【烂鬼Cult噏】楚原仆X片《辞郎洲》烂到癫　最大镬系衰边样？

上星期我阿头去咗度蜜月，而去之前又冇讲定想我写边出戏，所以我就偷鸡冇写到观后感。结果，佢旅行完返到嚟就拉咗我入会议室，其实佢未叫我𠮶时都已经有哂心理准备畀佢抦架喇，点知佢又冇咩闹偷懒呢样嘢，只系想话个栏目会由“Cult噏”改做“烂鬼Cult噏”，因为原来网友开嘅facebook专页撞咗名。咁佢好顺口就问我呢个星期想写咩戏，但我真系冇咩谂头，𠮶下净系谂起楚原喺金像奖台上话自己连拍几套“仆X戏”，所以我就随口噏话不如写呢啲。大家都知啦，之前写过嘅《山狗》、《打蛇》都系好黄好暴力，所以我就谂住佢会Ban我Idea再畀啲戏名我。点知，佢话好，因为“烂鬼Cult噏”个“烂”字系指紧烂片。

多得网友好关心楚原讲紧嘅“仆X戏”到底系讲边几套，亦感谢同事写过唔少相关报道，我好快就Check到楚原嘅“仆X片”之最系1976年上映、收得7.2万嘅潮州话戏曲电影《辞郎洲》。其实我因为上一份工嘅关系而有楚原叔嘅电话，我谂咗几日应唔应该打电话去问清楚佢，因为都预咗佢唔会讲咩㗎喇，但系谂谂下我唔问又唔知可以点写，所以最后都系胆粗粗打畀佢。首先我就恭喜佢拎咗“终身成就奖”，然后就同佢讲好多网友都想知佢讲紧边几套片，我问最乜乜嘅系唔系《辞郎洲》时，佢就咁讲：“好多套都好仆X，呢套就其中之一。”到问佢点睇自己呢套作品时，佢就开始封口喇：“其实自从金像奖之后都好多人打嚟，但我冇准备讲任何嘢，以前嘅事都系无可奉告。”然后就匆匆收咗线。乐观啲睇都算有收获吖，起码楚原叔肯认《辞郎洲》好仆X，但其实我仲有好多问题未问，因为我睇咗套戏先打畀佢嘅。而喺讲呢套戏之前，我想同大家讲一样嘢，就系你睇得哂我当你赢。

咁其实《辞郎洲》个故事真系好简单嘅，就系南宋末年，女主角陈璧娘（萧南英饰）同一班人说服男主角张达（丁敏反串）出兵勤王打蒙古人，之后张达却喺厓门被敌人围困仲搞到身陷囹圄，到陈璧娘带兵夜闯蒙古人阵营时，却发现夫君已经以身殉国，最后仲为咗掩护一班百姓撤退而阵亡。我喺睇戏呢个半钟里面，除咗心里面冒起咗几条有关剧情嘅问题外，问得最多嘅就系套戏几时先肯完。最大嘅原因，就系我唔睇字幕嘅话，系完全一句对白都听唔明。可能你会话，你睇日本片、韩国片都唔识听啦，你咪又系照睇。唔同㗎，真系唔同㗎，你要记住呢度戏系戏曲做底，佢比起好多电影节奏慢好多，净系第一幕陈璧娘劝老公出兵勤王，都用咗差唔多成四个字，畀现代电影驯化到冇咗耐性嘅观众，睇到呢个张达扭扭拧拧咁耐真系会火都嚟。

呢套《辞郎洲》比起楚原其他片，好似《流星蝴蝶剑》同《三少爷的剑》咁，真系争好远，我喺《辞郎洲》完全感受唔到𠮶种楚原作品应有嘅诡秘美丽。啊，其实都唔系完全系咁嘅，有两下打仗场面都好有楚原Feel，但真系得𠮶一阵仔，完全系到喉唔到肺。咁最后一幕都好奇情嘅，就系元朝将领张弘范攻打辞郎洲时，就下令士兵向陈璧娘放箭，射到陈璧娘趴咗喺树上面，到张弘范想行近陈璧娘睇清楚佢系咪已经死咗，中咗几支箭嘅陈璧娘就突然弹起，吓到班元兵即刻脚软坐低，古怪到我搲爆个头都唔明呢下系做乜。

以上呢啲嘢都未足以解释到点解呢套戏咁唔收得，好多时观众唔入戏院都唔知中咗伏，但呢套戏真系成个Package都好赶客，我唔系讲紧依家㖞，系讲紧70年代。其实香港一直都唔系潮语电影嘅主要市场，当时最主要睇潮片嘅人多数都系星马泰嘅人，而香港当时主流都系粤语片同国语片，无啦啦整套潮语片真系要好有兴趣先会入场睇。咁其实香港都有好多潮州人吖，点解个票房都系咁上下？我谂最大原因系𠮶时年轻一代嘅潮州人已经唔系好识潮州话，更何况识听潮州戏曲。《辞郎洲》呢套戏，除咗系楚原最后一套潮片，亦都系香港最后一套潮片。不过用计数机计一计，票房有7.1万，𠮶阵啲戏飞就2至5蚊左右，都应该有成两万人入场睇架㖞，好过依家唔少戏。