【HR未来】转行做睇相佬、保安、侦探？　身负独特技能失业冇有怕

近日HR素人睇书增值下自己，发现有本书讲到HR嘅实况，呢位同业都真系几唔话得。等我节录其中一段出嚟，等大家可以了解多啲HR系咩一回事啦！

【文章原刊于01撑场，欢迎下载香港01 app，与星级作者一同讨论喜爱话题。】

成日见到文章话，科技将会取代好多职业，而且好多都发生紧，例如M记已经唔请咁多收银员、美国又已经有无人驾驶嘅汽车。亦有人话HR将会系消失嘅工种之一，因为将来HR系统会更加完善，重复性嘅工作，例如Payroll，甚至招聘都有可能畀电脑取代。

如果有一日HR呢个职业真系从地球上消失，我哋呢啲做HR嘅全部畀人炒晒失晒业，有冇谂过铺定条后路畀自己？根据HR做嘢嘅特质，或者你可以考虑以下几种职业，睇下自己啱唔啱：

1、睇相佬

做HR平时见人见得多，睇人都睇得准啲，绝对可以考虑去庙街摆档帮人睇下相。啲人嚟问运程问事业就开正你𠮶瓣，即刻同佢做返个interview先：“先生，唔该你介绍自己吖。”同佢倾几句就知佢点解揾唔到工，仲可以加多100蚊提供CV修改服务。

2、私家侦探

FBI教你读心术，HR都一样可以。成日做interview嘅HR，一个小小嘅举动都可以睇得出candidate嘅诚意。再加上平时成日要用尽方法撬开唔讲嘢嘅candidate把口，训练得一身高超盘问技巧，审犯、捉奸都无难度。

3、专业维园阿伯

HR为咗要平衡公司同同事之间嘅利益，有时要同candidate倾下人工，有时要同老细倾下budget，有时又要同啲商舖讲价为同事谋福利。牙尖嘴利去到专业级，城市论坛点可以冇咗你？出咗名甚至可以试下去参选，话唔定可以做埋立法会议员呀。

4、搬运工人

HR出名女仔多，公司冇男同事，女仔成日都要搬运厚厚嘅P-file，有时仲要每日帮手换水，人仔细细都有强健嘅臂弯。如果系男仔更加唔洗讲，搬乜都系你㗎喇。所以做搬运工人一定冇问题，送水就最啱，强劲啲扎铁都仲得。

↓↓↓【编按：按图看还有什么职业可以做】↓↓↓

结论系做HR嘅你唔怕失业。

不过呢，断估你都唔会全职去扮鬼。HR会唔会真系消失真系未来先知，不过如果一间公司仲有人类存在，自然会有人事问题。除非有一日地球真系开始有科幻电影入面嘅有感情机械人啦，如果唔系呢啲问题应该都仲系要交畀有血有肉嘅人类解决。重复性嘅工作难免会被取代，或者将来HR只系会换个形式出现，所以想为未来做好准备，就系时候要装备自己。

以上内容出自HR小薯蓉著，《我系邪恶HR2──成魔之路》，非凡出版制作。

撰文：HR素人

【编按：文章题目为编辑所拟，原题为“HR失业做咩好？”​】

（文章纯属作者意见，不代表香港01立场。）

立即下载《香港01》，紧贴公务员职位空缺、劳工处笋工推介，了解CV、面试致胜技巧！
下载网址：
https://hk01.app.link/bkbJyY5t4O