卸膊上司犯错要割席？免得罪方丈　不擦鞋、不硬食　一招轻松保命

打工仔，无论你几高级，都总有“上司”高级过你。一般情况，都要跟上司指示去完成工作，但上司都系普通人，当佢落错决定的时候，你又会唔会照跟指示做？唔想揽炒，又敢唔敢出声提醒上司？点样开口先唔会激嬲方丈？

作者：诗宁

【点图先看】最易“提醒”变“得罪”的说话与情景＝＝＞

上司落错决定，几乎每日都在发生，我哋第一样要谂嘅嘢系明知佢错，但跟唔跟从？咁就要睇下佢个“错”有几大，如果佢叫你做𠮶件事系犯法，当然唔做啦，唔好以为“犯法”离你好远，我朋友阿明，上司叫佢拎几间公司Quotation但指明要某几间，阿明细问之下，上司暗示系想益自己朋友间公司，但公司政策一定要拎几间比较，上司已同其他公司“倾掂数”……咁分分钟可能构成“围标”。遇到大是大非，一定要直接拒绝，就算唔坐监，惹官非都有排烦。

如果上司个“错决定”只系小事，但你唔想陪佢出丑，又可以点呢？

首先你要清楚上司性格，系大方接纳意见？定系“我做嘢唔使你教”？就算系前者，你都唔好谂住兜口兜面指出佢错处，而系要讲：“Jessie，你呢个做法系好，但我有多个建议，你比较下……”正所谓伴君如伴虎，就算上司一向钟意你，佢都有权因某一次误会而突然唔钟意你。

如果你上司出名小气，我劝你唔好第一步就谂住进谏，而系先谂下有无其他方法。曾经，公司有个刚毕业的同事Boey，上司叫佢迫一个Designer唔收钱，免费帮公司做单Event Design，上司仲同Boey讲：“我哋系上市公司，佢帮我哋做完，佢可以放单Event落Job Reference，益咗佢啦！”Boey毫不思考，竟然将上司呢翻说话直接同Designer讲，Designer嬲到飞起，喺电话闹咗Boey成廿分钟，Boey收线之后好委屈咁喊住向其他同事求救……

其实Boey应该先消化上司嘅说话，明白上司个目的系想“免费”，就谂下点样先可以达到呢个目的？或者系距离呢个目的近啲？例如用婉转嘅方法渗畀Designer知单嘢Budget唔够，睇下对方咩反应，如果对方企硬，就再问多几个Designer睇下有无人肯接，最后拎晒几间资料向上司汇报申请Budget／放弃某啲非必要嘅Design／谂其他方案。

简单啲讲，明知上司小气，应该试咗其他方法先，然后再返转头、兜个圈向上司讲佢个方法唔 Work。系就系做多咗嘢，但好过好似Boey咁，畀Designer闹完再畀上司闹，两面不讨好。

当你有信心捉摸上司心意之后，就要谂出事时边个“孭镬”？如果做错事之后，只镬系上司自己孭，你乖乖听话无所谓啦，但如果出事之后佢系推个责任畀你，咁你就唔好咁傻猪明知错都听话喇。要做定啲准备功夫，例如喺相关电邮入面有技巧地写啲保护自己嘅内容。对不负责任嘅上司，要随时做好割席的准备。

返工之所以攰，有时唔系工作繁忙，而系人事复杂。