【80后承父业】家姐患顽疾靠石斛医好 弃梦想卖打卡冻龄养生花茶
以往总觉得是长辈才会注意养生，而且都是靠食中药、做气功等“老饼”方法，年轻人总是带点抗拒。不过近年坊间的健康饮品店开到成行成市，不论装修或意念都锐意打入新一代市场，其中的花茶品牌“花研草说”就是一个成功例子，靠著“IG-able”的西洋书法饮品瓶及摆市集等招数，成功把“石斛茶疗”概念推广给后生女，负责人Stone对于重塑这品牌绝对功不可没！
摄影：邓倩萤
本身有睇过“花研草说”Instagram，不论是那个恋水瓶、背后布置的花花、打卡相等，都相当之女性化。当我邀约品牌做访问时，心想对方可能都是后生女，就跟它本身的客源一样，但没想到创办人居然是位男士、一位父亲！而“花研草说”之所以诞生，正是基于这位父亲对女儿的关爱。
服用石斛半年 家人成功治好免疫系统失调
创办人黄启明先生已很少打理这品牌，几年前全盘交由儿子Stone主理。Stone说，他家中有四兄弟姊妹，唯独是姐姐童年时身体异常地差，让一家人烦恼不已。
“佢可以同时间个口入面有二、三十粒痱滋；由本身好肥，到食唔到嘢变得好瘦、好虚，我哋著晒短袖衫，但佢都话冻要著褛、好多嘢都唔食得，就连食菜有少少油，都好似对身体好重负担。”
家姐整整10年被这些症状缠绕，为人父亲者当然不惜一切希望找个好医生，但总是没有人能准确告知这家人，到底她身患何病，直至遇上一位中医，整个家庭似是觅得灵丹妙药似的。“个中医话家姐系免疫系统出咗问题，乱晒、打晒仗，所以用咗石斛帮佢调理呢样嘢，最后又真系畀佢医返好！”
Stone的家姐用半年时间终于调理好身子，身型回复正常，Stone形容她变得像仙女一样，也解释到何以有这个变化。
点解我哋会肥呢？未必真系我哋食咗好多卡路里，系因为好多毒素喺身体排唔到出嚟，咁如果清晒啲毒素，其实就OK。
梦想与事业之间的抉择
去到2012年，Stone的父亲受家乡福建政府邀请，决定大力发展石斛产业，甚至在当地开垦出自家的石斛种植园，专门种植最高级品种的铁皮石斛，“我哋用香港对食品管理嘅概念去做呢样嘢，自己种先确保到个品质，因为我发觉好多人做生意都真系为咗赚钱，你同人攞货可能会买到假嘢，或者攞啲紫皮石斛（次一等的石斛）嚟扮啰。”
其实Stone从来都不是那种想接管家族生意的人，不过父亲早年已多次暗示属意将石斛业务交到他手，出身于纽约电影学院的Stone，一心视摄影为梦想，内心固然经过多番挣扎，但他形容自己很快“向现实低头”，“因为𠮶个系你老窦吖嘛，算啦，都要有啲膊头，虽然我钟意影相啫，但都要做返啲帮屋企嘅嘢，我都钟意做嘅，依家啲Product相全部系我影，咁做出嚟几靓，啲人又开心，我都好有满足感。”
向父亲妥协其实并不等于放弃梦想，Stone调整过自己想法，领悟到两者其实可以共存，“可以一路影相一路做啫，影相当Part-time啰，所以我喺火炭都有个4千呎嘅Studio，专做摄影同广告，有接啲广告同MV返嚟拍，可以做下导演。”因此，他并没有对当年的决定后悔，反而于这个可以由自己话晒事的品牌中，逐渐找到成功感，从起初半推半就，到后来乐于经营好这个心血。
重塑品牌 足料茶包助客人每日饮足8杯水
即使家族已有一大个自家种植园，可是7年前的花研草说，跟现在差得太远了，讲到公司原本的风格，Stone笑笑说：“一开始，有啲成熟啰，因为我哋好原始，唔系做冻龄茶嘅产品，净系卖一粒粒石斛，又或者做紧啲粉呀、片呀咁。”这种专卖药材的路线，又怎会得到年轻人注意呢？深感“唔掂”的Stone当时廿几岁，站在后生仔角度的他坦言：“根本唔系每个人每日都会去食或者饮石斛，觉得系好传统嘅药材或者苦茶，你几补都好啦，啲人唔食都冇用，我就谂不如做啲靓啲又易入口嘅嘢，同中医倾开‘茶疗’概念，就系每日靠你饮茶去吸收微量嘅营养，咪可以调理身体啰。你话煲汤𠮶啲，又要买材料、洗嘢、煲几个钟，依家啲都市人点会咁同你咁玩呀？我都唔会理你啦！”
花研草说的花茶明显比其他品牌大包，平时可能只是一个茶包仔，但这里的花茶茶包约莫有1部iPhone般大，整包都被填满，两个字总结——足料，按中医建议的分量，每包都可以翻冲3至4次，并且能冷泡。
讲起成本就真系一额汗，开头我爹哋都问，系咪真系需要咁多料倒晒落一包嘢里面呀？我话真系要，因为你足唔足料系啲人决定继唔继续饮嘅原因，唔足料，啲人觉得唔够味，转头又饮返珍珠奶茶㗎喇！
不少家长都会买石斛花茶给小孩，首先它甜甜的，不会有“赶客”的药材味，而且没卡路里和添加剂，“佢系健康饮品，小朋友饮下饮下就饮咗8杯水㗎喇，就算你撇除咗石斛或者柠檬有冇营养都好，饮多啲水点都系好㗎，我好多朋友话‘我唔钟意饮水㗎，都冇味嘅！’好，咁我整啲有味嘅水畀你饮啰。”
按图看“花研草说”有什么石斛花茶：
石斛好处多 冻龄益脾胃
Stone深信他们是全港首家以石斛茶疗为主打的店，除了因为石斛曾治好家姐的病，也因为他确实从科研报告中认识到石斛的4大好处，“第一佢对脾胃好好，第二佢对睡眠好好，因为滋阴。人点解会瞓唔著呢？因为你阴虚，阴阳失调就好容易失眠，你试下每日瞓足8至10个钟，个人会自动消瘦，所以呢只茶帮到你瞓觉、肠胃，佢最贵就系石斛多糖，帮到你调节个免疫系统。”五款石斛花茶又名“冻龄茶”，冻龄在于抗氧化功效，多个实验显示出它能对抗“岁月杀手”自由基，难怪深得女士欢心。
问到有没有一些特别的个案让Stone特别深刻，他即语带激动说：“有呀！医偏头痛！曾经有个我哋Staff嘅朋友，同我哋讲话以前成日头痛，饮得石斛多就冇咗呢样嘢，我哋都不以为然㗎，点知之后又有个街客inbox我哋，话头痛问题改善咗，我哋都系𠮶时先知原来医到头痛。我谂可能都系关免疫系统事啦！”
脾胃、睡眠真系人嘅根本！你食嘢慢啲，就冇咁伤脾胃，消化又好啲，瞓得优质啲，咁咪Recover好啲啰。人每日都死紧100万个细胞，瞓觉就系帮你Recover紧𠮶100万个细胞。
冇大财团撑腰 靠市集让人认识
这几年做生意的方式跟从前实在相距甚远，随著社交媒体兴起，要做好网络公关和宣传，也要影靓相来吸客，不过如何让更多人认识自己的品牌，也是一门学问，Stone坦言自己是“揼石仔”，facebook的支持者以至整个牌子本身的知名度，都是由零开始，“本身又唔系话好劲好有规模，又唔系有新世界喺后面撑腰，都系Small potato，咁我咪去摆下市集，同多啲人接触，话畀人听石斛有咩好啰，间中有啲媒体访问吓，Online又写吓啲关于健康嘅文章。”
市集都系本地文化之中，可以慢慢滋生嘅一个位，佢门槛唔高，但插画家呀、手作都可以喺入面做，系几好嘅地方。
他提到市集，原来亦是与客人建立关系的一大渠道，“开头人哋乜都唔识，但喺市集见到你个Brand连做一个盒用咩纸都咁高要求，仲要几靓，咁就会觉得可以试一盒啰。就算你话我哋同屈臣氏合作，都系由市集开始。同埋我谂市集都系本地文化之中，可以慢慢滋生嘅一个位，佢门槛唔高，但插画家呀、手作都可以喺入面做，系几好嘅地方。”所以，本月19号，“花研草说”又会去“社区健康型活墟”摆市集了！
花研草说
售卖点：花研草说茶疗工作室、诚品生活各分店、文化村各分店、婆婆杂货店及HeArtStudio（详见官网）
Instagram：mzklifehk
“社区健康型活墟”活动详情：
日期：2019年4月19日（星期五）
地址：湾仔修顿足球场
时间：12nn-6pm
【第一届武博】格斗笼内，高手埋身肉搏，真实呈现你眼前！武博内设“格斗笼”，将有不同类型的表演赛，包括泰拳、MMA综合格斗、菲律宾魔杖及业余修斗等，力量、拳风、汗水，比赛就是如此真实！快约定热爱搏击运动的朋友们，5月3至5日，眼界．决定境界，九展见！