职场“缩骨神功”累人累己　应对小人靠永恒自保法：尽早建立形象

每日返工都好多同事表演各样神功杂技，当中有啲同事嘅秘技系“无风起浪”，明明办公室内人人都安然无恙，但呢种同事一出手就可以搞到人人鸡毛鸭血。相反，有另一班同事就唔知系咪畀人害得多，防御力超强，基本上佢乜都惊、乜都防，继而进化成“缩骨神功”，咩都耍手拧头话唔关自己事，务求任何责任都唔喺自己身上，将对膊头有咁细缩咁细，比较常见嘅包括以下四大缩骨技能。

作者：诗宁

职场真正的“缩骨”同事，通常有以下4大特征，你又不幸遇上过吗？＝＝＞

第一类：乜都大大声，用把口做嘢

呢种同事永远都好忙，无论何时何地佢见到任何人都会不断强调自己好忙，永远都有乜乜乜未做，就算你明明见住佢喺茶水间用大半个钟冲咖啡，你行埋去，佢都会将件事包装成：“哎呀，好多嘢做呀，唔饮咖啡真系顶唔顺……”然后你见佢叹完杯咖啡，再用多半个钟洗杯。

曾经有个同事，佢好钟意强调自己识好多人，成日话呢个佢朋友、𠮶个又曾经喺咩咩活动上见过。但你叫佢做嘢？就发现佢咩都唔识做。举个例子，我同佢讲：“阿强，呢幅图要加多两个Graphic，你画好之后畀返吖Annie印啦。”

阿强：“哦！系咪ABC 公司𠮶个Annie呀？得啦，唔使急啦！我同佢公司个小明好熟架，我叫佢畀多两日期啦。”

听到我一头烟，你同边个熟、有几熟，其实都系要做，呃多两日唔代表你有几威，只系畀我知道，人哋做一日嘅嘢，原来你要做三日。

第二类：擦鞋仔乱估老板心意，专喺中间拦截

勤力唔一定有好下场，唔少人宁愿花心神擦鞋、讨老板欢心，其实“擦鞋”唔一定系负面词，但最怕就系有啲人乱估老板心意，累到下属或者其他同事白做。例如，要写篇新闻稿，Officer写完交畀Assistant Manager，但Assistant Manager就唔系睇篇稿写得好唔好，而系估Manager会钟意点样嘅稿，乱估一通然后就畀返Officer叫佢改，改完先再一层层交到Director手中，篇稿已经面目全非。其实中间𠮶堆Assistant Manager、Manager、Senior Manager全部都无话事权，但又要揾嘢改下证明自己存在，如果一早系由Officer直接同Director沟通，篇稿大约可以早四日出街。

我唔系话中间层嘅人唔应该改嘢，但遇到唔肯定嘅时候，应该问清楚上层要乜嘢，先叫下面改，而唔系惊惊青青缩埋一嚿自己估。

第三类：只愿意做啲老板睇到嘅工作

喺职场耐咗，你会发现所谓“叻与唔叻”、“做唔做到嘢”都系虚幻的，最紧要系形象，老板“觉得”你系点，你就系点，佢成日听到你话忙，你就系忙；老板觉得你蠢，你就系蠢。所以，有啲人会拣嘢嚟做，如果份工作做完系交畀老板，佢就会认真做、快手做，相反，老板睇唔到𠮶啲手尾同麻烦嘢，就弹晒畀其他同事。

同时，呢种同事唔会明显地推Job，老板派嘢畀佢做，佢一定话“好吖，我帮手，帮到一定帮！”转个头？返埋位低调地将个波弹走。

第四类：做完啲嘢收埋唔交，变相偷咗其他同事时间

有啲同事钟意将做完嘅工作收埋唔交住，到老板催佢先交出嚟，即系佢交嘅时候已经系Deadline、系老板等到忍唔住要出声嘅时候，如果呢种人系你Teammate、Partner，你应该明白有几燥，问亲佢做完未，佢都话仲做紧，搞到你埋唔到尾／完全睇唔到佢𠮶Part，到老板问你：“Peter，单嘢搞成点？”你乜都答唔到，而一直拖嘅缩骨精就突然弹出嚟同老板讲：“老板，我做好喇，系Peter未做咋，我交咗我𠮶Part先吖。”

佢缩一缩，你就被“过一栋”。

最后，我想同缩骨达人讲，其实光明正大地做人，并唔系想像中咁凶险，挺起胸膛唔缩骨，自己都舒服啲。

【第一届武博】从李小龙到黄飞鸿，香港武术电影世界闻名，武博的“光影武林”隧道，以专业武术角度解构七套精选电影的武打场面，让观众从大银幕以外，真正了解武术的应用及背后理念。热爱武术电影的你，必撑！5月3至5日，眼界．决定境界，九展见！ 按此立即购票 ; 按此浏览武博专页