【素食达人】茹素令10年怪病不药而愈　林云中赴日钻研精进料理

经常感冒、胸口凹陷、呼吸困难、生毒疮、无法大小二便、肚子胀鼓鼓的……你无法想像，这一切病症霎时出现在一个25岁的年轻人身上。他是林云中（Jeffrey），本来是个艺人，但大概观众对他并不很熟悉，正常的，因为正当他25岁那年从日本留学回港考入无线艺员训练班后，满心欢喜以为银色旅途即将启程时，却忽然染上了怪病，一病便是十年，如今他已经45岁。
摄影：龚嘉盛

人生黄金十年被恶疾缠绕，没有人敢再起用这位动辄就不舒服的新人开工，而Jeffrey根本无法好好地过每一天，时间表上的日程也尽是睇医生、食药、休息……他形容那十年就是不停“寻找隐世医术”，用钱来买个希望，遗憾的是，从未有一位医生能准确地告知自己究竟患上了甚么病，“试过好多方法，医生不停叫你食抗生素，照呢样、照𠮶样，照唔到就叫你验下个脑，总之人生就系抗生素，西药、中医、针灸，乜都齐！”

我觉得自己死㗎喇！本身都冇话有生命危险，最后就有喇，个肚胀埋出嚟，起晒毒疮、去唔到大小二便，一去就痛，因为成个身体入面都已经错晒。

10年来Jeffrey看过无数医生，甚么名医、神医，他通通去试，惟病情不但没有好转，后来更严重到只能卧病在床，“我觉得自己死㗎喇！本身都冇话有生命危险，最后就有喇，个肚胀埋出嚟，起晒毒疮、去唔到大小二便，一去就痛，因为成个身体入面都已经错晒。”几近绝望的他，除了睇医生、还是睇医生，当中最极端是找了一位内地“神医”来帮自己“换血”，Jeffrey坦言那是最痛苦的一次，“个头要剃晒，然后针灸，唔系针咁简单㖞，好似凌迟处死咁，针头成支箭咁粗！几千针插入去，由头顶一路落到屁股，针完你后面，个人已经死咗，冇晒力。佢话要抽走我啲死血，到伤口好返晒又抽前面，话咁样可以换血，抽到落脚板底都要针！”难道就此便痊愈了？他说：“睇咗5次，全身换晒一次血，但系都冇帮助……”

就在这时候，又冒来了另一个认识自称少林寺中人的亲戚，已“中伏”多次的Jeffrey不敢再抱太大期望，可是除了再孤注一掷，还有其他选择吗？“当时梗系去试下啦，唔理喇，都冇得拣，佢话不如你试下食素啦，哦，好啰。”他再一次以为病情从此会有所起色，然而现实不但止没有，他食完两星期后更加晕倒了！不过Jeffrey“唔信邪”，继续试，“我个理念系，你叫我食一段时间，我都会听足，我相信任何嘢都需要时间，我觉得冇理由会唔得，所以我去研究，谂点样去食，因为当时对素食冇认识，咪食啲菜呀、菇呀、豆呀……梗系唔够营养啦！跟住我上网Check，又问啲食素嘅人，𠮶刻开始就戒晒所有嘢。”

本来我系一架跑车，已经Total Loss咗㗎喇，去任何一间车房都搞唔掂，但我用素食去将呢架跑车个外壳搞返靓仔，同埋Keep住好嘅生活习惯，等我入面可以继续去运行、继续我嘅生活！

原来即使病入膏肓，本身沉溺于夜场，夜夜笙歌兼又烟又酒的Jeffrey都改不了劣根性，身染顽疾期间还是烟不离手，那一夜却突然决断到话戒就戒，他如似解释：“个人未面对过死亡系乜都唔会理，但你面对死亡之后就会觉得：‘唔系㖞，大佬，死㖞！我后生遥遥仲有好多嘢未做㗎嘛，咁样死咗唔得㖞！’于是我就学素食，戒晒所有坏习惯，改善我嘅生活，学好多瑜伽、拉筋，慢慢去改变自己嘅思想同行为。你要恒久咁去排毒，根本唔需要靠任何药物，靠自己就做得到，我直情系一个人办！”他坦言自己10年间的医药费，凑凑埋埋已够买两架“波子”（保时捷跑车），问到当得知原来食素就能治病后，是否觉得自己嘥了很多钱，他却谓：“调返转头讲，你未去到咁死，系真系唔会决断去做咁多嘢，依个都系我小小得著。”

除了明白这个道理，Jeffrey也终于领悟出自己因何而病，原来是因为在日本京都生活时，经常于家人开的餐厅饮酒所致，“我好好酒、又好夜生活，开头细个就钟意咗𠮶样嘢，一饮酒生活就唔协调，加上身体个底子又唔好，返香港之后个病就开始发出嚟。”

患病10年、康复又用了10年，Jeffrey直言现时45岁的自己，正处于人生最颠峰状态，更打了个譬喻，“本来我系一架跑车，已经Total Loss咗㗎喇，去任何一间车房都搞唔掂，但我就用素食去将呢架跑车个外壳搞返靓仔，同埋Keep住好嘅生活习惯，等我入面可以继续去运行、继续我嘅生活，但系当然唔好乱跑。”

他认为茹素最紧要识食，只要集合多种颜色食材，根本无需担心营养不足，“未食素之前又唔见你谂自己够唔够营养，点解食素要谂呢？我当你出去食黑椒鸡扒饭，你冇菜，够唔够营养吖？唔够吖嘛！其实最简单就系你要食多种颜色嘅食物，喺𠮶棵植物由叶食到落根，乜都食，咁样就够晒所有营养。”当记者叫Jeffrey建议一个自备便当的组合，他就说：“首先我唔会食白饭，白饭啲营养喺外面层壳，即系最好嘅反而畀啲猪食晒，我会食五谷饭、十谷饭或者十六谷饭，然后会用根茎类，例如莲藕、薯仔整出嚟嘅食物，另外再食番茄、海藻，加个汤，其实已经好足够。”

用五种颜色嘅蔬菜，再用五种调味同烹调嘅方法，炸、蒸、煮、烧、生（SashImi），依几种煮法做出嚟嘅料理就系精进料理。

直言“食素原来咁坚”的他成为素食者之后，更不断钻研日式素食以及“精进料理”，行外人一听，大概以为“精进料理”就等于“高级料理”，Jeffrey说“精进料理”其实是“怀石料理”的前身，以素食为主。精进料理丰俭由人，日本许多家庭主妇都会做，而Jeffrey则如此为它下定义，看完你便会明白了，“用五种颜色嘅蔬菜，譬如红、黄、蓝、白、黑，再用五种调味同烹调嘅方法，炸、蒸、煮、烧、生（刺身），Sashimi用喺植物度都得㗎，依几种煮法做出嚟嘅料理就系精进料理。”

1、2年前，他更决定利用识日文这个优势，远赴日本考取5张料理证书，包括：茶屋长寿甜品文凭（Macrobiotic Sweet Diploma）、精进料理课程证书、无麸质无蛋奶蛋糕及甜甜圈证书、豆腐Meister认定讲座证书以及生机饮食基本证书，部份专业资格更是全港只有Jeffrey一人成功考获！众所周知日本人凡事认真，一丝不茍的态度堪称全球之冠，幸好Jeffrey从小在日籍后父那位于京都的日式料理店成长、帮手洗碗和执头执尾，多少都打了个底，他忆述从前的经历，“舖头个木趟门上面好多一格格，老窦叫我清洁佢，我就好Hea咁逐格抹下啰，佢闹我，因为每一格都有尘，佢要见到每一格都冇晒尘先得，仲要我抹埋天花板，我谂平时就算大扫除都唔会抹啩？都要抹，𠮶时日日畀佢闹。”

每用一个盘之前就会喷消毒药水，一定要喷过先可以用，喷完又要即刻抹。用完咪有一大堆嘢要洗嘅？要即刻洗㗎，洗完即刻抹返干晒，之后先可以做下一个Step，唔可以摆晒喺度之后先抹。

而去到上堂的时候，导师对所有用具的卫生程度都要求极高，“整蛋糕要好多个盘，每用一个盘之前就会喷消毒药水，一定要喷过先可以用，喷完又要即刻抹。用完咪有一大堆嘢要洗嘅？要即刻洗㗎，洗完即刻抹返干晒，之后先可以做下一个Step，唔可以摆晒喺度之后先抹。同埋譬如我上甜品堂，同老师一人一个甜品，一齐做，有少少步骤错咗，或者出到嚟个饼底争少少都好啦，都要再由头做过！”

严谨也有严谨的好，Jeffrey能学到最正宗的一套料理方式，亦从中更了解日本饮食文化和礼仪，例如倒茶、斟茶要如何拿杯等等，但他就谦称只略懂皮毛，有机会必定会再去日本进修。他一直把其中一位全日本做无蛋奶甜品最神级之前辈的话铭记于心，对方讲过：“我哋学依种甜品，唔系甜品嚟，系艺术品。”

当大家以为Jeffrey学成归来，做起日本料理必定万无一失，事实回港后却是屡次碰壁，即使他已按足步骤、拍齐片段、写妥笔记，还是出错，因为那位神级前辈也讲过另一番话：“用蛋奶整甜品本身已经好易出错，我哋呢科会更容易出错，因为佢冇蛋同奶，要揾豆腐同其他材料代替，可能争1个gram、2个gram已经好大变化，仲有空气同潮湿度、温度都影响。”香港的水质、焗炉跟日本不同，有些食材也不能进口，Jeffrey只好屡败屡试，不断找娱乐圈朋友试食，从而修正和提升自己制作的日式甜品，没想到因此无心插柳地认识了现时的经理人公司，重投演艺圈，拍摄《暗算天机》等网剧和电影，再续20年前未能发展的演艺事业。

按图即睇更多Jeffrey的影视演出作品，有部分更是从未曝光！

我想透过精进料理去改变啲人对素食嘅睇法，吸引更多香港嘅后生仔去食，因为素食根本好有营养、好时尚，系有佢嘅意义喺度。

日本对很多香港人来说，总是有个光环似的，如果有人都想学Jeffrey一样去日本进修厨艺，他有点小建议，首先是否懂得下厨并非重点，因为他之前对入厨都几乎是白纸一张，然而他表示：“一定要识日文先，我有两个老师都讲过，好彩我识日文佢先会接受我嘅申请，如果唔系唔会教我，太烦呀，唔知点沟通，会阻碍好多时间。同埋个课程要上一年，我好彩先揾到个导师两个月密集式咁同我上堂咋㖞，咁你能唔能够喺佢开课嘅时间飞嚟飞去呢？要3个月返嚟一次，如果你有充裕嘅时间同金钱，咁梗系得啦！”Jeffrey大约用了6万元去完成5个课程，不过最大开支其实是生活费，住屋、食饭钱、水电媒等，他形容是“攞命”，所以大家要考虑清楚是否有能力负担。

亲身接触过日本的素食文化后，Jeffrey认为最大分别是日本素食餐厅并不会大大只字在门口写住个“素”字，多数以”Vegan”的片假名拼音代替。除此之外，整个餐厅形象都跟香港斋舖不同，“一讲‘素’字我哋好潜意识觉得系𠮶科嘢，但𠮶边系好后生，入面成个环境做到好时尚，9成都系女士、后生嘅OL，呢个系最唔同。”

他也希望自己学会日本的一套后，能搬到香港持续发展，“我觉得香港嘅素食行到好尽㗎喇，都系港式新潮嘢，但其实日本精进料理又靓，入面又包晒唔同煮法、颜色、季节食物，一Set已经有晒你想要嘅嘢，我想透过咁样去改变啲人对素食嘅睇法，吸引更多香港嘅后生仔去食，因为素食根本好有营养、好时尚，系有佢嘅意义喺度。”深明社会风气就是“相机食先”，Jeffrey制作的日式甜品和精进料理都是非常精致，“你个Presentation要令人觉得好新颖，呢样好紧要，因为依家所有嘢都要对眼食咗先，系几考工夫。”

按图即睇更多由Jeffrey亲自炮制的日本精进料理及甜品！

Jeffrey目前经常在自己的facebook专页分享日本素食料理食谱，获不少网民分享，使他体会到香港人对新颖食谱其实有所渴求。而身为艺人的他亦想过开饮食节目，但要不就不要开始，既然要做他就希望做到最好，“我谂过做YouTube，不过我想做啲正规啲嘅嘢，嚟紧可能有啲好Formal嘅制作，希望畀更多人知道素食嘅好处。”至于长远来说，Jeffrey的心愿还是拥有自己的餐厅，他想开一间走传统、正统路线的日式素食餐厅，带给食客一个宁静、优雅的环境，也能在用餐时学习到正规的日本餐饮礼仪，可是Jeffrey笑言“哪有钱”，“啲钱医病都医晒啦！”那么现阶段唯有先努力揾钱和揾合伙人吧！