同公司性格不合　不如提早分手？求职免中伏心得：见工最紧要八卦

每次有人辞职，其他同事就会话：“你就好啦有得走”、“羡慕你呀脱苦海”之类。大家最关心就系佢转新工加咗几多人工，而其实有唔少同事或读者同我讲佢系减薪走的，点解？因为同现公司“性格不合”，公司文化令佢日日唔开心，所以宁愿揾少啲，所以“公司文化”都系一个几重要嘅考虑因素。

作者：诗宁

最近，同事F辞职，原因系佢揾到份政府工，有几个同事都表示非常羡慕：“你就好啦，以后唔使再揾工”、“哗以后可以Hea住做啦”我恭喜同事F揾到自己钟意嘅工作，但我无羡慕佢。首先，我识好多做政府工嘅朋友其实都好大压力，并唔系想像中的Hea做；其次，你要我一世做同一份工，我觉得好闷，转工有咩唔好？见多啲唔同公司嘅制度、工作方式，工同工之间又可以抖下 ……

讲到尾，无一份工叫“绝世好工”，只有适唔适合。

【点图即看】如何喺入职前知多啲间公司嘅文化，减少“拍错拖”嘅机会？

1/ 睇公司网页

见工前睇公司网页当然系基本功夫，但除咗睇有咩业务、有咩生意伙伴之外，亦不妨睇下公司最近有冇举办员工活动？重唔重视员工声音？

我曾经做过一份工，公司特设“二五仔热线”，若员工于公司遇到不公平待遇时，可以匿名打去投诉。呢啲尊重员工嘅措施，系可以喺公司网页见到嘅，虽然都系门面嘢，但公司有呢个谂法都算系Open-minded。

2／社交媒体

每间企业都有特定形象同方针，每个Post嘅文字都包含机构特色。写到正正经经又书面语，就知话事𠮶个都系保守型；相反玩味多又会出抽水Post，似乎都愿意放手畀细嘅作少少新尝试，工作上有自由度。

3／见工时留意公司装修

上网睇完，打咗个底，最实际当然系实地观察，室内设计除咗反映老板品味之外，最重要系睇到佢重唔重视员工同埋佢希望公司个working style系点。

例如，会议室间隔系用玻璃？磨沙玻璃？定系木板或墙？全玻璃的话，好明显老板认为会议室内系无秘密的，唔介意开会时畀出面睇到听到，佢性格可能Free Style啲。

而更切身当然系员工座位，有房？Open Area？一人一个位定系一张长形大台坐埋一齐？位同位之间有无Partition？要同事坐埋一堆的，可能系想大家Work得Close啲，但亦可能系纯粹悭钱，最紧要老板房舒服，懒理出面迫埋一堆。

4／见工时周围望下，感受下工作氛围

由行入Reception开始，我就会睇下个接待员的面口，佢系开心轻松定系听电话听到黑口黑面？其他同事行出行入会唔会倾下偈定系陌路人咁？

有次填完表，等紧Interview𠮶时听到接待员订紧文具，全部都系贵牌子，心谂，呢间公司放落员工嘅Budget都唔少，然后等多阵有其他人经过，接待员仲问：“今个月啲钱使唔晒呀，茶水间有无新嘢想添置呀？”

如果情况许可，行入去Interview嘅时候经过办公室就望多几眼，睇下大家系打仗咁款定系围埋吹紧水，咁你就大约想像到将来入呢间公司之后嘅生活。

5／直接问Interviewer

最好嘅见工技巧，系倾偈模式，即系同个Interviewer有问有答，而唔系坐喺度好似畀佢审你咁。

但你记住，倾偈嘅目的唔系想识朋友，而系打探下公司文化适唔适合自己，所以可以问“呢个职位的Peak Season大约几月至几月？”如果佢答你12个月都Peak，咁你就自己谂下值唔值得喇。总之你要谂下想要一份点嘅工作？职场上有乜嘢系你唔钟意？谂完之后你自然知道应该问Interviewer咩问题。

见工前，准备好以上各点，亲身睇过、听过，自然减低同公司“因误会而结合”嘅机会，咁就唔使到“分手”时伤身又伤心。