觉得，住九龙塘嘅人，见识一定多过住大埔嘅人。

除此之外，大家坦白点，的确有唔少职场贱人见高拜见低踩，两个同Grade同事相比，住跑马地私楼嘅同事，得到嘅礼貌同尊重会比住天水围居屋嘅同事多，除非你下下同人讲：“我住天水围，括弧业主。”但现实中，人哋问你住边，你只会答：“天水围”由呢刻开始，喺对方心目中，你额头就写住“冇钱冇人脉”，亦好易直觉认为你系手停口停，无咗份工唔得，工作上遇到难哽嘢，当然系塞畀你啦，因为你无人脉，唔使惊得罪你；因为你无钱，就算难顶，你都唔会轻易辞职。又除非，你有意无意话人知你未婚夫住薄扶林，咁又可以扭转观感改变命运喇。

住新界，真系比较“蚀底”？

住边区，唔多唔少会影响到其他人对你嘅感觉。喺呢方面，今期居屋六个屋苑分别有：何文田冠德苑、将军澳雍明苑、马鞍山锦晖苑、长沙湾凯德苑、火炭旭禾苑及荃湾尚文苑。呢啲区算唔错，听落去唔会“太穷”。除此之外，以上地区附近都有唔少工作以供选择，唔使每日花两三个钟于交通之上，就算去远少少，起码呢啲区嘅交通配套都唔会太差。

我呢个新界人话你知，初初你可能觉得返份远少少嘅工唔紧要，但耐咗就深深体会到车程长好输蚀。假设公司喺湾仔，放工时间系6点，新界同事即走返到屋企都7点半，塞一塞车就8点后；隔离位同事住铜锣湾，佢“扮工”到7点畀老板赞完、返屋企冲埋凉，新界同事先刚刚离开架巴士。如果遇著一个钟意员工OT嘅老板，住得辟真系无得斗，战争未开始就输咗。

新一期居屋，边个屋苑可以方便你返工“扮有钱”？（点图即看＝＝＞）

如果老板因为“住得穷”而挑剔你，其实......

作为一个辛辛苦苦储钱做楼奴嘅打工仔，我当然认同Peter𠮶句“有得拣咩？住边都好啦！最紧要有得住！”如果个老板因为你“住得穷”而挑剔你，你唔需要自卑，因为佢都富极有限，佢笑你住元朗嘅同时，可能佢自己都只系住北角，试问，李嘉诚又点会需要员工用人脉去带挈佢吖。