【每逢大事讲故事】非常外父拣女婿 边个先系白宫幕后玩家？
为大家说个可歌可泣、相依为命、争权逐利，兼有俊男美女的故事……之前，飞云要郑重宣布一个消息：过埋星期五，特朗普为正式成为美国总统。
美国总统特朗普，真系讲起都唔惯。美国人好愁之余，我谂特朗普都好愁。当选当日，助选团队有人欢呼，有人拍掌，惟独特先生一脸愁容，挠晒头咁，双目无神。咁又系，70岁人先黎“跳出comfort zone”转行系头痕啲，如果后生一半呢……咦特朗普正正有呢个选择㖞。
话说特朗普有个靓仔女婿叫Jared库什纳，今年35岁，志愿系成为外父背后的男人，早排亦都如愿以偿，被特朗普任命为白宫高级顾问。其实系竞选期间，特朗普的幕僚已经当正驸马爷系大佬，咩都要先过佢果关。而特朗普当选后，无论是拜访白宫还是会见日本首相安倍晋三，都把Jared带在身边，所以今次任命都不叫人意外。嗱睇吓，特朗普个女同佢老公，同安倍都几啱倾㗎……
由特朗普大楼金碧辉煌的土豪金设计，到靓到发光的大女Ivanka，连拣个女婿，都系靓仔过人嘅青年才俊。特朗普呢家人，真系闪到你盲。
Jared同特朗普一样，有个地产大亨老窦，年少就接手家族生意，而且一接手就将公司由新泽西地头虫，转型为曼哈顿地产新贵。有生意头脑，年少有为，俨如后生版特朗普，连美国媒体间唔时都会用特朗普mini-me嚟形容Jared，外父自然觉得好有亲切感啦。Paypal创办人、特朗普嘅重磅支持者Peter Thiel就形容：“如果特朗普系CEO，Jared就系COO（营运总监）。”
成为被选中嘅细路，断估都唔系因为靓仔咁简单，亦恐怕唔系上帝嘅意思。Jared管理嘅竞选计划并唔简单，当希拉里倚重传统媒体，特朗普就同Jared就当呢次竞选系一场生意，Jared在欠缺资源嘅情况下大打逆境战，以数据分析精准针对听众宣传，最终不单止赢咗，仲改变埋大选生态。
Jared唔只捞地产，仲要搞媒体。人哋就发财立品，而家时兴系发财开媒体。Jared 2006年收购埋周报《纽约观察家》，做传媒老板。Jared仲要同啲编辑相处唔多好，收购之后，总编转完又转，其中一个编辑话：“他其实好鬼憎记者同传媒，真心。”
众所周知啦，做传媒唔通贪卖纸赚钱咩，Jared得到最大嘅回报就系纽约五光十色嘅社交生活，仲同传媒大亨梅铎做埋好朋友。正所谓“发达升官娶老婆”，Jared就跳步先娶靓老婆。Ivanka同Jared系朋友介绍下认识，一见钟情，本来只系打算做生意，做做吓变做人世，Ivanka仲跟老公信埋犹太教，终于系2009年共谐连理。
之但系，阿妈教落咩呢，正所谓靓仔无本心，虽然阿妈当年可能只为鼓励飞云，但我都信世事无可能咁完美嘅！呢个风光驸马爷都一样有啲黑暗面。Jared系哈佛毕业嘅尖子，但有传媒踢爆当年原来佢成绩唔好，但佢阿爸捐左一大笔钱畀哈佛，就咁啱，唔知点解，忽然间，佢就入到哈佛了。真系唔止买楼要识投胎，入名校都一样啫。有同学仔仲话Jared读书果时好炫富，校园入面都要揸架Range Rover周围走。
而Jared阿爸虽则话系地产大亨，但就好小气。佢啲员工爆料话，Jared阿爸好钟意扣粮，“个个星期我哋开会，都要睇一轮帐单……他或者会签，又或者会话，畀四成佢地啦，畀五成佢哋啦。即系，如果可以畀少啲，点解要畀足十成十呢？”
Jared就喺如此教育下长大，到10年前阿爸最终被判入狱。佢罪名就多啰，逃税、非法政治献金、收买证人，仲揾妓女引诱妹夫，拍埋片，企图令亲妹拒绝同政府合作。阿爸入狱后，留畀Jared嘅地产王国有2.5万幢房屋，仲有写字楼、工厦、舖位、土地。又要讲多次，成功靠父干，真系永恒嘅真理。
咁Jared本身系点嘅人呢？佢同外父特朗普好唔同，沉默又专注，而且出名孝顺，仲要系个“老人精”。人哋钟意睇“姊妹淘”，Jared交友就最爱“长辈淘”。
佢读书果时入到兄弟会，点知啲friend party𠮶时佢坐埋一边读书，人哋玩新人会驶人帮手执屋、灌吓酒，佢就叫啲新人返教会；同学仔读书考试玩通宵𠮶时，佢已经喺附近炒楼，仲赚左2000万美元。35岁生日果阵，后生细仔嘅佢，生日会竟然请嚟一班长辈。连席上其他宾客都话，客人年龄中位数睇嚟都有Jared嘅一倍，有成70岁㖞。咦，咁唔怪得佢同外父大人咁啱嘴形喇。
热爱长辈嘅佢，可以想像到家中两老佢都会好爱护。唔知系咪因为顾家得滞，搞到Jared似乎有啲小器。话说新泽西州州长克里斯蒂（Chris Christie）一直都有份帮特朗普筹备竞选活动，系共和党嘅新星。原本特朗普谂住揾克里斯蒂做副总统嘅人选，但就咁啱，唔知点解，忽然间，转咗副总统彭斯顶替。克里斯蒂未有即时离队，大选结束后，特朗普亦想揾佢担任交接团队的主管，但系过一阵又再次被人换咗落嚟。而咁啱得咁跷嘅系，10年前判Jared阿爸入狱嘅就咁啱系克里斯蒂。
但系作为二战种族清洗幸存者嘅孙仔，Jared对住大右派外父的反犹言论，位置似乎有啲尴尬。Jared阿爸本身系民主党金主，而且支持唔少犹太活动。Jared系呢个情况下，点样“华丽转身”呢？好有长辈缘嘅Jared，再一次得到朋友嘅“襄助”，令佢慢慢向右转。Jared同传媒大亨梅铎好friend，一星期会讲几次电话，仲多过飞云沟女。两个人不时会分享吓啲保守派学者著作，讲讲吓政治立场唔多唔少有啲变化，令Jared由中间偏自由派走向保守。
而家Jared坐拥地产王国，都唔够，打算再坐拥真正大国。所以靓仔女婿将公司卖畀细佬后，就进入白宫垂帘听政。但特朗普嘅帘后又点止一个人？系边个，不如听吓前辈点讲：
真正嘅大佬其实系......
话说有一次真系好经典，系特朗普胜出总统大选之后几日，众议院少数派领袖佩洛西（Nancy Pelosi）就打电话畀特朗普，交流一下二人对时政嘅观点。当倾到女性议题果时，本来倾得好哋哋嘅特朗普突然做咗件出人意表嘅事——将个电话队咗畀Ivanka。哇代总统发言㖞！
同老公一样“识投胎”嘅Ivanka，一直深得老窦信赖。作为成功事业女性，Ivanka一直系daddy争取女性票嘅坚实王牌，展现出嚟嘅形象就系：商界女强人、靓袋、靓仔老公、超得意仔女，务求羡慕死人。而且佢好识讲嘢，身为名媛嘅佢，上节目提到daddy嘅出位说话，佢轻松化解：“我谂全人类都经常被自己父母搞到好尴尬。”
识得Ivanka同Jared嘅人话Jared系好钟意计算谋略，而Ivanka就好识睇眉头眼额，而最重要系，佢daddy真系好锡佢。细细个𠮶时，Ivanka小息偷偷地打畀佢阿爸，特朗普系必定会接；大少少做model，daddy更开心，仲四围同人讲自己有份“创造”呢个大美人，非常招积。而家Ivanka有埋自己时装生意，够靓女自己做埋宣传，佢自己咁话：“我哋揾间传媒做访问咪得啰，随时上埋封面，点解要买广告？”
以为佢好似啲名媛咁，得闲绣吓花设计吓时装？系飞云呢啲凡夫俗子先咁谂啫，人哋系做大生意㗎，出身做并购，而家时装生意主要都系借个名畀其他设计师用，自己卖货收入占一成都无。当年阿爸盘生意出事，Ivanka帮手四围扑，飞杜拜、拉斯维加斯搲生意，又睇地盘、帮手宣传营销。所以对特朗普嚟讲，今日嘅江山，系Ivanka有份帮手打返嚟，你话daddy点可能唔锡到㶶。
特朗普竞选𠮶时，Ivanka唔只系花瓶，仲“好打得”，帮阿爸站台演讲，出场仲多过后母Melania。特朗普曾经讲过，如果要拣一个女性入内阁，佢希望果个系Ivanka，哇，搞到王家卫啲对白咁嘅。Ivanka仲同时兼任参谋、说客同宴会搞手。特朗普当选后同死对头戈尔会面，背后推手就正正系Ivanka。而家Ivanka已参与不少特朗普的电话及实体会议，包括与各国元首的对话。
一个独排众议进入白宫，一个名义上无职衔但手握大权。两公婆将会迁入华盛顿，等佢哋可以同daddy再近一啲。两个权力顶峰的人同床共枕，未来美国的权力核心或许唔单止系白宫，亦会喺华盛顿Kalorama区呢间大宅。个情节咁熟嘅，好似子华神都讲过，呢个系一个三位一体嘅宗教团体……阿们……
咁搞法，点止当统治国家生意咁做，直头当家族生意添啦。呢啲故事，睇开TVB嘅香港人好熟啦：后宫干政丫嘛。但姐系咁，对飞云我呢条花生友而言，崔顺实果啲就叫干政，Ivanka呢啲就叫叻女啰。