【每逢大事讲故事】翻开特朗普CV 睇睇slash世代总统搞边科
美国总统大选搞咁耐，现在总算尘埃落定，如无意外（例如释法），特朗普就会在1月20日正式就任为美国总统。飞云对美国新闻都算跟得贴，但讲左咁耐，花边新闻就听得多，对特朗普是何许人都始终所知不详。到底特朗普能否“做好呢份工”，不如齐齐HR姐姐上身，睇一睇CV……哇咦，原来成70岁仲身兼多职，咪即系近排最兴既“slashie”？
军校毕业 做惯大佬
1946年6月14日，特朗普含着金钥匙出生，他的父亲是美国大地产商弗雷德里克．特朗普（Frederick Trump）。唔讲唔知，特朗普13岁时老豆话佢曳，决心送佢入纽约军事学院“调教”一下，此亦成为他后来加入共和党从政的重要资产。未听过纽约军事学院？咁都应该听过西点军校喇挂？两间学校原来系邻居，亦是美国历史最悠久的军校之一。特朗普在学校中相当活跃，又做棒球队长又参加足球校队，后来更在军校中被提拔至上尉一职。
三岁定八十 带女返学校
但系！特朗普虽然身处军纪严明的军校，依然不改特朗普本“色”。他的旧同学后来接受访问，话特朗普出名“律人以严，律己以宽”，周末偷溜出外之余，还要带美女回来！哎本身已经唔算好friend架啦，讲女更加伤感情，同学心中大喊“公平咩！”
名校毕业 人前炫耀“我识字”
后来特朗普毕业后辗转入读宾夕法尼亚大学的沃顿商学院，对此他看来十分自豪，更将自己3名子女送埋入去（当然包括靓女Ivanka）。今次大选宣传特朗普亦这样说：“我在长春藤大学读书。我有很高教育程度。我识字，我识最好的字。”希望教佢英文嘅老师听到都唔好太伤心。但不要紧，人哋特朗普从商嘅，又唔系教书，未毕业就入daddy公司，唔通好似你哋班废青咁四围send CV咩～
工作经验：破产老板
特朗普做生意都唔知算唔算有一手，他一直经营房地产、酒店等生意，呢度起𠮶度起，但15年内申请了4次破产，对此他这样说：“不要说我破产。我从未破产，只是像其他大生意一样用法律取得好处——醒目！”
选美搞手 出钱出力
要过闪亮亮的人生，特朗普怎会只满足于商界。他亦进军娱乐事业，出钱又出力，成为环球小姐的主办者。为咗睇女仔，咁仆心仆命，仲要无私分享畀我哋呢班麻甩佬，飞云谂起都觉得好滚动啊！
演员／主持
特朗普唔只做幕后玩家，幕前都要玩埋一份。最广为人知，就是他主持的真人骚《飞黄腾达》，一句"You're fired”深入民心。另外他亦有参演不少电影，包括《欲望都市》、《宝贝智多星2》等，还有为他带来业界烂片大奖金草莓奖的《做鬼也风流》。
无政治经验 临老转行容乜易
喂喂，讲左咁多，全部都唔关政治事，咁HR姐姐好难搞架㖞。哎飞云都唔想架，问题系除咗捐下钱助选外，无乜得讲丫嘛。唯一系佢政治立场经常摇摆不定，就正如佢大学所在地一样，正正系摇摆宾……sorry，太顺口。大家都知佢家下系共和党啦，但原来2001年至2009年佢曾经加入民主党，摆嚟摆去系点解呢？佢自己话，因为觉得共和党太右，而民主党太左。吓！家下啲人个个话你系大右派㖞！
民主共和都唔啱玩
1999年特朗普接受CNN访问话：“我是个相当保守的人，在社会议题如医健等，我则算是自由派……我不认为任何人真的说得出我想听的话，亦不是其他人想听的话，我见到的。”
两次话参选 第三次得咗
喔原来系咁！唔怪得自己出嚟选啦，自己听自己说话，顺耳好多架嘛！其实1988年及2000年特朗普都公开话想选总统，但你话选就选到咩？但世事就系咁奇妙，之前两次都落空，今次奇迹般胜出，如愿以偿。所以呢个世界真系好励志，而家无，但将来会有，唔需要成日葡萄人，你话系咪先。
选总统就减薪 阿生你好串㖞
无相关经验、70岁人临老转行，完全无问题，所以美国梦呢真系好动人嘅，只系少不免要减下人工啰。特朗普之前上访谈节目《吉米法伦今夜秀》时，开玩笑说自己选总统是为了“大幅减薪”。哎呀唔啱分啲畀我呀嘛。
睇睇个访问，原来特朗普都几有幽默感。仲畀主持人整乱佢宝贵嘅头发。
当选即示威 特朗普好头痕
特朗普系节目上面仲话，自己最擅长“把不同的人带到一起”，真系好似梁特话“无唐营无梁营只有香港营”咁呀。望住全美国周围都示威，飞云突然觉得特朗普真系好了解自己，本身三唔识七嘅人都聚埋一齐——示威。哇，呢个故事虽然讲唔出咩大道理，但真系，好有亲切感。