【烂鬼Cult噏】《猛鬼佛跳墙》港式恐怖够贴地　坚揪过《凶榜》？

阿头睇到我上星期讲嘅《烈火青春》条数后，发现真系唔多掂，佢就话不如你写返恐怖嘢啦，大家都系想睇呢啲。咁我话好啦，但我好强调真系唔系几好呢味嘢，我本身系一个文青嚟，我比较喜欢睇法国文艺片，仲系边饮咖啡边睇𠮶只。然后佢完全冇理我，仲话同事之前写《凶榜》反应好好，又有人留言话1988年上映嘅《猛鬼佛跳墙》恐怖过《凶榜》，叫我睇下事实系点。咁我明喇，即系无论点我都系今个星期写《猛鬼佛跳墙》啦，希望大家钟意睇就推广下啦，等盘数好啲，我唔想成日听到我阿头咿咿哦哦，话我写埋哂啲嘢冇人睇。

【烂鬼Cult噏】何启南拍《猛鬼佛跳墙》坚濑嘢：揾人陪先敢去厕所

【凶榜】最吓人港产鬼片　角色死状恐怖　七孔流血狗骨啃死样样齐

讲返套戏先，于仁泰执导嘅《猛鬼佛跳墙》系由董骠、狄波拉、李丽珍、何启南同梁小龙主演，故事主要讲述董骠升职后获老细安排住喺九肚山嘅别墅，佢哋一家人搬咗入去之后就成日听到啲怪声，包括竟然有人半夜三更唱戏，之后饰演单眼道士嘅梁小龙就经常出现叫佢哋快啲搬，原来系因为间屋曾经死过人，而且系一个京剧大老倌以为老婆红杏出墙而杀死哂全家，之后只鬼就上咗董骠身，想杀咗佢哋一家揾替死鬼，好彩梁小龙及时再出场，而何启南亦揾到梁小龙个师父嘅骨灰做秘密武器，所以最后一班人都收伏到只鬼。

就咁睇个故事唔会觉得好恐怖，因为都系一个好寻常嘅鬼故，但系于仁泰喺处理电影气氛上落咗好多心机。最特别嘅系，呢套戏一开始系有大量笑位，去到中段就慢慢收紧，放只鬼出嚟制造既惊又喜嘅画面畀大家睇，最后就一口气将出现董骠鬼上身想杀哂全家嘅场口，等观众嘅心情似足坐过山车。当然啦，电影里面啲鬼嘅造型比起今时今日嘅鬼粗糙得多，与其话佢哋系鬼，不如话佢哋似丧尸仲啱，不过都几有效果嘅。

至于成套戏最恐怖嘅一幕？我觉得系董骠叔最初被鬼上身嘅一幕系最令人毛骨悚然。董骠叔喺天台杂物房前摆咗个相机阵谂住影鬼，点知冇料到乜都影唔到，落返楼瞓觉嘅佢就无啦啦喺半夜3点几时醒咗，眼神极度空洞之余仲开始Set头化妆，之后佢仲落咗去地牢度揾大老倌嘅戏服著。好快观众就睇到佢为自己画嘅京剧大花脸，然后佢就笑得异常恐怖，甚至可以话有少少变态、发神经Feel。当佢开始骚身手时，戏曲配乐就同时响起，加埋少少Echo嘅中乐，唔知点解有少少邪气。

呢一幕之所以恐怖，完全系因为陌生感，当电影之前差唔多一个钟，大家都系听到骠叔讲广东话，同埋个样好慈父Feel，但呢一幕佢突然系讲京腔国语，个样仲画到好似系另一个人咁，观众就会觉得只鬼真系好猛料，令到骠叔变成咗一个陌生人。如果骠叔俾鬼上咗身之后，依然系讲广东话，即使佢系唱粤剧，都唔会有呢种效果，就好似我哋香港人、广东人咁，对来自北方嘅内地人，点都有一种距离，视佢哋系另一种人嘅感觉。至于《凶榜》定《猛鬼佛跳墙》比较恐怖？我觉得真系两样嘢嚟，《凶榜》最犀利嘅系你对未知嘅恐怖感，《猛鬼佛跳墙》就系对异类嘅恐怖感，但《猛》就贴地啲，因为香港地九成人都搬过屋，香港地日日都死人，真系唔知几时咁唔好彩搬咗入一间凶宅。