只懂送礼食饭不是爱！真正爱妈妈　学识唔讲“不孝子女口头禅”？

今年嘅5月13日，系我初为人母后第一个过嘅母亲节，从来都无对呢个节日有咁深刻感受，唔系因为今年我有份做主角收礼物，而系我终于真真正正明白，为人父母系几伟大。作者：诗宁

我不孝，过往母亲节都系循例食饭、送礼物，表面嘢做足，但问心，从无认真思考过“母爱”系咩一回事，更加无喺节日后持续关心妈妈，食完餐饭，影完相，完了。节日过后继续系努力返工、拍拖、约朋友去玩，然后返屋企问阿妈煮好饭未、比一堆衫阿妈洗……除咗呢啲，仲有对阿妈讲“不孝子女口头禅”，你又有冇讲过？

“你好烦！”

我做阿妈的年资暂时只系两个月，已经感受到“养儿一百岁，长忧九十九”呢句说话唔老套亦无夸张。记得第一次失恋系20岁左右，当时的男朋友在外国留学，（我以为）好恩爱，后生无惧时差，24小时都倾电话，写情信、寄礼物制造惊喜……仲话大学毕业之后就返香港结婚。最后点？理所当然地有第三者，四、五年感情，只收到一句：“我们到此为止吧。”讯息作结，然后即刻打去，个电话已经唔通，我连喊两声比佢听嘅机会都无。

一夜之间所有天真幻想破灭晒，觉得被全世界遗弃，日日逃学去café呆坐，望住café外面嘅花草树木喺度喊，夜晚返到屋企食唔落饭，返入房继续喊，阿妈见到我咁伤心，佢亦一样食唔落饭，敲门揾我倾偈我唔肯开门，到我肯同人讲嘢嘅时候，亦唔肯同佢讲发生咩事（虽然佢大约估到），妈妈惊我会睇唔开做傻事，再三叮嘱我有嘢唔好收喺心，可以揾佢倾，但我反应系叫佢：“唔好烦我”。

直到自己个仔出世，BB当然系咩都喊，原来亲生骨肉一哭，妈妈个心真系会抽住痛，好似有人大力扭我心脏咁。明知佢只系肚饿，食饱就无事，做阿妈嘅都系会好多担心：“哎呀，喊到咁大声会喉咙痛”、“喊住点食奶呀？会呛鼻”……总之就唔想见到自己仔女流一滴眼泪。

妈妈嘅天性，就系一见到仔女唔开心，立即想尽力帮佢解决困难、保护佢，当然我知道咁系唔理性，但我几肯定讲呢个世界大部份阿妈都系无理性可言的，如果佢理性，佢一早就掉咗你呢个衰仔／衰女出街，理性分析过的话，一定唔会为咗你搞到自己身材走样、唔会使晒啲钱喺你身上、更加唔会比机会你驳咀。

如果他日我个仔同我讲：“唔好烦我”，对妈妈嚟讲绝对系无助，因为呢句说话背后个意思就系：“妈，你已经帮唔到我解决问题”，要我睇住最爱嘅人喊，但自己咩都做唔到，谂到都伤心。

“讲咗你都唔识㗎啦！”

呢句不孝口头禅可以有多个版本如“你乜都唔识”、“点解咁简单都唔识㗎”之类，总之意思就系嫌弃，嫌阿妈老土、跟唔上时代步伐、同你有代沟……

人年纪愈来愈大，跟唔到时代步伐系必然。有啲人40岁跟甩、有啲人60岁先跟甩，后浪推前浪会发生喺你我他身上，李嘉诚同李家诚都会有退休嘅一日，个分别只系迟定早。

但仔女总系无耐性，无耐性解释比妈妈听公司嘅人事斗争几复杂、无耐性教佢善用智能电话、无耐性陪佢行路行慢啲……

相反，我生完仔先明，“妈妈”呢份工系全世界最需要耐性嘅工作，由细心换片到教导BB牙牙学语，全部都系重复性工作，需要无限耐性同爱心，将一个人由咩都唔识，教到识行识走识沟女，然后有一日我问佢嘢，佢答：“阿妈，讲咗你都唔识㗎啦！”阿妈除咗无奈仲可以点？

第一年用母亲角度睇母亲节，最想收嘅礼物系：希望仔女永远记得我系点锡佢，然后佢每一次同我讲嘢，都会企喺我角度谂咗先。我今年，亦会送呢份礼物比妈妈。