【来稿】青衣半山人的悲哀：无通宵小巴做唔到夜鬼　注定无朋友

众所周知，啲人约gathering，除非你大部分朋友住喺港岛所以约铜锣湾，如果唔系，一班人入面就算有大西北人、有新界东人、有九龙东西人、有港岛人，gathering地点最终都系会拣系旺角或尖沙咀，因为大部分地区都有通宵红VAN可以返到屋企。但对某部分人嚟讲，每当临近12点，我哋开始睇表做人，当大家玩到兴起、吹水吹到重点嘅时候，我就同自已讲，听埋呢句我就走喇。初相识嘅朋友心谂，你灰姑娘呀，十二点前要返到屋企呀？咁系因为佢哋唔知道究竟miss咗尾班巴士有几惨（你有钱搭的士除外）……撰文：青衣半山人

青衣好细？地铁站行返去要40分钟

好多人以为，青衣好细，以为去到青衣＝到咗屋企，唔知道青衣都分好多区。介绍返，青衣岛面积系大过成个湾仔区、差唔多一个观塘区咁大，而观塘成个区有五个地铁站，青衣得一个。青衣系住咗成廿万人，都多过成个湾仔区。

青衣周围都系山，地势忽高忽低，只有近海旁𠮶边比较多平地，好彩嘅，住近地铁站边嘅长发长安邨，唔单只可以由地铁站行过去，有啲单位仲对正海景，都咪话唔系公屋中嘅豪宅。住喺翠怡宏福，行过去都系十零廿分钟。唔好彩嘅，住青衣老邨长康长青，或“青衣半山”长亨长宏邨，去到青衣站都系要转巴士或者小巴先返到屋企。而我就系住喺“青衣半山”最高嘅长宏邨啦。平时由青衣站到条邨车程都只系10分钟。一到半夜12点50分后，当啲人miss咗尾班巴士，就会全世界冲去排的士，试过条队有廿几人，但的士得𠮶几架，等咗半粒钟先有车……俾我唞吓得唔得呀……

试过有人问我可唔可以喺地铁站行返屋企……冇话唔得嘅，Google就话要40分钟啰。虽然我都系钟意行路嘅人，但过完长安邨后，接驳半山𠮶几条担杆山路、枫树窝路同青衣西路，根本只系预比车行，你真系要行嘅话，就要穿过隧道，喺乜都冇（有斜坡、草、油站）嘅公路旁行10分钟，先去到长亨邨嘅山脚，如果住正长亨高处或长宏邨，我就真系恭喜你啦，因为要再用你十零分钟先爬到上山返到屋企。呢条路，平时搭车经过，通常人影都冇只，偶尔先会见到跑步友一身运动装束经过。条路斜斜哋，都几train到体能我谂。但如果你系一个女仔，夜妈妈一个人喺呢条路行，都咪话唔惊。仲要系凌晨，本身都有啲眼训，行完即刻精神番。

冇通宵小巴　焗挨“青衣一夜游”57站通宵巴

然后你会谂，乜青衣冇红VAN咩？SORRY，青衣系红VAN禁区。绿VAN呢？青衣得一架通宵小巴，喺荃湾开嘅。当你喺尖沙咀或旺角返返屋企，就只有一个选择：N241。呢架巴士，我会形容为鸡肋。读大学𠮶时我都搭过几次，无错佢系返到我屋企楼下，但系佢过完弥敦道、长沙湾道后，仲要兜埋荔景、葵芳，先入青衣。第一次搭时入到青衣，天真的我以为屋企在望，点知佢喺青衣兜咗足足14个站！九巴将日头几条线合成做一条，兜匀10个屋苑，兜完青衣南面嘅长青美景长康，仲要兜去中部青衣邨，再去埋北面嘅长发长安，先返返转头上返山去长亨长宏（总站），俾张图你睇，会发现路线系“弓”字再加“人”字，真系九曲十三弯……当东涌同返天水围嘅朋友已返到屋企时，我可能都未开始上山。明明平时出旺角都系半个钟多啲，通宵竟然系一个DOUBLE，一个钟。等车随时等成25分钟，根本就系惩罚夜返嘅人。

仲有唔知点解，可能系新车关系，架N车啲灯光光过平时啲车好多，有啲司机会好心熄灯，有人落车先开返，但有啲就全程都开灯，仲光过SOGO LED大MON，真系想瞓阵都难。

九巴可能会话，你得咁少客，我点开两条线呀！但你而家条线咁，赶走唔少客啦，好难靠呢个数去预计开多条线分流会冇人搭㖞。其实小巴最灵活，可惜而家冇小巴由旺角入青衣，点解会咁嘅？

11月头，我发现九巴开咗架N41X，声称系特快线，仲因为咁而减少咗N241班次，但睇番，原来N41X得两班（12:45同01:00）……真系多谢老细。

泥鯭的　想快返家的另类选择？

有人会话，有泥鯭的你唔搭！作为一个新界长大的村姑，我从来都唔知泥鯭的系点work／喺边搭，亦惊会同啲陌生叔伯同车，同埋始终非法。不过，听闻唔少青衣人都会拣泥鯭的，15分钟返到屋企，但就贵啲。其实如果深宵交通做得好，泥鯭的边会有生意呀。为咗避免折磨的“青衣一夜游”，我已经渐渐成为一个唔会夜归嘅人，注定无朋友。

睇完呢篇文，可能你心谂：你估得青衣系咁咩？大西北／北区／XX都系咁啦！欢迎一齐讨论。或者你都渐渐因为深宵交通唔方便，一早习惯咗赶尾班车返屋企，又或者你因为总系早退，冇咩朋友会揾你，所以冇呢个问题……或者你会话，早啲返使死咩？咁深夜先收工嘅人点算呢？香港出名系个不夜城，好多人都要深夜先放工，唔知有几多基层就系因为咁日日冇咗一个钟休息时间，或者因为交通咁不便而放弃某啲工作……