【职场请饮礼仪】唔去饮要不失大方　如何畀人情、减少银包伤害？

“礼貌”呢样嘢，你搭一转港铁就知可遇不可求，但对住陌生人无礼最多只系畀人问候两句，如果对同事无礼？就可能犯众憎无运行喇。日常工作要识讲“唔该”、“多谢”𠮶啲幼稚园层面唔讲啦，身边陆续有人结婚，大家都有共同烦恼：应唔应该请同事饮？点样开口？相反，若你系被请𠮶个，唔想去饮又点样推？应该做几多人情？结婚开心事，但如果处理上唔识“礼”，分分钟变成是非。

撰文：诗宁

职场真人真事：上司急请饮，疑似凑人数？唔去点应对？

最近同Mary食饭，佢一坐低就好嬲咁喺手袋拎咗张红色炸弹出嚟，话佢隔离Team个上司嘅上司阿John娶老婆，有理无理向全公司同事派炸弹，饮宴日期仲要系两日后！请得咁急摆明就系唔尊重、无心请大家，纯粹大日子将至发现好多吉位，唯有“请”班同事嚟庆贺自己，结果当然系激㷫晒啲同事。两日后㖞，话唔得闲咪得啰？点知John绝到连帖都唔系自己派，佢放假搞婚礼，就咁吩咐个秘书代派帖，同事们连讲句唔得闲嘅机会都无。

睇到呢度，作为旁观者嘅你可能讲得轻松：“当时运高睇唔到张帖啰，佢都唔尊重人，做咩要畀面佢？一于唔去又唔做人情。”虽然呢个谂法无错，但Mary打算喺公司长做甚至系博升职，内心总会惊得失阿John，话晒佢都高级过自己。遇到呢啲情况，送礼系走唔甩，点样减少对银包嘅伤害？

（唔想去饮，点样减少对银包嘅伤害？点图看方法＝＝＞）

如果对方系一个“不能得失的人”，可参考以上做法；如果佢系普通同事又唔熟，你唔想去，就直接讲唔得闲啦，左思右想、左闪右避，咁样做人太辛苦了。

准新人的烦恼：一条Team五个人只想请三个！

收炸弹可能系烦恼，但派炸弹𠮶个都好多嘢要谂，一条Team五个人，只系想请其中三个，另外两个唔太熟又应唔应该请埋佢哋？唔想自己大日子都见到上司，但唔请佢会唔会好无礼貌？

其实准新娘记住一样嘢就得，既然个婚礼系你“一生人一次”的回忆，你想唔想你个回忆之中系有人被迫嚟，然后内心默默咒你？又想唔想一世都忆起自己被迫请咗一个你唔钟意嘅人嚟见证你重要时刻？答案一定是“否”吧。只要你记住呢个宗旨，就唔使再烦以上问题。以下列两个比较普遍嘅情况畀大家讨论下：

同Team只想请熟嘅同事，唔想请唔熟𠮶两个，点算？随便交代两句然后转话题就OK，例子点图看＝＝＞

至于上司，语气就要加多两分诚恳，配上足够嘅笑容，好多尴尬可以化解。留意系送一件饼唔够，无论你系娶定嫁，都送成张饼卡好睇啲，举例说法点图看＝＝＞

婚礼，是谁的一生人一次？

各位新人啊，成场婚礼咁多嘢搞，何必著眼于“同事”同“公司”？虽然战友可能变朋友，但擦肩而过嘅路人谂乜嘢、点睇你，重要咩？最重要系收帖嘅人内心无咒你、无黑你面，同埋两家人都嚟齐啊！千祈唔好好似上文阿John咁，结一结婚，搞到全公司都充满怨言，喜事得唔到祝福，赚到人情赚到钱都无乜意思，不如唔好搞婚礼，拎啲钱炒股票仲赚得仲多啦。