舞台忘记台词勿“惊” 一招教你点拆︱人生导演课︱冼振东专栏
文：冼振东
某日，戏剧工作坊结束之后，一个有数次演戏经验的中四学生，走过来说：“东sir，我有个少少低能嘅问题 … 但系我又一直好想问 … ”
“没有低能问题，只有低能答案。”我笑笑道：“希望我答到你啦。”
“我呢，次次做戏都会好紧张 … ”
“个个都会个㖞。”
“所以我咪觉得咁问好低能啰 … ”
我后悔那么心急回应他。于是接著说：“对唔住，我唔应该咁样hea答你嘅 … 你继续吖。”
他顿了顿，幽幽的说：“我真系成日都好惊自己唔记得台词呀。”
“我明。所以Miss Fong不断提你哋放松啲，行出来就咩都唔好谂，尽力去做，系咪？”
“都系好紧张㖞。成日惊自己唔记得要讲咩 … ”
“咁你够唔够勤力先？台词系咪已经好熟好熟先？”
“背得好熟㗎！但一样会好紧张呀。”
一顿。
【延伸阅读：演绎真实人生 以“Believe”做好角色│人生导演课│冼振东专栏】
我忽发奇想，转换一下话题：“我前几日听见你话想改编一段《雪山飞狐》，喺variety show道做。依家搞成点？”
“写紧㗎喇 … 写好俾东sir你睇睇！”
“金庸武侠小说你睇晒未？”
“差唔多啦。系《天龙八部》睇极都未睇得完 … ”
“有无睇《倚天屠龙记》？”
“梗系有啦。做咩呀sir？你想改编《倚天》呀？”
“唔系唔系 … 你 … 等我一阵 … ”我打开手机的浏览器，搜寻一下。
“东sir你真系谂住改编《倚天》呀？… 听讲《倚天》又拍电视剧㖞 … 舞台剧会点搞呢？咁鬼多人 … 净系光明顶𠮶场都逼爆个台㖞 … ”
我确认了资料，跟他说：“你屋企有无成套书呀？或者你去图书馆，揾番《倚天》来睇，睇睇第廿四回。”
“吓？第 … 廿四回？”
“系呀，第廿四回。帮到你㗎。”
一星期后，我再找他谈。
“东sir我睇咗喇 … 你想我改编呢一段来做？”
“唔系，我系想你明白一样嘢。”他一脸不解。
“你做戏紧张，系因为惊自己唔记得台词。你想唔紧张呢其实好简单：喺出场之前，要‘唔记得晒’啲台词！”
“吓？”
“呢一段呀。”我把手机阅读器上《倚天屠龙记》第二十四回中，张无忌学太极剑的一段给他看。大意是，武当祖师爷张三丰教主角张无忌学太极剑，示范完之后问他：记得了没有？张无忌回答：已忘记了一小半。张三丰点点头，叫他自己去想想。过了一会张三丰再问：现在怎样了？张无忌回应：已忘记了一大半。最后张无忌把招式都“忘得干干净净”，张三丰非常满意，放心让他挑战高手。
“就算你排咗好多次、啲台词已经熟到烂，系一样会惊唔记得嘅。记住，‘惊’唔记得同真系唔记得，系两回事。但系你因为惊而喺脑里面狂loop住啲台词，就只会愈来愈惊！所以呢，最好嘅状态就系觉得自己熟到已经‘唔记得晒啲台词’，行入舞台投入去做，啲台词就会自然流露出来。咁做唔单止唔会惊，重好大机会做得好㖭！”
他似懂非懂的看著我，一副“你系咪老点㗎”的模样。
（专栏“人生导演课”每月刊出，标题由编辑撰写，原题：“《忘得干干净净》”。本文不代表艺文格物立场。）
作者简介｜冼振东，明爱华德中书院助理校长（演艺），深信戏剧能成就全人教育，致力栽培学生成为自己人生舞台的导演：“导好自己・演好人生！”