【每逢大事讲故事】普京亲身示范 君子报仇如何廿年未晚
刚过去嘅2016，呢个世界发生左好多大事，要数依家国际政坛边个最威威？飞云就话系普京是也。飞云唔系认同普京以独裁方式打压反对人士，不过觉得呢个世界，点都需要有个人同美帝抗衡一下。
由特朗普当选美国总统两个月以嚟，美俄之间嘅口水战都未停过，现届民主党政府继续指控系俄罗斯政府主使黑客影响大选，特朗普就懒理，同普京越行越近，任命一个史上罕见嘅亲俄内阁班底。唔理你觉得黑客攻击系边个做，其实普京为咗重振俄罗斯声威，根本部署咗好多年喇。
自冷战结束，苏联瓦解之后，俄罗斯喺世界嘅角色一直都处喺美国下风，超级大国只有美国。特朗普做总统对于全世界黎讲都太意外，不过对于一个人，或者系佢盘算之内，佢就系普京。忍辱负重20年，其实普京一直都密谋等候反击机会，依家机会嚟喇，唔只出现一个亲俄的美国政府，仲要唔妥好耐嘅克林顿夫妇，一铺归还！
要讲普京同美国之间恩怨，不如先讲番大约20年前嘅一个月黑风高嘅晚上。一个肥嘟嘟、白雪雪嘅醉酒佬，喺白宫附近一条暗暗嘅街上想截的士去食Pizza。佢身上净系著住底裤，不停呼唤“Pizza!Pizza!”
NO! 唔系讲麦兜呀，飞云讲紧嘅系俄罗斯时任总统叶利钦。呢单瘀事本来无人知，多得佢嘅美国好拍档克林顿爆左俾自传作家知，出埋书，呢件事先可以流传万世。
其实呢，克林顿同叶生真系几friend，呢件瘀事都帮佢收埋左成十年先讲出黎。叶生爱饮酒，发酒瘟实情全世界都知，连喺公开场合都可以讲嘢讲到饮醉咁，你睇克林顿比佢搞到笑到喊。“我觉得你真系好funny啰！”
美国同俄罗斯领导人可以friend到咁，真系好罕见，好罕见！当时嘅苏联刚刚瓦解，俄罗斯经济非常衰弱，军队崩溃，成个国家一片混乱，叶利钦好希望同美国佬搞好关系，正正式式为冷战画上句点，美俄可谓步入蜜月期。
呢对兄弟当然讲好数，克林顿想同俄罗斯建立稳定外交，叶利钦当然要美国“放水”以免俄罗斯经济彻底崩溃。克林顿提出想扩充北约到东欧国家，叶利钦无反对，甚至讲到终有一日俄罗斯都要加入北约。
相关文章：普京特朗普齐称强化核能力 美俄将出现新一轮军备竞赛？
俄罗斯要认美国做大佬，有个人觉得好羞家，呢个系普京了。普京虽然系叶利钦嘅钦点接班人，但呢位Cool到爆净系同老虎玩嘅KGB前特工，又点会好似你咁喺全世界面前扭黎扭去，丢人现眼？
对住呢位自由派总统，一大班KGB前特工都唔知好嬲定好笑，铁汉普京相信更加无眼睇。
【专页：新闻讲故事】国际大事一看就懂：最易入口的新闻！趣味养份兼备
揸颈就命，呢四只字就最能够形容90年代嘅俄罗斯。普京认为冷战结束后，国家受尽屈辱，叶利钦同克林顿嘅所谓友情，根本就系任对方话事，俄罗斯只可以say yes，亦都代表俄罗斯名正言顺系冷战嘅“战败国”。就同叶利钦一样，俄罗斯由政治巨人变成一个丢架嘅醉酒佬。
仲记唔记得休克式疗法？呢个简直系美国搅死其他国家嘅其中一个杀手锏。当年苏联崩塌，由共产主义底下嘅经济体系要转营到资本主义，过程非常痛苦。美国见状，就话咁不如学吓我地啦。于是派咗队经济专家去俄罗斯教路，游说叶利钦进行休克式疗法，由共产走到资本主义之路“唔使急，但最紧要快。”
克林顿1992年上场，继续要俄罗斯休克。对于本身社会经济极度虚弱嘅俄罗斯，要短时间内将所有土地、公营企业私有化，取消大部分补贴资助，点会唔出现“手术好成功，不过病人死咗”嘅结果吖。经济状况唔单止无好转，通胀飙到2500%，国民收入暴跌，而且仲催生一班令俄罗斯腐败嘅寡头政治家。
相反美国就攞晒彩，喺克林顿嘅领导下成为全世界唯一一个超级大国，北约东扩，介入巴尔干半岛，轰炸南斯拉夫。嗱嗱嗱好喇㖞，真系踩到过黎前苏联势力范围，仲成日话要帮俄罗斯重建经济，建立民主。呢个理想如果成功嘅话都真系好伟大，弊在事实系最后搞到一镬粥。叶利钦仲要同克林顿咁friend，据说，克林顿更曾经赞叶利钦：“系你个肚腩内有团真正属于民主同改革者嘅火，不过我唔肯定普京都系咁。”
个国家比人搞到咁，普京BB看在眼内真系火都嚟埋，个心真系好痛好痛。
相关新闻：普京蔗渣价钱造出烧鹅味道 俄罗斯2016年国际影响力大丰收
古有越王勾践卧薪尝胆，今有普京静候反扑机会20年。叶利钦嘅时代好快就结束，受军方反对，加上多次心脏病发，喺1999年除夕辞职。凭住车臣反恐战建功嘅普京喺翌年三月大选胜出，不过佢冇直接单挑美国，毕竟俄罗斯当时都系太虚弱。佢同时任美国总统小布什，起初都算友好，喺美国发生九一一恐袭之后，普京系第一个打电话问候小布什嘅国家领袖，Sweet到呢。小布什直头话过，我喺普京嘅眼睛感受到佢嘅灵魂！
原文系："I looked the man in the eye. I found him very straight-forward and trustworthy – I was able to get a sense of his soul." 哗，真系深情过Shakespeare㖞！
不过呢句说话好快就成为咗历史笑话，连苏珊赖斯都耻笑佢：“够无知先会信普京”。小布什隔左好多年之后讲番呢段关系都酸溜溜，话普京当年见到佢只爱犬Barney，居然笑佢：“你真系叫呢只嘢做狗？”第二年到小布什见到普京只狗，普京居然再踩多脚：“大只、强壮、快过Barney。”
呢番说话真系伤透小布什个心，卸任总统后转行做画家嘅小布什，多年后画咗一幅普京肖像，画嘅时候心入面都仲系谂紧普京点样话佢只狗。
“讲得出‘我只狗大只过你𠮶只’这句话的人有很有趣的性格。这幅画反映了出来”系小布什画笔下，普京眼神空洞，面无表情。
【专页：新闻讲故事】国际大事一看就懂：最易入口的新闻！趣味养份兼备
好喇㖞，正所谓祸不及妻儿，你连我只狗都要侮辱？呢单嘢，小布什真系记到今时今日，早两年仲讲紧，真系耿耿于怀从前的爱~ 上年布什细佬杰布选总统，都被问及点睇普京，佢就话：“佢系恶霸。我觉得普京变咗。人系会变架，佢就系例子喇。”如果佢当选美国总统，一定会强硬应付呢个恶霸。（可惜你都选唔到）
呢对soul mate好快就唔骚对方，美俄关系喺2008年又出现一个爆发点。如果大家仲记得当年夏天俄罗斯出兵格鲁吉亚。普京就认为系小布什政府煽动格鲁吉亚亲西方政府打呢一场杖，佢当时咁讲：“美国有人试图制造冲突，喺总统大选中造就某位候选人。”
咦！呢句嘢听落真系似曾相识，查实佢当时指嘅就系共和党嘅麦凯恩，布什政府挑起“新冷战氛围”就系为左帮佢助选。讲咩都系假，普京嘅愤怒根本一早已经积积埋埋，喺奥巴马上台嘅时候，美俄已经处于一种敌意状态。负责外交嘅仲要人系克林顿个老婆希拉里，希拉里呀希拉里，其实你知唔知自己点解选总统连特朗普都争唔嬴？因为你一早已经得罪左人。
我地又返到1994年，当时身位第一夫人嘅希拉里陪老公第一次访问俄罗斯，叶利钦有一次晚饭时同希拉里讲，office里面有张佢嘅相，日日都望住。哗，真系听到都毛管戙，不过咁就证明希拉里有几Charm。
可惜...家下话事嘅系普京唔系叶利钦，普京对希拉里嘅态度啱啱相反，奥巴马想同俄罗斯关系回暖，但喺普京眼中，希拉里根本同佢老公一样咁aggressive。不过希拉里，又何尝欢喜过你普京呢？佢连人地个心腹梅德韦杰夫（Dmitry Medvedev）个名都唔识读，当众话：“梅德...er..whatever”。（心底里飞云其实唔怪Hillary，尤其睇极YouTube都系读唔到）
2008年仲系参议员嘅佢，仲要抽番小布什嘅“灵魂论”串普京：“特工嘅定义应该系no soul”。之后佢支持2003年美国入侵伊拉克，2011年军事介入利比亚，已经足以令普京坐立不安。而且奥巴马同希拉里一样支持扩充北约，仲好大声话“欢迎新会员加入”。其实普京明白北约扩充，根本唔会威胁到俄罗斯安全，不过伤害到一班政治精英嘅民族自尊事大。
而真真正正令普京觉得希拉里系威胁嘅，其实只系五年前。2011年，俄罗斯国内爆发连场反普京示威，示威者话普京喺国会选举造马。咁大个人，普京bb都未试过比人指住个鼻闹“你系贼”，“滚出俄罗斯”。掌权十年，第一次觉得自己受到咁大威胁，呢个时候Secretary Clinton仲要煽风点火，唔单止对示威者表示支持，更加对𠮶时就快举行嘅国会选举表达关注，仲好grand咁话：“美国支持俄罗斯人嘅权利同意愿。”哈，你话普京会有咩反应？
或者只系有心人装无心人，希拉里可能只系耍下官腔，但普京真嬲猪，觉得佢喺度煽动示威，干预俄罗斯内政，火上加油，甚至想乘机推翻佢。就连希拉里本人同俄罗斯嘅政治专家都话，普京系坚嬲!!! 佢眼中美国国务院，简直仲邪恶过冷战时期嘅CIA。
克林顿系叶利钦时代，尝试将俄罗斯诱导去美国认为系正途嘅方向，以市场主导嘅经济政策同埋以西方自由民主价值为重心嘅政治体制。系希拉里麾下嘅美国国务院，亦都成日批评俄罗斯嘅选举有几唔自由唔民主，普京旧年被问到点睇希拉里选总统时，就话“正如俄罗斯人话齌，两公婆一担担”（As we say, husband and wife are the same Satan.），深深的牙齿印显露无遗。
对敌人不忍，就系对自己残忍，呢句说话或者无讲错，普京唔单只无被推翻，仲要2012年再当选总统。当时嘅普京bb已经立心反击，不过奥巴马政府似乎未feel到，仲淡淡定咁，取笑认为俄罗斯系“地缘政治上最大敌人”嘅罗姆尼叔叔好out，话“你呢啲思想仲留喺80年代，冷战已经over左20年喇！”
相关文章：奥巴马助希拉里为败选卸责？“秋后算帐”激发美国政治内斗
奥巴马，你也实在太年轻了。普京的确无放弃过佢嘅复仇大计，聪明嘅佢仲识转移视线，近年喺国外动作多多，都系为遮盖国内嘅问题。乌克兰要选个亲西方政府，佢就当机立断攞返克里米亚；叙利亚内战等你啲反抗军虚耗得七七八八，就索性派俄军入去打，守住叙利亚呢个中东最重要嘅盟友。
之后个故事点发展落去，大家都好清楚。民主党话被俄罗斯政府hack，连特朗普意外赢左大选，都话系俄罗斯黑客搞鬼。美国迎来一个历无前例咁亲俄嘅特朗普政府，大家都见普京有几开心，克林顿两公婆今次仲要一铺玩完，对美国政坛延续20年嘅影响力告终。
无论你依家点指摘俄罗斯影响大选结果，都已经阻止唔到特朗普做总统呢个现实。
克林顿当日笑叶利钦笑到肚都挛，可惜笑到最后不是你喔。
【专页：新闻讲故事】国际大事一看就懂：最易入口的新闻！趣味养份兼备