破解“女上司阴影”！学懂运用女性特质　如何刚柔并重事半功倍？

女上司真系人见人惊？

有读者同我讲，佢最近见咗份工，个新上司系女人，而佢曾经有过“女上司阴影”，好怕同女上司合作，问我应唔应该Take呢个Offer。佢令我谂起，曾经有人同我讲，如果见工时发现上司系中年女性，一定要睇下佢有无带结婚戒指，或者个样Dry唔Dry。再者，你应该都经历过，每次有朋友呻上司蛮不讲理的时候，总有人回应：“你上司女人嚟架？”然后就话：“难怪啦／有排你受啦……”

呢个世代，男女都能够位高权重，究竟一个有权嘅女人系咪比男人可怕？

作者：诗宁

单身女上司较易发脾气？

女上司最为人诟病的是其个人的情绪控制，不能否认，女性身体的确有唔同周期，而且荷尔蒙转变又真系会令女生情绪受牵动。但能唔能够控制这种“牵动”？就视乎每个女生嘅修行喇，而修行系由先天性格、生活圈子、工作经验、人生阅历等等而来的。咁样睇，家庭事业两兼顾嘅女性，所进行过嘅修行或者EQ嘅锻炼又真系比单身女性繁复，特别系耐性同时间管理能力方面，一边返工一边要处理仔女学业或其他家庭决定，如果佢小小事就发脾气，唔好话份工啦，佢自己家庭都好难打理得好，所以一段情况下，有家庭嘅女上司情绪系稳定啲。

当然，凡事总有例外，我有幸遇过单身女上司系温文高贵、聪明有效率的，不过佢出身自书香世家、又饱读诗书仲瑜珈灵修再加上对其宗教信仰非常坚定……所以，我从呢位修行咁深嘅单身女上司都学到好多嘢，但前题系，呢啲咁高质嘅女高层，数目唔多。

硬颈只会换来揽炒

男女都好，脾气人人有，所以我唔会话发脾气嘅上司就一定系衰，最少佢嘈完闹完，起码知佢想点吖。反而一啲过份自我、硬颈嘅上司先系麻烦制造者，无论做咩事只系为咗啖气、为咗赢，甚至不惜牺牲其他人嘅尊严同前途，面子大过天。呢种上司只会为下属增加揹锅同食死猫嘅风险，一味强硬冲冲冲，将一啲明明用软功兜个圈就完成到嘅事，为咗唔输得而冲埋去，结果就是揽炒。

其实做人唔一定要考第一，女性若懂得刚柔并重，会令自己同同事都更快乐，咁难先爬到上高位，不如好好运用女性特质令自己更上一层楼，例如大部份女性都比男性细心，处事多留意细节，做决定或安排时通常都谂多一步，一个人预早有两手准备，做事当然系事半功倍，唔使等有事发生先徬徨乱出招。不过咁，细心同小心眼系两回事，过份细心变工心计就会好丑陋喇。

一个上司想服众，除咗叻之外，更重要系能屈能伸、知所进退。打工仔，当然明白向上爬、想邀功系人之常情，只要你令同事条气顺，其实大家唔介意配合你畀位你擦鞋，但若然你有次做错决定，不妨考虑下道歉、转个弯用其他方法擦鞋，一样会达到升官发财嘅目的，真正聪明嘅人，系会让自己喺欢呼声之中上神台，而唔系全Team人怨声载道陪你牺牲。