职场最毒未必妇人心　成日劝你辞职、热衷讲公司坏话背后另藏意思

损人利己嘅事好多人做，但只损人而不利己嘅无聊事都一样有人热衷地做。我嘅转工次数多到自己都数唔到，经验话我知，几乎每间公司都有一个“好钟意叫人辞职”嘅同事，佢口中每一句都系讲紧公司坏话，但最正系，佢讲到间公司咁差，偏偏佢自己就唔辞职，最后仲做埋资深同事，本文称呼佢哋为“辞职老臣子”。

作者：诗宁

其实返工辛苦想呻下好正常，但发出过多嘅负能量就令人好讨厌，呢种花生友好钟意见到啲同事来来往往，每次有人辞职，佢就会话：“唉，又走一件，呢度真系留唔到人，我都就走架喇，你都揾工啦。”除咗咁，佢哋说话亦有以下几种特色。

小事化大

为咗落力数公司嘅不是，办公室每日发生嘅任何事都会成为佢哋借题发挥嘅材料。小事如茶水间嘅蒸馏水刚好饮晒而新一批未送到，“辞职老臣子”会话：（精彩语录请点图，如有听过，实属巧合===>）

成日讲“以前”

“辞职老臣子”开口埋口都话公司差，当然遇过人反问佢：“咁你点解仲唔走？”呢个时候佢哋就会搬“旧屎”（旧时）出嚟，话公司以前唔系咁架，成班同事好似屋企人、日日嘻嘻哈哈，老板又无睇到啲Budget咁紧……如果你工作经验唔多，迷迷糊糊就会畀佢游花园带咗去第二度，“旧屎”都无你份，你唔够佢讲的，仲分分钟信咗佢，畀佢影响到以为公司系“越来越差”，而呢个亦系佢哋想灌输畀你嘅官感。

把口好甜，成日赞你

有玩社交媒体都知道，想香港人按个Like唔系咁易的，否则都唔会有咁多公司要请Digital Marketing返嚟玩专页。现实生活亦一样，热爱投诉嘅香港人点会无啦啦赞人？除非你都自问做得好好甚至系超出一百分，否则，个同事成日赞你叻，你就要谂下系咪有啲古怪。其中，“辞职老臣子”踩公司嘅同时亦会赞同事：

（再来精彩语录请点图，如有类同，实属不幸===>）

明明公司请你返嚟就系为咗买你嘅技能，但佢讲到你为公司付出技能系蚀底咗咁，畀人赞多两句好容易就飘飘然觉得自己应该揾“更好”，而乜嘢系更好？出面一定更好？“辞职老臣子”唔会答到你，佢只系想你辞职。

如果你已经有几年工作经验，我相信你都遇过“辞职老臣子”，可能中过佢嘅圈套或者已经学醒了。此文想提醒各初出茅庐人士，你成日听人讲出嚟做嘢要醒目，因为会有人畀氹你踩，直接害你的人当然要防，但日日同你食饭互呻、齐齐数公司嘅人都未必系益友，带眼识人呀。

【01女生．爱情告白】正所谓情深说话未曾讲，世界与你又何干，无论你系单恋、暗恋、热恋、失恋，诚邀你趁情人节爱情告白，将由“01月老”（神秘嘉宾）于情人节为你读出。 https://bit.ly/2AMS5PN（爱情冇限期，但告白有，截止收集：2019年1月28日）