【打蛇】极变态难顶度爆灯　忍得住睇晒真心犀利

香港嘅Cult片点止得《山狗》一套，喺80年代可以话系拍到有个潮流喺度，有好多导演都产出咗唔少Cult片，好似牟敦芾咁先后就拍咗《打蛇》、《黑太阳731》等视觉上极度冲击嘅变态戏，基本上可以话系挑战人类良知，相信类似嘅戏已经因为社会规范等因素，喺依家呢个环境拍唔返。

上次讲《山狗》段文出咗街之后，我喺自己facebook度Share自己篇文自High一下，点知好多朋友仔喺𠮶晚就留言话有睇过其他更加痴线嘅戏，仲列举咗一堆戏名叫我之后睇睇。几时都话facebook唔好Add上司，结果我阿头真系睇咗啲留言，第二日话觉得成件事反应唔错，叫我继续写多啲Cult片，仲话嚟紧呢篇写《打蛇》呢套戏先，呢套戏都系香港Cult片嘅经典中嘅经典。结果佢讲完呢堆嘢之后过两三日，我先得闲喺半夜睇佢畀我只绝版VCD，希望我唔会因为Keep住睇变态嘢搞到变态佬，跟住喺公司做返啲我睇过嘅嘢。

喺讲呢套戏有几痴线几变态之前，畀少少基本资料大家先，《打蛇》呢套戏就系喺1980年上映嘅，而导演就系牟敦芾，主要系讲紧香港喺1980年10月取消咗抵垒政策，转为采取即捕即解政策，一班中国大陆嚟嘅非法入境者就赶喺三日宽限期里面，用游水、撑船等自己嘅方式嚟到香港申请身分证，点知喺边境地区畀“打蛇集团”绑架，以凌辱嘅方法逼佢哋讲出香港亲戚电话号码，之后联络佢哋畀赎金。最后，呢班“人蛇”逃出生天，但好唔好彩咁畀警察捉返。

“打蛇集团”嘅人真系当班非法入境者系畜牲，逼佢哋全裸之余，仲玩哂滴蜡、射水柱、强奸、虐打、倒吊、火烧等数极都数唔完嘅变态嘢，我明知呢啲都系拍出嚟、假嘅，但真系觉得谂到拍呢啲嘢出嚟嘅牟敦芾个心理有少少唔平衡。当中最Cult、最癫嘅一幕，一定系“人蛇”里面有个鬼头仔同“打蛇集团”嘅人讲，话女主角个细佬记得电话号码，只不过佢唔讲，之后集团嘅人就毒打佢，搞到女主角个细佬忍唔住爆咗句：“我知道都唔会讲，唔通你会强奸我呀？”

点知集团首领听到呢句话后就即刻淫笑，叫手下扑晕女主角细佬之后再绑佢喺板凳度，首领喺自己房不断笑住咁用手扫女主角细佬又白又滑嘅背脊，到女主角细佬醒咗后仲用凡士林搽落佢个屁股度，之后首领就好粗暴咁鸡奸咗女主角个细佬。当首领满足完佢嘅淫欲后，就掉返女主角细佬入“集中营”，大受打击、个样呆呆滞滞嘅细佬突然发狂捉住首领，起势咬对方条颈咬到血肉横飞，就算集团嘅人点拉点打都唔放口，结果真系咬死咗首领为自己报仇，但细佬自己都畀人打到返魂乏术。

无论系鸡奸定系监生咬死，喺视觉上嘅冲击真系可以话系极致中嘅极致。比起《山狗》轮奸庄静而嘅一幕，《打蛇》鸡奸一幕虽然系少咗第一身主观镜头嘅代入感，但就多咗一份恐怖嘅感觉，一来系因为我系男性，如果有个咁嘅变态佬对住你淫笑，又咁样扫你背兼搽凡士林，之后仲……我谂我轻则唔敢见人几年，重则揾个方法自我了结；二来系牟敦芾同电影摄影师都采用咗唔同镜头，包括中全景、中景、近景及全特写等，以多个角度去拍呢个鸡奸场面，当中斋影两人对脚嘅镜头可以话系一绝，令观众感受到唔同层次嘅恐惧。

故事里面嘅人蛇固然系惨，其实饰演呢班人蛇嘅演员都好惨下。上面已经提过佢哋喺戏里面有全裸演出，而其实呢啲冇著衫嘅画面唔系好似依家啲戏咁，得𠮶一下半下，系起码占电影一半嘅时间。无论系乳房、臀部，以至下体都拍得好清楚，好彩佢冇阴部嘅特写，如果唔系都相信喺80年代咁开放嘅标准下都上唔到画。我喺度谂，点解呢班演员肯拍呢套戏，系唔系畀导演等幕后团队呃咗，定系佢哋争人钱等住要还？即系火烧呢啲都有得揾特技人做替身拍，但系裸住体畀人用水柱射、倒吊呢啲真系要演员自己去做返，除咗话佢哋真系为电影艺术付出咗好多之外，我真系唔知讲咩嘢好。

讲到艺术感，如果令人呕心真系一种艺术嚟，呢套《打蛇》就真系拎到满分喇。我睇睇下甚至系谂起寇比力克（Stanley Kubrick），除咗牟敦芾喺戏里面用咗好多广角镜拍嘅画面，令到演员嘅表情扭曲啲、夸张啲，最似嘅一样嘢就系女主角被集团嘅人格硬撑大对眼，逼佢睇住班裸体男人嘅下体跳弹弹，似足《发条橙》（A Clockwork Orange）里面男主角被绑起兼被逼撑大对眼睇暴力片咁。而牟敦芾喺呈现裸体上，亦都同好多导演好唔同，好多导演都拍得裸体好靓、好唯美，但佢系做到一种令观众望到班演员裸体会觉得反感，甚至觉得佢哋开始唔似人，似畀人圈养嘅猪咁嘅感觉。

最后𠮶部分又系好正，我唔知系令套戏走咗Tone定系画龙点睛咗，一班已经脱离集团魔掌嘅人蛇，却因为男主角一句“唔该晒，同志”而被警察识穿身分，最后一一落网。佢讲呢句嘢𠮶下，我真系笑咗出嚟，因为真系太低能，但同时又灰机，搞咗场咁大嘅龙凤到最后就系因为佢呢句嘢而衰收尾。多得女主角引开个警察，男主角最终亦去到佢哋梦寐以求嘅钻石山，但到男主角意识到钻石山冇钻石得贫民窟时，佢崩溃劲叫“呢度唔系钻石山”，又系又可怜又可笑，我有呢种感觉唔知系我被牟敦芾感染咗，定系我本身都有少少变态。至于牟敦芾其实系唔系真系一个变态佬，另一篇文再讲。

【Cult噏】《打蛇》牟敦芾专拍变态片 认演员劲投诉：我拍紧事实