【每逢大事讲故事】《射雕》G7版 大国领袖演活了金庸小说角色﹗
近排全城街头巷尾个个都在射雕射雕射雕，唔好心邪，飞云讲紧套剧啫。翻拍过n咁多次，剧情全世界都识背，仲有咩新嘢讲？“李一桐好可爱，朱茵最靓，周迅最神似，不过黄蓉都系翁美玲做最好”、“新郭靖麻麻地，都系黄日华版最经典，Chilam也不错”、“穆念慈孟子义好靓女呀”、“苗侨伟演东邪型到爆裂”……
讲呢啲，飞云自然系搭唔上嘴嘅，识睇剧梗系要睇配角，《射雕》入面，最好睇其实系东邪西毒南帝北丐神通五绝，虽然好少出招，但话说佢哋个个拥有绝世好武功，咁多年嚟睇咗八个版本，好似无乜边次会对饰演佢哋嘅演员有深刻印象。计我话，如果又再翻拍多次呢，五绝人选其实早已在国际舞台出现，大家不妨一齐嚟研究下佢哋做边个角色最啱啦！
上个礼拜个G7峰会，成个华山论剑咁，各国领袖各懐鬼胎，尤其是侵侵呢个美国新任大统领，专唱反调，人讲东佢去西，成日匿埋日练夜练一身“Make Amercia Great Again”毒门武功，收埋收埋死都唔肯益人，简直同“老毒物”西毒欧阳锋如出一辙。
根据金庸原著，欧阳锋乃西域人士，身材高大，高鼻深目，脸须棕黄，目光如电，语声铿铿似金属之音，应为欧洲白人血统。此人凶狠毒辣，为求夺得“武功天下第一”的名号不择手段，哗，仲唔系为侵侵度身定造？
无论对住任何人，佢都系喺度搧风点火，同欧盟委员会主席容克（Jean-Claude Juncker）开会，即刻打小报告唱衰德国人，“德国人真系衰，极之衰，睇下佢哋在美国卖紧几千万部车，唔得，我哋一定要阻止！”之后仲响Twitter出埋帖文再公开闹多次。
▲退出《巴黎协定》，网民睇不过眼，帮佢改图。由于飞云见到粗口会打冷震，于是幅图系经过特别处理。最抵死都系右面那句，“我都快死了﹗”，串侵侵不理他人死活。
之后到正场G7峰会，六国领袖个个叫侵侵支持《巴黎协定》，佢一于睬你都傻。大合照果阵继续众人皆醉佢独“醒”，一个可步行的距离，佢偏要坐高尔夫球车过去。全世界等佢一个，无嘢嘅咪又俾人丧改图啰。
相关文章：迟到、推人、唔合群 特朗普玩转G7峰会
▲“G7领袖在照顾小侵侵”
侵侵最令人羡慕之处，也许是其貌不扬却娶得大美人梅拉尼娅当妻子，这名第一夫人不时缺席白宫活动，出席时不是心不在焉就黑面，甚至公然对侵侵的热情一手拨开，令网民总是幻想自己可以英雄救美，弄了个“救救梅拉尼娅”（Save Melania）Hashtag出来，唉，欧阳峰的独门武功，咁啱咪就系叫做蛤蟆功啰，侵侵如果唔识，又点会食到天鹅肉丫。
相关文章：“#放开梅拉尼娅”网上掀热潮 史上首个需“营救”的第一夫人？
北丐洪七公系男人，仲要系乞丐，点解会配落默克尔度？咪𪠳住先，嗱，德国本身当然有钱啦，但作为欧盟老大，佢要照顾希腊、葡萄牙、保加利亚、罗马尼亚等等债台高筑嘅兄弟，排紧队入嚟嘅仲有马其顿、科索沃、摩尔多厄、乌克兰呢堆伸手派，丐帮出名兄弟多，欧盟亦一样，而且都系穷鬼为主，单系背景已经好似。
而且身为丐帮帮主的洪七公，为人充满正义感，锄强扶弱拥有侠义精神，与力主拯救中东难民的默克尔倒模一样。最重要一点，洪七公同西毒系死对头。默克尔亦然，侵侵在G7峰会拒绝为《巴黎协定》作任何承诺，激到一向谈吐得体嘅佢都忍唔住爆Seed：“过去几日嘅经历话我知，那个可以依靠别人嘅年代已经过去。我们欧洲人必须亲手掌握自己的命运。”变返做人话咪就系明串侵侵同美国靠唔住，佢哋要从此靠自己。
摆明车马同美国划清界线，甚至连英国也躺枪：“当然啦，我们会同美国呀、英国呀维持友谊，不过我们亦会同其他国家好似俄罗斯咁保持友好关系啰。”明明前几日仲系盟友，共处几日就由in a relationship连跌十级变成普通朋友？好彩仲未由“普通朋友”降级变“人哋”，但都足见侵侵同人反台嘅功力实在深不见底。
相关文章：G7峰会团结幻象 默克尔：特朗普靠不住 欧洲人要靠自己
最吊诡的是，射雕结局系洪七公同欧阳锋揽住一齐死，现实版入面默克尔一副同侵侵力战到底格局，会唔会有类似下场真系要继续追落去先知咯。
头先讲到，默克尔闹美国时烧埋英国果叠，首相May姐到底衰咩呢？侵侵唔肯在气候协议就范，英国作为美国头号盟友，默克尔心谂：你点都要走出来同只侵侵痛陈利弊晓以大义啦，不过以默克尔连英国都打埋落“普通朋友”呢一类别嚟睇，May姐明显系无咁做到，先激到北丐Angela扎扎跳。
好明显，气候协议呢啲遥不可及嘅嘢，May姐呢一刻真系唔理得咁多，大选迫在眉睫都算，Brexit果下先惨，成班男人搞咁大嚿苏州屎出嚟，佢完全唔知点收科。所有事不关己嘅嘢是是但但求求其其咪算啰，英国一Brexit就同断六亲无分别，叫May姐做出咗家嘅南帝段智兴就啱晒。
讲开又讲，Brexit之后无晒朋友，可能会好得闲，May姐或者可以学香港果个May姐咁，上电视教人煮吓𩠌，反正屋企收埋大堆Cook Book同家传秘方无用武之地，话唔定仲可以闯出条新血路呢。
深度阅读：【英国脱欧】谈判路漫长 首相特雷莎·梅提前大选 势一箭双雕挫工党
东邪黄药师永远最难揾人演，自成一派上乘武功不在讲，而且上至天文、下至地理，琴棋书画、无一不晓，在金庸大师笔下“正中带有七分邪，邪中带有三分正”，试问人世间边有一个咁嘅人？新版射雕识揾苗侨伟来做的确型到裂，其实有一个人会更加神似，佢就系俄罗斯总统普京。
前KGB出身的普京神秘而高深莫测，作风硬朗、有主见，对西方国家尤其不以为然，同黄药师一样独据一方，武功高强唔在讲（无人唔信佢真系好打得），每逢妇女节吟诗，近排招呼习大大时仲表演弹琴，问你死未？
普京有几劲相信唔使多讲，趁奥巴马得把口，即刻把握机会借叙利亚争夺中东话语权；美国大选耆英斗耆英，输咗果边一口咬定话有俄罗斯黑客操控，又话侵班子一个二个见过俄国官员乜乜乜，搞到侵侵一上台就一身蚁，普京淡淡定话“可能真系有爱国黑客咁做都唔出奇”，不过俄政府绝对无做过，而且“我唔信黑客会影响到选民投俾边个”，成班如狼似虎嘅国际传媒大老都无佢符。
好啦无论如何，班美国人选件西毒侵出嚟神憎鬼厌，连锁效应就系个个unfriend美国，转移目标同普京做friend子，唔讲真系唔知佢其实系无去到G7峰会（俄罗斯系G8成员国之一，但因为克里米亚问题被冻结会籍先变成G7），喺侵侵令America Great Again之前，普京应该会先令Russia Great Again。
不过讲到近排在国际舞台令人眼前一亮嘅领袖，就梗系新任法国总统马克龙啦。佢唔止后生靓仔，仲要有吉屎。西毒侵成日借握手（或唔肯握手）玩尽各国话事人，马克龙第一次同佢握手，就大大力揸到侵侵只手到白埋，到大合照时仲特登扮睇侵唔到，同个个握晒手先“系咁儿”同佢揸揸手，虽然严格嚟讲飞云系唔识佢哋嘅，但真系忍唔住个心好凉快啰。
马仔最令人佩服嘅地方，系佢唔单止唔俾面西毒侵，竟然连强人普京的虎须都够胆捋。普京到访法国，马仔毫不留情地当面连番抽击：斥亲俄媒体报道假新闻、提车臣同性恋人被控案件、在叙利亚问题画出不可逾越红线，要求交战双方不得使用化武。令人意外的是，向来面对西方领袖都系Cool魔上身的普京，完全无黑面，甚至对马仔的坦率相当欣赏，人前人口对佢赞不绝口，说对方有助两国改善关系。
相关文章：当面狠批普京仍获对方赞赏 法国总统马克龙尽显领袖风范
年龄相差一大截的两人，惺惺相惜程度足可媲美东邪黄药师同杨过，黄因讨厌世俗礼教而跟小辈杨过一见如故，普京跟马克龙会面后，一直用慈父一样的眼神追随对方。
有趣的是，西毒欧阳锋收了杨过做义子，向来高傲的侵侵面对马克龙时总是想惹对方关注，也有异曲同工之处。马仔仲将侵侵句口头禅Make America Great Again（让美国再次强大起来），改成Make Our Planet Great Again（让地球再次强大起来），仲好娘咁整咗张疑似英文长辈图放喺佢个人Facebook度添。
不过讲到马仔同杨过最似的地方，当然系佢哋都系爱上一个比自己年纪大的女人，而且仲系“无惧世事变改还是越难越爱”果只痴心情长剑啦。杨过同姑姑小龙女一别16年才修成正果，15岁的少年马克龙爱上较他年长24岁的老师，他也苦等15年在30岁那年迎娶心爱的她。
相关文章：有7个孙的最年轻总统？ 39岁马克龙坦言若当选 忘年妻续任军师
东邪西毒南帝北丐个个身怀绝世武功，但系五绝之中有一个人的武功稍微高过佢哋少少嘅，佢就系全真派祖师爷、中神通王重阳喇。飞云真系唔够胆讲边个做到王重阳，纯粹以国际形势来比较呢，祖国总舵手习大大相对最接近嘅，《巴黎协定》被西毒侵搞串Party，中国及时挺身而出，加上一带一路连结各国，在美国将世界领袖地位唔知掉咗去边之时，中国或者可以冷手执个热煎堆也说不定。
相关文章：【视角】伙欧撑《巴黎协定》 环保事中国有Say 势成新推手