【每逢大事讲故事】由special relationship变it's complicated！

国际关系看似错综复杂风云诡谲，其实如果将人物关系套入大家熟悉圈子入面，其实唔难。回带少少回到校园时，假设你读一间国际学校，同学仔来自五湖四海，通常你会同坐得近啲或者同声同气的人Friend啲，甚至自组党派，维护“自己人”利益，对外人虾虾霸霸。好喇有一日，你突然要离开呢个组织，“被杯葛”就系梗局，喺呢个时候，有个超级有钱阿爸又系校董嘅同学杀出嚟，仲同你讲：“我哋关系好特别”！哗，比着系你，都唔理三七廿一黐咗埋去先讲啦下话，点理得佢唔靓仔口臭兼无品呢。
飞云讲紧嘅，咪就系啱啱去完白宫，同女人公敌侵侵拖晒手仲衬埋衫嘅英国首相特雷莎·梅（Theresa May）啰！阿May姐上位之后只有一个任务，就系处理脱欧（Brexit）问题，虽然任务只得一个，但呢只熨手山芋可谓非常十分极之棘手，一个唔该立即人头落地，就系咁，佢唯有连侵侵呢件人神共愤嘅华盛顿狼人都要顶啰。

特朗普当选美国总统后，动作多多，其中一件事就系打电话邀请May姐到白宫。佢肉麻地叫阿May做“我的玛姬”（My Maggie），将两人关系跟前美国总统列根与英国首相戴卓尔夫人嘅深厚情谊相提并论，列根会亲切地叫戴卓尔夫人的小名Maggie，侵侵似乎想有样学样。

侵侵打电话比May姐果阵，会唔会学Leon咁讲：“阿May，你点呀？”

讲佢就天下无敌，做起嘢上嚟又点？咪就系出事啰！势估唔到，唔单止香港果位老翻“白宫发言人”成日开口夹着脷，正牌白宫办公厅一样撞板，都唔知边个克边个。英国首相到访，发出来份新闻稿连May姐个名都串错，成篇都将特雷莎·梅个名Theresa May，串错咗做Teresa May。

好衰唔衰，原来Teresa May真有其人，系一位已退休的英国脱星。𤓓到一个点，做咩都无用，咪疯狂被人在Twitter串啰。见微知著，侵侵同佢班白宫手足有几重视佢今趟到访，May姐唔使飞云讲都心里有数吧。

为咗同侵侵呢个大财主同学打好关系，呢啲咁无礼嘅嘢唯有扮睇唔到，仲专程“精心挑选”咗一份礼物送比侵侵，到底系咩呢？登灯瞪凳，咪就系香港人交换礼物时最唔想收到第一位嘅杯啰。唔好闹住，May姐送呢只并唔系普通水杯，而系一只苏格兰传统象征友谊的双耳小酒杯Quaich（读音为Quake）。一来强调双方友谊，二来侵侵有位来自苏格兰的妈妈，呢份礼物都算几有心思㗎喇。

点解咁讲？因为May姐送比特朗太梅拉尼娅个礼物篮，更加无厘头，里面有苹果汁、果酱、手打饼干和杏仁果酱馅饼（Bakewell Tarts）等清一式英式食品，啱唔啱口味系其次，可能纯粹飞云心邪，但呢个果酱挞横睇掂睇点解都好似影射紧曾经拍裸照嘅梅拉尼娅咁嘅？

政治Bromance始祖：罗斯福+邱吉尔

查实美国同英国好像总是形影不离，常常公开强调佢哋In a “Special Relationship”，表面睇，系因为根源上两国同文同种，实际上梗系出于现实需要啦。不如回到那动人时光睇睇：二战期间，罗斯福同邱吉尔成功合力对抗纳粹，公事以外，佢哋早在二战前已相识多年，最初关系麻麻，点知搭落有味，越来越老友，发展出一段兄弟情（Bromance），二战期间互发近2,000封书信，共处130多天，不时在罗斯福位于纽约海德公园的住所一起喝威士忌，罗斯福间中又被邱吉尔拉去摩洛哥度假。邱吉尔其后承认：“我会深入研究罗斯福每一个细微思想转变，没有任何恋人会像我这样研究他的情妇。”（No lover ever studied every whim of his mistress as I did those of President Roosevelt），元祖Hehe真系唔系浪得虚名。

二人的Bromance古仔层出不穷，最搞笑的莫过于某次邱吉尔在白宫过夜，半夜罗斯福忽发奇想要第一时间告诉对方，叫助手推他到首相的房间，点知轮椅去到邱吉尔间房，看到刚刚出浴的邱吉尔一丝不挂，罗斯福尴尬得想掉头走，邱吉尔却坦荡荡地说：“大英帝国的首相没有任何东西要对美国总统隐瞒哦。”

因二战关系，罗斯福前无古人、后无来者咁做左4次总统，于是佢特别在1945年2月举行嘅雅尔达会议（Yalta Conference）中，将庆祝他第四次就职典礼的纪念金牌，送咗一个畀邱吉尔，唔啱倾还唔啱倾，有份打纳粹嘅史达林，佢同样有送呢个金牌，真系敌人的敌人就系朋友。

可惜罗斯福两个月后便离世，令呢段波澜壮阔的兄弟情告一段落。他们没有及时许下任何诺言，可是边一个人可以否定呢段感人至深嘅关系？正因为咁，就算美国总统换成杜鲁门，已离开唐宁街10号、以平民身份1946年在美国发表演说的邱吉尔，仍要强调英美两国有着“特殊关系”（Special Relationship），卸下相位依然要为英国揽实美国呢个有钱同学，从此成为双方领袖的祝福与包袱。

政治Soulmate：列根+戴卓尔夫人

到冷战时代，英美有着苏联呢个共同敌人，加上同样坚信自由经济主义，令列根同戴卓尔夫人Friend过打Band，由1975年首次会面起一挞即着，曾为戴卓尔夫人撰写自传的资深记者Nicholas Wapshott称：“他们几乎在所有事情持相同意见，甚至令对方想法更完整。”呢只仲唔系苏眉？Sor，应该系Soulmate至啱。

至1981年列根就任总统后二人首次官式会面，戴卓尔夫人已经讲：“你嘅问题即系我嘅问题，当你需要朋友嘅时候，有我们在”，非常豪气，而且“铁娘子”言出必行，后来列根受美国政府秘密向伊朗出售武器的“伊朗门”事件备受批评，她立即飞到他身边，还独排众议公开露面力撑老友，令列根政府上下感激不已。

政治上纵偶有分歧，但大体上两人老友鬼鬼合作无间，出亲记者会仲会夹埋Dress Code衬到绝，互送礼物当然啱心水得多啦。咁啱得咁桥，戴卓尔伉俪送给列根其中一份礼物，又系杯。这对银杯外面，一只刻有代表列根名字Ronald的“R”，另一只刻有代表列根太太南茜的“N”，里面分别刻有“玛嘉烈及丹尼士戴卓尔敬赠”（With love from Margaret and Denis Thatcher）。列根遗孀南茜去年逝世后，呢对杯被拿到佳士得拍卖，估值1,000至2,000美元，结果成交价去到5.2万美元，高咗几十倍，可见收藏家也认为呢段特殊关系“有得炒”。

牛津Buddy：克林顿+贝理雅

同样在70年代读过牛津嘅克林顿同贝理雅，都是二战后出世，在类似社会背景下成长，又系天生啱嘴型。两人之间任期只有四年时间重叠，但很快便一拍即合，叫对方做老友（bud, mate），当克仔知道贝理雅太太彭雪玲怀孕后，叫贝理雅做“嗲哋”，自动请缨可以帮手凑仔，还分享疑似有味笑话。

话说某次克仔打电话给贝理雅，劈头便说：“我的伙记要我拿着香蕉才让我打电话给你，所以我现在拿着一只又大又丑陋的啡色香蕉，坐在这里。”

小布什：Yo，我哋用高露洁牙膏！

克仔无论有多好，对渴望出战伊拉克的贝理雅嚟讲，小布什才是亲密政治盟友。两人首次会面后开记招，互相吹捧一轮之后，有记者问到两人有何亲密联系，小布什竟然答：“我哋都系用高露洁牙膏”，向来转数高嘅贝理雅随即还击：“乔治，现在他们会好奇你为何会知道”，令幻想空间无限扩大。

不过克仔又好，牛仔小布什又好，贝理雅在二人身边，总似是随从多过朋友。因为英美国力越来越悬殊，贝理雅紧紧跟随美国的政策，令他得到“跟尾狗”这类不光彩称号，而他跟随小布什联手出兵伊拉克，亦让他蒙上政治污点。

奥巴马冷对白高敦

奥巴马在重大金融危机中上场，首要任务系处理国内经济乱局，完全唔得闲同英国再搞乜鬼特殊关系。想当年白高敦去见奥巴马，费尽心思挑选礼物──用咗成万英镑买一件由维多利亚年代反黑奴英国皇家军舰格纳号（HMS Gannet）船身木材制造的笔座，正好与白宫办公厅来自该舰艇姊妹船的橡木圆桌配成一对，又可以向身为黑人的奥巴马示好，另附上全套邱吉尔自传，提示英美两国的特殊关系，可惜……

充满受害者气质嘅佢，收到嘅回礼惨不忍睹。你估都估唔到，奥巴马系送左一套有25只美国经典电影DVD盒装比白高敦，包括《ET》、《绿野仙踪》，衰到好似喺白宫精品店求其拣件咁，一啲诚意都无，而且套DVD嘅格式，喺英国系播唔到嘅。去到呢度，唔需要系明眼人都Feel到呢段曾经特殊嘅关系已经无乜特别。

当女权分子遇上女人公敌

讲咗咁耐，只系想讲，英美之间，无论元首私底下几friend都好，大家始终利字当头，以本国利益行先，令佢哋嘅special relationship硬系增添一份it’s complicated说来话长一言难尽嘅复杂意味，唔通你估真系好似白花油王子咁，唱句歌仔就：“来简约地　爱多80年　态度未曾改变”咩。所以May姐呢位出晒名嘅女权分子，同不断侮辱女性嘅女人公敌侵侵，两个思想上大缆都扯唔埋嘅两个人，都可以坐埋一台倾生意。

英国势被欧盟国家Unfriend，友情告急嘅阿May喺圣诞节后经已寄咗封信畀侵侵，并附上日本偷袭珍珠港后邱吉尔向美国人打气嘅演辞副本。侵侵立即心领神会，对外宣布让英美回复昔日的特殊关系（Special Relationship），最初提出英美Special Relationship嘅，咪就系前面提过嘅邱吉尔啰。 呢啲恋人级数嘅眉来眼去，唔系人人顶得顺。侵侵摆明车马当美国系盘生意咁做，阿May讲明英国向来系商人国家，姣婆遇着脂粉客，单刁倾成只系时间问题。

做开生意嘅侵侵，清楚知道阿May需要啲咩，讲明会尽早跟英国签定“又快又公平”嘅贸易协议，仲话佢阿妈系苏格兰人，非常崇拜英女皇，又让阿May成为自己入主白宫后首位到访外国元首，面子里子畀到足。

两人见记者时，May姐专登以红色套装衬侵侵条红领带，经过白宫走廊时还因为一条“看不见的障碍物”拖了一下手。好像生怕侵侵会乱说话的，记者会只有短短18分钟。面对呢位永远不按牌理出牌的有钱同学，可怜May姐不断帮侵侵重申美国支持北约、反对俄罗斯霸权、共同拥抱自由价值观云云，自恋嘅侵侵一于少理，只顾将同阿May共晋午餐的餐单递给助手，吩咐佢“好好保管住，我曾跟英国首相共晋午餐”，好似啲人拍拖要将戏飞keep起来咁，睇嚟呢4年有排佢玩集邮。

无办法，为咗同国民证明，无咗欧盟，英国一样唔使惊，仲有只鹰喺大厅！为咗美国呢位财大气粗嘅同学，阿May唯有蚀底啲忍辱负重同侵侵扮Friend子。阿May有咗美国呢件秘密武器，拆Brexit呢粒炸弹会得心应手好多，至于咁大份礼鲠唔鲠得落，定系会被侵侵呢只狼鲠返转头，真系要密切留意下回分解喇。