【猪年职场】新年唔做蠢猪：小心得罪方丈、存在感亦比尽责任重要

过年总会睇下运程，研究下点样先可以催吉避凶，打工仔当然希望猪年唔好遇到猪队友，你有无曾经疑问过：“点解呢啲人猪到咁都生存到？咁都唔使畀人炒？”换个角度，你觉得人哋蠢猪，会唔会对方都觉得你傻猪？除咗摆风水阵之外，仲有其他方法可以做叻猪嘅。

好多打工仔都想辞职，但无人会想畀人炒。转过大约二十份工，只有其中两份工见过公司炒人，而呢两位被炒嘅同事都唔系废级，佢哋都好勤力做嘢。呢两位被炒同事分别唔同年龄、公司、职位、背景，唯一相同嘅就系……傻猪猪得罪人。呢个世界识人好过识字，相反，得罪人的话无论你几勤力都一样无运行。究竟做咗乜嘢会令你“得罪人”？有时可以系莫须有，唔钟意你嘅原因可以系你著衫靓过你上司、你无同人讲早晨、你唔埋堆一齐Lunch……呢啲实在系避无可避，但系唔系完全无得防？又未必。

撰文：诗宁

（唔想做蠢猪，点击图片看猪年职场3招傍身＝＝＞）

“呻”都系一门学问

唔少打工仔最钟意就系呻，明嘅，老板唔肯出钱但又要你做到件事好好睇睇；同事又蠢又懒就乜都唔使做，佢做唔掂又塞畀你，你可靠所以无得放工；对外又有唔知自己想点、只系Ban桥唔交桥嘅烦客。每日真系有十万样嘢屈喺度，好想同人呻下抒发下。

职场上，方丈容纳到懒或蠢嘅下属，但包容唔到得罪佢嘅人。

但各位打工仔紧记，“呻”都系一门学问，你要揾啱聆听对象，佢唔可以口疏同埋你哋最好系坐埋同一条船，即系你衰咗佢都唔会有著数，否则，你随便呻两句，佢转头就是非当人情帮你散开去。无论你工作上嘅遭遇有几值得同情都好，太多人知，对你都唔会有好处，唔通同事知道你惨之后，佢哋就会救你出苦海咩？

呻嘅内容都要谂过先出口，有啲人你系唔怨得嘅，例如你明知个老板吝啬，你就唔好唱佢“请”同事食麦当当做Welcome Lunch都仲要象征式每人收返十蚊，正所谓崩口人忌崩口碗，真嘢唔好拎出嚟讲，你内心知就得啦，你估你唔讲，其他人就睇唔出佢系石头钻不出血咩。呢个世界真系有人小器到你想像唔到，我上文所讲嘅两位被炒同事，就系衰讲老板坏话，一个传一个，你唔会知老板听到𠮶个系咩版本，总之佢憎你，要你消失。

存在感比默默做嘢更重要

能够喺公司做到人见人爱当然好，但呢个道行唔系人人修练得到，但最少你要有一定嘅存生感。唔好以为无人认得你，就少啲人叫你做嘢，无论你几静，有屎嘅时候一定有你份；但如若你太静，有糖嘅时候就无人记起你，咁你就永远只有吃屎的份儿。默默做嘢系尽责，但做完啲嘢要畀人知先得，否则你有你做，功劳就其他人领。

唔好以为无人认得你，就少啲人叫你做嘢，无论你几静，有屎嘅时候一定有你份；但如若你太静，有糖嘅时候就无人记起你，咁你就永远只有吃屎的份儿。

叻唔需要畀全世界知

我做过咁多份工，的确见过唔少叻人，曾经有同事系乜都识：电脑维修、营销策略、公关技巧甚至系一啲日常生活小智慧，佢咩书都睇亦学以致用，帮公司、同事解决好多问题。但佢个短处就系锋芒太露、钟意认叻，当其他同事有嘢唔识要问佢，佢就会大大声话：“下？咁简单都唔识？都叫你唔好咁毒，多啲出去扩阔眼界。”、“呢啲嘢系人都知啦，你点解会唔知架？你无朋友架？”搞到同事尴尴尬尬，内心唔钟意呢个人，当呢个人有事嘅时候，就无人帮佢了。

职场上，方丈容纳到懒猪或蠢猪，但包容唔到得罪佢嘅傻猪，各位打工仔，猪年醒目啲呀！