【烂鬼Cult噏】《逆缘》夏文汐17岁拍《烈火青春》：只系尺度大胆
《逆缘》夏文汐黎诺懿一段忘年恋成为城中话题，夏姐姐含泪为爱郎拔掉氧气毕更加系睇到想喊。但其实夏姐姐制造话题一吞向系能手。好似在1982年上映、谭家明执导嘅《烈火青春》讲述一班年青人的性同爱情观念，喺迷失中寻找人生意义，但最后却将生命燃烧殆尽，当中以夏文汐同汤镇业喺电车上劲踩界嘅缠绵场面最为注目，更有指上映时因为呢一幕太激，引起教育界不满，逼使电影停映，要重新剪辑该一幕先可以再上画。其中一个讲法就系夏文汐同汤镇业喺画面、剧情上唔止缠绵咁简单，系直头喺公众场面做爱。咁实情系点呢？真系要请Pat姐夏文汐为大家解答喇，身处洛杉矶嘅佢接受《香港01》电话访问时就咁答嘅：“呢一幕我哋系冇Make Love嘅！”
【烂鬼噏Cult】夏文汐《烈火青春》电车情欲戏都关土地问题事？
咁其实《烈火青春》呢套戏都仲有好多江湖传闻嘅，包括谭家明用咗成年都未拍完又超哂支，搞到老板好不满，因而叫唐基明帮拖快手埋咗个尾佢。而Pat姐就话拍咁耐都未拍完其实系汤镇业嘅问题：“𠮶时佢喺无线拍紧《天龙八部》，要等佢拍哂先嚟到开工，就系因为咁先未拍完。同埋，我拍呢套戏时冇见过唐基明，一开始到最后都冇。”
讲返起呢套戏系Pat姐嘅出道作，上映时得17岁嘅佢就话当时真系乜都唔识：“直头系黄毛丫头，我本身都好钟意睇戏嘅，咁啱有编剧就睇到我拍嘅广告，就觉得我同《烈火青春》嘅Kathy好似，所以就揾咗我Casting，我当初都唔信系真！最后我真系去到张叔平屋企Casting，佢、谭家明同关锦鹏三个就牛咁眼咁望住我，好似对眼有X光咁，又叫我化妆，又放部摄影机对住我，搞到我好惊，惊到震咗成个钟。”
Pat姐继续讲：“点知佢哋真系拣中我，我都系抱住玩下嘅心态，但我知道原来套戏张国荣、汤镇业份就好兴奋，我本身好钟意张国荣，而汤镇业𠮶时系TVB嘅一线小生。”咁其实同汤镇业拍电车戏尴唔尴尬？我发现Pat姐嘅豪迈真系天生嘅，佢咁答：“真系冇，同埋关锦鹏好保护我，拎咗6条底裤出嚟畀我著。其实呢场戏只系尺度大胆咗少少，香港人比起好多地区都真系几保守。”
讲到《烈火青春》故事中间风格转哂，最后仲好痴线添，问Pat姐会唔会都觉得有少少九唔搭八？佢就咁睇嘅：“我都觉得有少少奇怪，所以话剧本真系好紧要，千祈唔好虎头蛇尾，我都唔系好明点解咁突然要叫我死，特登整个Bad Ending出嚟，应该系我同汤镇业去到我哋想去嘅地方嘛，所以有少少遗憾咁啰，我钟意Happy Ending多啲。”