【升职加薪】人工加 $500唔“劈炮”　甘心被睇死“离唔开”？

每逢年头，除咗展望将来之外，都系各公司准备加人工嘅时间，喺呢场“年度角力”里面，你又有冇谂过自己一直都系underpaid？

根据香港政府统计处刊登嘅《2017年收入及工时同比统计调查报告》，喺15-24岁同25-34岁呢两个年龄层嘅全职雇员里面，月薪中位数分别系HK$13,500同HK$18,000。

当然，报告里面仲有按行业去划分，但如果单纯以年龄层计，你又系咪underpaid咗𠮶个呢？

人工加啲啲，走好定唔走好？

人工从来都系一个敏感嘅话题，即使喺好多亲近嘅朋友之间，大家都会绝口不提。讲得出口嘅人，九成九都系自觉揾得畀人哋多，俗称“人生胜利组”，又或者打份“风流工”就一世嘅“二世祖”。

笔者就试过有次约班旧朋友出嚟打波，其中一个忽然话：“我做嘅嘢又少过你、揾得又多过你。”跟手再“转身射个三分波”。当时大家听到都呆咗，除咗句嘢难听过粗口之外，仲发现原来社会真系会改变一个人。但与此同时，你又有冇谂过，其实你唔一定要系畀人窒𠮶个？

又有另一个朋友以前做过一间卖bb用品嘅admin，过咗半年试用期之后加咗“五旧水”。冇错，一大张500蚊港纸。

假如我系佢，我会即刻拎张500蚊纸出嚟揼落佢块面度（如果银包有的话），跟手就辞埋职。我当时就畀咗两个字嘅建议佢──“劈炮”。

骑牛虽绝对，切记要揾马

一直以嚟，老板同下属之间都应该系对等，因为当你需要份人工嘅同时，佢哋亦需要你为公司卖命，若然公司唔珍惜你的话，何必留低？纵观欧洲地区，每年罢工嘅次数同人数仲多过香港为争取民主嘅游行次数。而每次罢工后，佢地嘅人工都会有相对应嘅增长。虽然你可以话系文化差异，但同时都可以话系自己唔争气。

有所谓“天涯何处无芳草”，假如你喜欢份工的话都叫打死无怨，但若果自己讨厌间公司，又要遭人待薄，一切都系自己攞嚟。

相信大家都深明“骑牛揾马”呢个道理，但知易行难，尤其当社会每日都同化紧你。大家收工都只系想揾一个喘息空间，一系就埋首打机，一系就好似黄子华喺《绝代商骄》里面咁揾个“树窿”。

之所以莫讲话揾工，连揾男／女朋友都觉得攰。但有咁嘅心态就正中公司下怀，佢地就系因为睇死大家都“离唔开”，于是“大条道理”咁紧随大市加薪幅度：3.2%，笔者尝试畀个例子大家：如果你而家月薪$15,000，人工加幅将会系$480，冇错，系500蚊都唔够。如是者，当大家喺到骑紧只牛嘅同时，就会慢慢放弃去揾𠮶匹马。

正所谓“做人做狗自己拣”，当你一边觉得自己值得更高人工，公司同时间又“度缩”嘅时候，但自己又唔选择离开，可能系时候要take a leap of faith。希望大家睇完呢篇文之后至少会记住一件事──打工同拍拖如出一辙：要先有人愿挨，另一个人先有得打。

【本文获“Wantedly Hong Kong”授权转载。】