【来稿】“无国界759”救助美食沙漠儿童　岭南生：7蚊咖喱救咗我

759阿信屋曾经拯救无数贫苦大学生。农历七月鬼门关开，岭南死老鬼（编按：老鬼为大学毕业生的自称）想悼念自己逝去的U life同青春。
撰文：虎地穷拎

沙漠中的绿洲：13蚊自组日式咖喱饭

要喺虎地生存，首先你要识满足唐君毅老先生口中的生物逻辑层，即系喺食物沙漠解决三餐。以前岭南得一间“出色”颓can同岭南楼（酒楼），方圆百里内的富泰商场，都有间麦记、大快活同几间贵价茶记。当你食厌廿蚊餐又唔想畀40蚊食茶记，又未够钟买宵夜，想买颓面返hall食啦，点知诚哥间百佳又唔生性，次次收银条队排到出九龙，饿到胃出血都未畀到钱。

呢个时候，面对颓can三星饭，瘦肉精午餐肉、大陆肠、太阳蛋同几条冷菜组成的狗也不X的颓饭，759阿信屋可谓帮一众穷拎提供营多以外的alternative U  life。岭南势力范围有两间759阿信屋，一间喺富泰，一间喺兆康西铁站。以前759阿信屋逢五、六、日特价，系入货好时机，岭南生就齐齐去抢购7蚊包嘅即食咖喱，再配6蚊叮叮韩国白饭，或者3蚊包嘅乌冬，豪啲可以牛肉加葱花，幻想自己喺日本食紧咖喱乌冬，但分别只系我10蚊就买到，外面就卖紧百几蚊。不过，痴线佬如我，都唔够个屈蛇roommate癫，佢一包咖喱食两餐，除开即系9蚊餐。我都只能大叫一句：OK！You win！

救苦救难759阿信屋

穷拎大学生要喺香港生存，相传食垃圾食物系目前最有效的方法。当年陈智思系岭南校董会主席，后尾做埋降低食物中盐和糖委员会主席。其实我唔系无试过，我试过安份守己，降低食物中盐和糖，我试过，我真系试过！但又要快又要平，仲要健康，又边有咁理想？

反正楼又买唔到，果断买堆垃圾零食治愈自己仲实际，759阿信屋有时仲有特价德国黑啤、生力、1664、仲有酒鬼如我都饮唔落嘅ICE。想当年，1664喺百佳卖$16.9，阿信屋最平卖到$8；合味道大杯装诚哥卖十几蚊，林生卖7个半。但最出色都系家庭装百力滋，PK卖$22.9，759卖$15.9，呢几年百力滋价格都好少重上20蚊高位，可能林生系近10年最直接挑战诚哥同怡和超市垄断的香港仔。

林生，爱国如你10年内3次要求加入共产党，你都为守住张香港身份证而无惧被拒入党，最终退求其次加入民建联。但无论政治立场点唔同都好，你曾经拯救过无数贫苦大学生，功德好比无数捐助大学的有钱佬。喂饲废青之恩，没齿难忘。

林生，R.I.P.，一路好走。