内地客搞㓥房触礁！尖沙咀旧楼“1变12”放售　改装用几钱?｜灯神

政府近年大力推动“抢人才”政策，希望吸引班高技术人才嚟香港定居，提升香港嘅经济竞争力。自从投资移民入境计划放宽咗之后，真系带动咗唔少内地专才同投资客入市买楼，撑起咗部分楼市需求。不过内地客入市投资豪宅、新楼就听得多，投资㓥房你又听过未呢？

灯神最近发现尖沙咀有一间过千呎旧楼推出放盘，望真啲个入面格局竟然“一㓥十二间”，仲要系全新装修添，听讲业主买入唔够1年已经要攞返出嚟卖，到底咩原因？

讲紧嘅单位系尖沙咀金冠大厦高层E室，实用面积约1,192平方呎，由於单位最新被业主大改装，㓥咗成12间套房出嚟，所以已经睇唔出原则系咩间隔。单位主要用木板墙嚟分间，设有一条“回型走廊”，由大门口开始行会经过几个转角位，每边走廊分都间咗3至4间房，整体格局就好似迷宫咁。

全新装修 走廊照明、监控设施充足

虽然系㓥房，但图片见到装修都几新净㗎，走廊全部装晒LED灯，非常光猛；每个转角位又有安装闭路电视，可以清楚影低每个人嘅出入，如果住户之间有咩争拗纠纷都有纪录睇返，几有安全感。同埋可能考虑到单位住咗咁多人，难免空气局促，所以走廊都有安装一两部冷气机，相信夏天嘅时候唔会太过闷热。

房型由56至143平方呎、仅摆放到一张床

套房方面，每间房嘅房型唔同，面积由56至143平方呎不等，有啲有窗有啲无；据悉租金都会视乎唔同嘅房型而有所调整，不过屋内嘅装置大致上系统一。每间房都有电子锁，保安算系唔错，开则就方方方正，但空间真系偏细，只摆到一张床同一个套厕连淋浴间，无任何储物空间。如果要长住喺度嘅话，应该放唔到私人物品，都几唔方便㗎。

套厕采用“酒店式设计”

有趣嘅系，个套厕嘅设计反而几精致，空间算阔落，基本设施齐备而且系全新装修，仲有安装埋镜柜同毛巾架比住户摆放用品。另外，厕所仲采用咗玻璃趟门去分隔，增强咗屋内嘅空间感，完全系酒店式嘅设计。

设公共区域、提供洗衣机及饮水机等

呢个单位仲有一大亮点，就喺走廊嘅尽头竟然设有一个公共区域，入面摆放咗两部洗衣机、饮水机同一个双门大雪柜，全部都系新买返嚟，胶纸都未搣，相信系比啲住户一齐共用。灯神听讲，其实出面啲㓥房好少会配备呢啲公用设施，有位宁愿间多间房收租好过。所以灯神见到个下都觉得几Surprise，好似发梦返回自己系大学住宿舍个时咁。

内地客950万买楼、斥100万改装㓥房　撞正政策打压

区内代理透露，单位嘅业主系一位内地客，喺上年1月以950万买入单位后就进行大装修，分间成宜家呢个“㓥房迷宫”，装修费大约使咗100万。业主整好晒之后本身谂住安心做包租公啦，点知政府突然推出咗“简朴房”政策，话要监管同取缔劣质㓥房，所以一时之间好多㓥房租户都保持观望态度，好难租出去。

买入仅1年、叫价1500万求沽

最终可能业主都懒得再使钱装修同管理啦，索性决定将单位顶手出去，持货仅1年，叫价1,500万放盘，折合呎价约12,584元。据悉，房间目前市值租金约4,000至6,000蚊，视乎房型。如果按照每间㓥房月租收5,000蚊计算，即新买家一年最多可以收租72万，租金回报约4.8厘。

部分套房不符合“简朴房”规格、放盘几个月无人问津

不过代理亦指出，大厦楼龄已有60年，业主呢口叫价1500万，其实偏高，单位较同区旧楼造价高出2至3成。而且入面部分套房唔符合政府“简朴房”嘅规格，例如部份房间面积不足83平方呎，部分单位无窗、无安装到独立火警侦测器等等，因此新买家如果想接手嚟收租，应该都要再花费一笔重新装修，非常麻烦。

加上单位改装到咁，银行好难承造按揭，所以以上种种原因导致单位放盘咗几个月都无人问津，相信呢位内地投资者今次真系“捉虫入米缸”，想甩手都几难呀。