职场小人轻易击退！擦鞋仔应对有技巧　哪种人最需要小心提防？

懒醒是需要练习的

我钟意返工，因为我钟意观察同事们为咗生存、上位而衍生出嚟的不同嘴脸，当然有时佢哋会害到我，但每畀人害一次，又学识点防避小人。小人有好多种，今篇讲啲初级啲嘅：擦鞋仔、懒醒收风王、搭嗲达人。

作者：诗宁

擦鞋仔

出嚟做嘢，无论你几有真材实料，擦鞋技俩都是必须的，只不过，适可而止的擦鞋可以令人开心；过火就令人呕心。点先系适量？好多时擦鞋仔都当局者迷，好易唔觉唔觉擦多咗而成为众人笑柄，如果你担心自己功力未够，建议先擦少啲，练熟咗先再表演，以免犯众憎或者冲出嚟畀人笑。

Jacky喺众人眼中系一个不折不扣的擦鞋仔，但佢完全唔知其他人系咁睇佢，仲成日以为自己掩饰得好好。有次Lunch Time，老板兴高采烈拎住一个大盒返嚟叫同事们睇佢开箱，大家都好合作交戏，扮晒兴奋：“买咗新嘢呀？咩嚟架？”老板沾沾自喜话系限量版波鞋，只有英国先有得卖，因为佢识人乜乜乜所以订到嚟香港……大家继续交戏：“哗…哗…哗…”老板一边讲一边开盒，点知Jacky突然好浮夸、大声：“哗！真系好靓呀！”呢个时候所有人包括老板都静咗，大家望向Jacky，有同事忍笑，有同事忍唔住串佢：“都未打开个盒你就知好靓？”、“定系你想讲个盒好靓呀？”、“个盒无咩特别，白色架㖞…”最正系，连老板都忍唔住多加句：“你呢句，如果迟多５秒先讲就啱啱好喇。”

Jacky个样尴尬到不能，交戏唔系问题，但起码要啱Timing，如果你无信心，就唔好做带头𠮶个，都系等人哋讲完你先开口表示认同罢啦。

懒醒收风王

边个升职、离职，直接影响办公室局势，所以“收风”好重要，但有一种同事系好刻意显示自己知道好多“秘密”，但系表面又要扮唔讲你知，实际上却好想你问佢，佢根本就口疏守唔到秘密。

秘书Amy就系呢种人，成日流连于茶水间，好似同所有斟水嘅人都好熟咁，乜都八，但当你有嘢问返佢，佢就讲啲唔讲啲。有次公司传闻会有高层调动，佢就周围同人讲话个高层畀人炒，结果个高层畀人“炒”足一年都仲喺公司返紧工，唔清唔楚的事真系唔好讲出口，成笑柄事小，造谣生麻烦事大。

搭嗲达人

“健谈”系好事，但“多口”就令人燥，同事Peter把口由朝到晚都唔停，除咗狂吹水嘈住人做嘢之外，仲要任何同事倾任何嘢佢都会搭嘴，有次同事烦恼个租客成日迟交租，Peter未置业亦无租住过私人楼，但就搭咀：“断佢水、断佢电就会交租啦！”呢类咁冇建设性又唔可行的意见真系令人唔知畀咩反应，所以佢经常系话题终结者。

闲聊搭嘴都算，公事搭嘴先多得佢唔少，有次同事同上司争持紧Budget问题，同事想要多少少Budget落广告，正努力说服上司，上司犹疑之际，Peter突然出声：“Budget唔够，你落多几钱力去谂啲唔使钱嘅宣传方法咪得啰！”佢随口讲一句，令上司被“叮！”一声提醒咗，结果就害到同事晚晚放唔到工。

以上三种“初级小人”，其实都唔系黑心，而系性格影响到人而不自知（或者知但唔改善）。不过唔好睇少呢啲人所制造嘅烦恼，畀人害都可以防，但对方纯粹蠢就唯有敬而远之，唔好同佢熟。