【烂鬼Cult噏】何启南拍《猛鬼佛跳墙》坚濑嘢：揾人陪先敢去厕所

一路以来都好多人争拗边套港产鬼片系最恐怖嘅鬼片，有唔少人觉得系余允抗执导嘅《凶榜》又或者佢嘅《凶猫》，亦都有好多人觉得系于仁泰嘅《猛鬼佛跳墙》。我自己就觉得《凶榜》略胜《凶猫》一筹，而《猛鬼佛跳墙》就同《凶榜》同Level，真系可以话系不相伯仲。有份演《猛鬼佛跳墙》嘅“无线反派王”何启南亦觉得两套戏都好恐怖，而且两种恐怖都唔同，唔使太刻意比较。

【凶榜】最吓人港产鬼片 角色死状恐怖 七孔流血狗骨啃死样样齐

【烂鬼Cult噏】《猛鬼佛跳墙》港式恐怖够贴地　坚揪过《凶榜》？

讲到何启南同董骠、李丽珍等人喺《猛鬼佛跳墙》里面都有唔少撞鬼场面，咁我就多口问会唔会拍摄有啲古怪嘢发生，因为好多人都话拍鬼片系特别邪，点知启南哥真系话当时有料到：“其实做李丽珍细妹个小妹妹（陈卓欣）喺开工时久唔久都话见到嘢，成Crew人都知佢有阴阳眼，有次妹妹唔使埋位，喺别墅出面睇住我哋开工，我见到妹妹成日往上望，又笑又挥手咁，我问佢同边个挥手，佢就话同上面啲姐姐，但我望上去，一个人都冇。”

启南哥续说：“我唔识死，我再问妹妹，啲姐姐系长头发定短头发，佢话啲姐姐长头发扎住辫，到我问佢哋著咩衫时，佢就答我系蓝色衫，我就喺度谂系唔系以前汪明荃拍剧著𠮶啲学生装，之后我就唔敢再问落去。因为开工𠮶度都好偏僻下，所以冇人嘅地方我就当佢系厕所，但知道佢见到有嘢后，我都唔敢周围去，要揾有灯照住嘅地方或者揾人陪先敢方便。”

当我以为就咁就完时，启南哥就醒起仲有一单再恐怖啲：“𠮶下剧组系拍紧大家发现间屋唔可以再住人，一定要走，拍𠮶时就几个演员冲上架车度，但系个妹妹就死都唔肯上车，话我唔入呀、我唔入呀，架车好多人、好多姐姐喺度。咁佢系佢契爷带嚟拍戏嘅，佢契爷见到咁就入埋嚟拎条布喺车厢Fing几下，话啲姐姐走哂喇，个妹妹之后就冇扭计。（你唔惊？）现场有几十人都唔惊嘅，如果得我一个，我一定会走。”

问到会唔会觉得依家嘅恐怖片冇以前咁恐怖，启南哥都觉觉哋：“我个人觉得依家好靠电脑特技，变相令到个拍摄手法、故事舖排冇以前咁惊，以前睇恐怖片，好似希治阁𠮶啲咁，都系冇CG，但系都好惊，可能观众要求嘅嘢唔同咗，所以就咁多CG，但其实最紧要都系个剧本。”至于点解呢套系佢唯一一套演出过嘅港产鬼片，系唔系见过鬼就怕黑，佢就笑住话唔系：“唔系我唔拍，系冇人揾我啫。”