【每逢大事讲故事】朱克伯格同志如何领导Facebook翻过万里长城
Facebook连续14个季度都业绩增长，但有分析就指，2017年Facebook广告市场将会饱和，营利增长会开始放缓⋯⋯哗，一听到呢啲字眼，飞云头就好痛，简单啲嚟讲，即系呢个井已经比我抽干啦，惟有掘个新井啦！
但Mark Zuckerberg朱克伯格（飞云睇住佢结婚生仔，叫声朱仔好有亲切感）身为社交媒体龙头企业揸Fit人，又点会甘心于掘井呢？要掘，就梗系掘金啦！
中国市场就好似一个未开发哂嘅矿坑咁，点解系“哂”？你明知入面有金掘，但问题系你交咗申请表未先？队尾喺黑龙江呀，Twitter都排紧队，你识普通话就打到尖咩？来来来，让领导先排！外国企业想分一杯“金”，就必须有所觉悟。
若要成功 必先自宫
想打入中国市场，Facebook就一定要加入中国色彩，Linkedin，微软Xbox live都系咁。少年，你睇吓Uber，一开始信誓旦旦要打入中国市场，同中国本地Call车公司滴滴出行斗烧钱斗到最后，都系卖咗中国业务比人，喺中国，系冇过江龙呢回事㗎。
中国官媒《北京日报》明言：“互联网已经成为今天意识形态斗争的主战场。”战场上，又岂会容许你妖言惑众？
至于令中国唔侵Facebook同Twitter等外国势力社交平台玩嘅原因系，2009年新疆七五事件中有疆独分子用Facebook作为联络平台，Facebook简直系颠覆国家嘅同党添啦。
此后朱仔就一直努力不懈想翻过呢个“网络长城”（Great Fire Wall），包括学习号称成年后最难学成语言之一嘅中文，同埋系天安门呼吸住充满中国特色嘅新鲜空气跑步，连中国网民都表示：“不要命了，作为土著我都不敢在外面多呼吸。这吸惯了洋空气，在这里跑步，不怕中毒？”中国特色嘅钱，用条命赚返嚟㗎阴功。
北京上访之旅
2009年被封锁后，2010年朱仔记马上到访中国“度假”。大企业家放假又点同我哋呢啲废青净系识饮饮食食，要饮，都要同领导饮！当地仲只得26岁嘅小朱，就同新浪、百度同埋中国移动嘅CEO饮杯茶食个包，倾吓对中国互联网事业嘅发展大计。不过就真系做死啲传媒，种种猜测一波未平一波又起，一时话Facebook会比百度收购，一时又话同人人网（可视为中国版Facebook，喺中国梗系咩都有中国版啦）正面对决，讲嚟讲去原来咩都得个桔。
再战北京
2012年，朱仔强势回归中国！而今次仲有陈慧娴陪住佢添。吓？？？陈慧娴？全因佢位华裔老婆（当年仲系女友）Priscilla Chan咁啱同歌手陈慧娴同名，搞到有洋人以为此Priscilla即彼Priscilla！朱太同陈慧娴个面相都相距甚远㖞师兄。
咁不如又扯开话题一讲讲呀朱太先？
朱太嘅父母系越南籍华人，原本来自中国，但喺越南住过一段时间，再以难民身分申请到美国。父母经营一间中国餐厅而日夜操劳，所以Priscilla同2个细妹都系由祖父母凑大。朱太年纪轻轻已经非常有大志，希望入读最高学府哈佛，高中校刊更以“级际天才”形容佢。最后Priscilla如愿以偿考入哈佛，更邂逅咗未来老公朱克伯格。毕业后更进修攞多一个儿科医学Degree。
Priscilla为人非常低调，甚少以个人身分接受访问或出席公开场合，除非系宣传佢同老公合办嘅慈善基金。而据闻佢为人都相当悭家，一次佢同姑仔Randi行街，睇中一对600美金（4680港币）嘅鞋，姑仔就叫佢买啦，你有的是钱。但朱太好有咁话：“又唔系我啲钱。”你话天下间嘅女人都系咁就好。
但今次朱仔似乎都系视察吓民情，进修吓普通话。讲起朱仔嘅普通话就真系不得了，佢先后两次到访清华大学以普通话演讲，虽然佢啲普通话就真系普通啲，但咁有毅力，又咁有诚意，都为佢嘅亲中形象加咗唔少分。
进击的小朱
15年10月习近平夫妇访美晚宴上，朱氏夫妇都在场，朱太就亦都确认咗腹中块肉系BB女，咁不如揾习大大贺一贺佢啦？
朱仔：“我姓朱，老婆就生得，改咩名好？”（设计对白，真实意图）
习大大可能心谂，我第一次见你，就要我帮你个女改名，下次见你会唔会话想嫁埋个女入我屋企㗎⋯⋯所以就好委婉咁话，责任太重大啦，都系亲生老豆改好啲嘅。
唔紧要，朱仔再接再厉，马上上Facebook打个靓卡：“今次系我首次同一个国家级领导人对话时，完全使用外语。对我嚟讲系一个好有意义嘅里程碑。好有荣幸同习大大及其他领导人会面。”呢段说话勾起咗飞云嘅小学回忆，好似去完参观科学馆之后写果段后感呀。
除咗呢次著名朱习会面之外，朱仔16年3月仲亲自飞去北京，同中共中央政治局常委刘云山会面，表示Facebook“愿更好了解中国、介绍中国，与中国同行一道，通过互联网创造更加美好的世界”。
至于曾任中共中央宣传部部长嘅刘同志都费事啋佢，直接背返习大大关于互联网治理嘅“四项原则”同“五点主张”，并称中国的互联网在20多年的发展后，“走出了一条具有中国特色的发展治理之路”。（飞云以为自己转咗去做人民日报）
朱同志同刘同志会面之后，表示“高度评价”中国互联网发展，更加表希望同政府合作，共创美好网络世界咁话。
3个月散货场式许可
2015年年尾小朱终于孝感动天（简称朱孝天，哈哈），成功令中国政府出咗张为期3个月嘅许可证比Facebook喺北京开Office。3个月，你估散货场咩，都唔知系算唔算得上系绿灯。Facebook表示曾经考虑过3个月都搏一搏，话唔定单车可以变摩托，但最后都系不了了之。
尤其而家中国市场已经由微信、QQ、微博等瓜分天下，Facebook要分一杯羹唔单止要Follow the Great rules，仲要以卵击石，Google前任中国主管李开复都指，Facebook要喺中国翻身机会缈茫。但朱仔对中国嘅坚持系非比寻常，坚称中国市场对Facebook未来发展非常重要：“你唔可以以连接全世界嘅人为己任之余，漏咗最多人嘅国家。”跨越呢个防火长城，似乎事在必行。
Google：我唔玩啦！！！你哋玩哂佢啦！！！（GIPHY）
防火墙系用黎防火嘛，你个facebook咪就系火啰
有人话，中国就系外国IT企业嘅擂台。付出嘅唔止系成本、创新，仲有“西方核心价值”之一－－言论自由。国际网络巨头Google、Yahoo（RIP）、微软，无一不屈服过，Yahoo向中国政府交出革命人士个人资料而令被捕入狱，Google过滤过政府敏感嘅搜寻结果，微软删除记者博客。当中企得最硬嘅可谓系Google，2010年高调撒出中国，公开发炮指中国网络审查问题严重，而且网络安全有问题。
其实Facebook都唔系想像中死牛一边颈嘅，例如巴基斯坦，俄罗斯同土耳其版嘅Facebook都有同当地政府合作，整咗个过滤版嘅Facebook出嚟，逢系某啲敏感议题一见就Block，就喺2015年7月到12月期间，Facebook就Block咗20个国家嘅5.5万个内容，但而家中国要求嘅系未出发先兴奋，敏感内容要出现之前就扼杀佢！
有Facebook匿名员工表示，Facebook有考虑外判审查过程比第三方软体件，明白嘅，富有中国特色嘅审查标准最好都系交返比中国人嚟做，你说对不对？Facebook嘅合作伙伴将会系一间中国公司，直接监察热门Status，呢间中国公司将会全权掌管监控权，可以定有咩post可以出现喺你个wall，有咩post需要“被河蟹”。咦？咁不如同微博炒埋一碟，叫微书算啦。
呢个方法都系盛传嘅其中一个打入中国市场嘅节衷方法姐，你估朱仔唔惊“西方价值”毁于一旦呀？其实而家Facebook都有赚紧人仔，就系透过香港Office帮中国公司卖广告，但无可否认嘅系，Facebook若要真正打开呢个6亿网络使用者嘅金矿，难以避免要做一啲取舍。
朱仔嘅“中国梦”受到多方打压，但佢依然努力去追，到底最后朱仔做唔做到朱总呢？放长双眼睇下佢翻唔翻得过呢条万里长城长又长啦。