【办公室结界】晚晚OT源自开会文化　避免老细无限loop可以点做？

你有无试过，放工后个脑好攰唔系咁清醒，谂一谂自己当日做过乜？完成咗乜嘢工作？然后好恐怖哋发现自己竟然乜都无完成过。明明工时好长、无偷懒、出咗好多脑力，但依然有一堆嘢未做好，啲文件仲喺台头等紧你！持续不断的OT ，只系源于份工多嘢做？啱一半，背后仲有一个原因——开会！

作者：诗宁

开会的意义

只要你条Team有三个人或以上，你就好难避开“开会”的命运。究竟点解要开会？好听啲讲，开会畀大家报告下手头上做紧乜，可以令个Project顺畅啲，减少甩漏或好让上司更适当地分配人手，例如Peter太忙？就分返啲工作畀John帮手。表面说话系咁讲，但实际上“开会”系咩一回事？

开会系为咗表达自己好忙

打工仔你一定知道，喺香港职场上，“得闲”是罪名，就算你真系坐喺度“𢯎脚”，都要边“扮工”边𢯎 ，万一你同人讲手头上无咩忙紧，大家就会觉得你系冗员、废人，除咗讲你是非之外，仲会谂办法畀嘢你做，喂，你有粮出架㖞，点可以“得闲”？因此，开会前大家都会储定一堆工作，即使有时间做晒100%，但为咗开会时候有嘢可以“讲到自己好忙”，就只完成40%，留返60% 喺开完会先做。

可能你会话：“喂，我唔系啲咁嘅人，我好正直嘅。”你乖乖做晒自己嘢，亦好大方帮其他同事做埋佢哋𠮶份，但你一样要开会，会议室就好似结界咁，你入一入去，返出嚟就发现人生无咗三个钟，被消失的三小时，你只系坐喺度冻、听同事讲啲不著边际嘅说话，上司又总系讲一堆假大空，佢强项就系将啲明明三句讲完嘅说话，兜来兜去讲成个钟，令人听到头晕晕。

开会系解决问题定制造问题？

几经辛苦，终于喺永远都好大冷气嘅会议室出返嚟，去个厕所、饮杯水，已经六点，你唤醒已进入Sleep Mode嘅电脑，想完成埋开会前做到一半嘅工作？Sorry，你喺结界𠮶三个钟有好多Email嚟咗等紧你覆，同时又有其他同事埋嚟揾你倾嘢，覆完已经八点。想做完“实事”先收工？又一次OT 到十点。

曾经遇过一个老板，好钟意同事问问题，佢要求每位同事都要喺会议上提问，讲下自己做紧嘅嘢有乜困难，藉开会集思广益，希望成班同事齐心解决。同事们内心都觉得老板是傻的吗，唔通我星期一遇到困难，储到星期四开会先问？问得嚟都完成咗。初时大家都唔发问，但老板就好唔开心，觉得同事唔好学、唔团结，结果佢就将会议无限拖长，拖到有人发问先心息，结果，大家每次开会前，都要花尽脑力谂一堆问题，夹硬喺开会时候满足老板喜好。如果用“谂问题”嘅时间做实事，大家又可以早一个钟收工了。

老板要你开会，你又点会有得避？！唯有谂计令自己喺结界舒服啲。（点图即看，５招避免老细假大空、无限loop＝＝＞）

终极开会结界，原来是...

如果你做政府工，我相估你对“开会”有更深感受。我做过某间半公营机构，啲会要约“高层”一齐开，但“高层”本身就每日朝九晚六都开紧会，你想约佢？提早三星期啦，如果个会系同时有两个或以上“高层”参与，就大镬啦，夹来夹去，剩系约开会都成个月，𠮶个月就系不停同佢哋啲秘书Email往来，出现得最多嘅字就系"availability ＂。会都未约到，无人落决策，咁需要处理𠮶件事点算？等啰！社会上好多民生小问题，点解迟迟实行唔到？点解整一个网上交表系统都需要18个月？

亲，约唔到人开会啊。