演绎真实人生 以“Believe”做好角色│人生导演课│冼振东专栏
文：冼振东
Peter正在向两位助教Joe和Catherine讲解戏剧的培训方式。
“首先搞清楚，学‘做戏’系能够令你更加识得‘做人’。”
“做戏即系扮嘢㖞，系假㗎噃。”Catherine直接指出。
“咁妳自问，妳系咪一日廿四小时对住任何人，都系咁真诚吖？”
“咁梗系唔系啦 …… ”反而Joe第一时间回应。
“咪系啰。”Peter做了一个极夸张的表情：“日常生活根本人人都喺道做紧戏，只系无人够胆承认啫。”
Peter在白板上大大只字写上： “please don’t act!”
“叫人唔好做戏，即系叫人唔好虚伪啰。”Catherine相当认同。
“呢句嘢唔系叫人唔好做戏，系叫人唔好做戏做得咁假。”Peter顿了顿，“我哋成日话做人要真诚，但讽刺嘅系，只要除低咗个面具，就好难喺个社会道生存。”
“系，我哋系无时无刻都要戴上唔同面具做人嘅 … 但真诚待人都系必须个㖞 ，唔系成个社会都好虚伪。”Catherine说。
“真系要完全‘真诚待人’系无可能㗎。我哋追求嘅，应该系戴咗面具咁去真诚待人。”
“咁矛盾？”Catherine说。
“首先，如果你系做自己嘅‘真诚’，就一定会自私自利，因为做自己嘛。但系如果你戴咗‘角色’嘅面具，即系例如你戴咗‘爸爸’呢个面具，你就要好真诚咁做‘爸爸’呢个角色嘞 … ”
Joe和Catherine沉吟著。
【延伸阅读：演戏跟踢球一样 合作才能讲好故事│人生导演课│冼振东专栏】
“其实我哋每个人都想做好人生入面每个角色。”
一顿 ───
“所以简单啲讲，我哋系戴住角色嘅面具做人嘅。如果你想做好一个角色，就要真诚。对自己真诚、对人哋真诚，同埋好真诚咁谂吓点样将个角色做到最好。”
“即系要时常反思，点样戴好啲个角色面具 …… ”Joe开始明白。
“可以咁讲，”Peter解释：“人一生喺唔同阶段，其实会做好多唔同角色。好多时生活得唔开心，系因为有一、两个角色做得唔够好。要做得好，其实唔应该去 ‘演’（act）个角色，而系要“成为”（be）𠮶个角色：即系用‘真诚’去成为𠮶个理想嘅角色。所以就要提醒自己：‘please don’t act!’”
怎样做呢？Peter认为，演员演绎角色，过程是：
演员想要成为（剧本中）的人物 (character)，以演好舞台上的角色 (role)
而真实人生，我们的演绎过程是：
自己想要成为（理想中）的人物 (character) ，以演好生活中的角色 (role)
“不断反思、检讨，谂吓理想嘅人物（例如理想嘅丈夫）系点嘅，就喺日常生活演绎出来，成为角色。”Peter说：“角色要演得好呢，得一个方法，就系‘相信’。”
Joe问：“角色做得唔好，因为唔够‘真诚’？”
“要真诚，就要‘相信’，”Peter在白板写上 “believe”。“相信自己就系𠮶个理想嘅人物，先至能够演活角色。”
上过演技工作坊的Catherine早就知道演戏要“believe”，但这是很难掌握的概念。她期望Peter说得实在一点。
“要做到当然要keep住训练啦。”Peter擦去白板上的“believe”，写上：“be + lie + ve”。
“具体啲讲，‘believe’就系令自己 ‘be’喺个‘lie’入面，即系生活喺个‘大话’入面。当然你会话：咁咪即系虚伪啰？其实唔同，虚伪系指𠮶种大话嘅状态系有唔好嘅目的，通常都系一啲自私自利嘅目的，但生活喺个理想角色嘅大话入面，可以话系一种成长。”
“咁‘ve’呢？”
“将‘ve’ 当成 ‘we’，就系唔单只你自己要相信，亦都要令到其他人相信。戏是大家（we）一齐演出来嘅，其他人都要相信你，成台戏先至成立。”
“be + lie + ve”…… Joe与Catherine逐渐明白，眼前的Peter之所以是个大师，很大程度上是因为他深深“believe”自己是个大师。
封面图片：@Steven Libralon/Unsplash
（专栏“人生导演课”每月刊出，标题由编辑撰写，原题：“《BELIEVE》”。本文不代表艺文格物立场。）
作者简介｜冼振东，明爱华德中书院助理校长（演艺），深信戏剧能成就全人教育，致力栽培学生成为自己人生舞台的导演：“导好自己・演好人生！”
【英国画家 William Hogarth 经典《时髦的婚姻》，六幅画诉说一个上流不幸婚姻故事！】