【每逢大事讲故事】特朗普玩转老朋友 摆耶路撒冷上台只为金主
“边个钟意通处玩？乒乓！乒乓！每分每刻佢都作反！乒乓！乒乓！”好似电影《玩转脑朋友》（Inside Out）咁，不少小朋友脑里面，都住咗一个幻想朋友乒乓（Bing Bong），陪佢上天下海，经历成长。美国总统特朗普侵侵虽然成71岁人，但喺呢个冷酷无情、尔虞我诈嘅政治世界，佢都需要一个好似乒乓咁陪佢去经历、安抚佢寂寞心灵嘅朋友。
侵侵嘅乒乓就系以色列总理内塔尼亚胡（Benjamin Netanyahu）Bibi是也。
侵侵宣布承认耶路撒冷系以色列首都，并会将驻以色列大使馆由特拉维夫搬去耶路撒冷。唔少人话佢系咪痴咗线定冇脑（结论都系个脑有问题），其实佢就系个脑无事，仲谂咗好多嘢先会咁做，而乒乓Bibi亦喺侵侵个脑入面有一定角色㗎。
想知更多Bibi嘅故事，诚邀你睇返飞云前作：
【每逢大事讲故事】哑忍野蛮Bibi八年 奥巴马卸任在即大振夫纲
旧年侵侵走去选总统参政，人哋临老入花丛，侵侵就临老玩转行，一下唔觉意玩大咗当选美国总统。话就话侵侵年纪大，咩风浪未见过，但其实佢喺政治方面真系个零，系一个初哥，宣布当选一刻应该系好怯嘅。
要周旋喺不同国内外嘅政客之间，处理内政外交问题，对70岁嘅侵侵嚟讲真系好痛苦。虽然有一班顾问（aka佢个女、佢女婿、同佢啲生意朋友）傍住，但侵侵都力不从心，每夜倚窗轻叹，低头将无奈透过Twitter诉诸网络世界。
好彩侵侵有个识于微时嘅好朋友、即系乒乓Bibi。时间返到去上世纪80年代，当时两人都30几40岁，正值壮年（即系又话侵侵而家唔后生啫），Bibi系以色列驻联合国大使，经常出席纽约政经场合，识咗侵侵爸爸Fred Trump，而帮爸爸打理地产事业嘅侵侵自然亦同Bibi有来往。
之后几十年，两人都各自努力，侵侵就做咗地产大亨，Bibi就慢慢登上权力高峰。去年当侵侵做咗世界大佬美国总统，已成为以色列总理嘅Bibi当然即刻第一时间恭喜呢位青梅竹马嘅老友啦。美国大选完咗几个钟Bibi就发表声明，恭喜侵侵，话侵侵系“以色列嘅真正朋友”（true friend of the State of Israel），又重提两人之间“认识多年，双方谈话非常真诚热情”。
所谓“爱屋及乌”，Bibi唔单止支持侵侵，仲支持侵侵个女同佢女婿（aka佢班顾问）。今年2月Bibi去白宫会一会老友侵侵（嗱我唔准你哋再话侵侵老呀吓），喺记者会上有个记者唔识死，话当选后美国国内反犹太、种族主义同埋仇外情绪高涨，问侵侵有咩回应。
呢条问题意思系：因为侵侵撑以色列犹太人，令反侵侵人士憎埋以色列犹太人，想问问侵侵点收科。侵侵唔知真傻定假懵，讲到自己几撑犹太人，仲摆佢个女同佢女婿上台，话佢哋同啲乖孙都系信奉犹太教。
Bibi就更加系盲撑，插咀话侵侵女婿库什纳细细个时已经识佢：“佢从来都唔细粒，相反一直都很大，一直都很高。”讲咩身高呀？Bibi又问侵侵：“我可唔可以讲我识咗你几多年？”冇人想知你哋啲旧屎啰！Bibi话已经认识侵侵、佢嘅家人同佢嘅团队太耐，知道无人及侵侵咁撑犹太人及犹太国家。人哋而家就话侵侵撑得太过火㖞！
“边个好似粒笑弹？乒乓！乒乓！每日陪住我去玩！乒乓！乒乓！”乒乓Bibi讲嘢离晒题咁好笑，完全系为咗侵侵，佢对侵侵无条件支持，令侵侵更有勇气实行佢喺大选嘅承诺，就系承认耶路撒冷为以色列首都，同埋搬迁大使馆。
点解侵侵呢个行动系有guts？飞云就唔喺呢度多讲，大概就系侵侵嘅超破格行动，随时搞出一场中东大战。有兴趣嘅读者可以睇吓以下几篇：
关于耶路撒冷有十万个为什么，但5个答案解答晒，抵睇！
点解侵侵今次够晒特别？
【新闻背后】耶路撒冷定位兹事体大 历届总统未迁使馆审慎自有因
侵侵咁做有咩后果？
咁冒险，为咩先？
【耶路撒冷问题】有恃无恐不怕得罪阿拉伯 特朗普用伊朗统战中东
除咗有个做咩都盲撑你嘅朋友乒乓，都要有阿乐咁正面乐观嘅态度先可以令你敢狗冲去做傻事……呀唔系，系（自己认为）勇敢嘅事。
福布斯富豪榜第12名、金沙集团行政总裁艾德森（Sheldon Adelson）身为犹太人，即使面对反犹太势力，多年来无放弃喺美国唱好以色列，够晒乐观积极。以佢嘅身分当然关心美国搬大使馆议题啦，所以当侵侵2016年3月表明自己系“以色列之友”，公开自己上任后会迁馆后，艾德森就变身阿乐，乐观大叫：“今次实无问题喇！”
咁艾德森点支持侵侵呢？虽然话侵侵本身已经系有钱人，唔使任何人支持选举经费，但呢个世界有一种人系好L有钱，艾德森就系其中之一。大选前大约十日，艾德森去咗侵侵屋企密会......咁梗系为咗R sponsor啦，两个麻甩佬仲有咩讲。完咗之后艾德森甜丝丝咁打俾佢个朋友、犹太复国团体美国锡安主义组织主席克莱因（Morton A. Klein），话好开心呀，因为侵侵应承佢优先处理迁使馆议题。
侵侵咁识做，艾德森当然重重有赏。艾德森捐咗2000万美金去一个支持侵侵竞选总统嘅政治组织，另捐150万美金去共和党全国代表大会委员会。艾德森俾侵侵嘅支持就好似吊喺驴仔前面果条红萝卜，系侵侵继续亲以色列路线嘅饵。
到侵侵当选，阿乐艾德森就好想掌控侵侵脑里面总部个控制器，成日同侵侵倾电话，又走去白宫揾侵侵，扭尽六壬就系想侵侵快啲搬使馆。据闻艾德森嘅“烦音”，令侵侵今年5月底任内首次签定迁馆豁免时已经不情不愿，只系佢最宝贝嘅女婿库什纳话唔得，话未同中东穆斯林国家倾到咩，就一嘢抢咗人哋个耶路撒冷，之后实无计倾。
12月第二次限期届满前两个月，正面L艾德森根本等到唔耐烦，钱俾咗成年，人又当选咗，大使馆仍然“得正正”喺特拉维夫，于是又走去白宫食饭兼同侵侵倾心事，今次仲拉埋库什纳；连侵侵最信任、当时白宫首席策略师班农，艾德森都唔放过，催逼佢快啲做嘢。
今次终于连库什纳都支持迁馆，负责中东和平议题嘅库什纳认为，处理中东和平进程，要置诸死地而后生。其实库什纳处理中东议题咁耐，有出现过“进程”咩？佢呢种状况，飞云理解为“反正都搞唔掂咪乱试啰”。
因为正面L阿乐霸住咗侵侵脑总部嘅控制台，所以阿愁阿怒阿惊阿憎就只能靠边站，而侵侵就此决定搬迁大使馆。呢个决定吓亲好多人，所以早喺美国落实搬使馆计划前，各国领袖已争住跑出嚟大叫唔好，同将件事讲俾信任嘅人听；其中包括最惊惊嘅法国总统马克龙。
马克龙同侵侵握手拥抱咩都做齐，侵侵又赞马克龙𠮶位64岁老婆身材保养好好，全世界都以为谂住马克龙同侵侵品味相近，以为佢哋会好倾得埋，点知佢都曾尝试叫侵侵唔好咁做，当然侵侵最后当成个世界都冇到啦，马克龙都继续批评侵侵手法，表示遗憾咁话。
▲马克龙：“怕咗你喇！”（设计对白）
对迁馆最嬲嬲猪梗系巴勒斯坦自治政府主席阿巴斯啦，之前好似讲到以巴和谈成事，结果转个头就郁个耶路撒冷。呢件事亦挑动美国国内穆斯林嘅憎恨情绪，最愁嘅当然系一众巴勒斯坦人，建国梦又漂远咗喇......
飞云之前讲过好多故事，埋嚟睇埋嚟拣：
讲到侵侵咁多考虑，不过可能对于佢嚟讲睇前只有一个问题，就系面子。话咗上台之后要搬大使馆㗎嘛，咁梗系搬啦！唔系块面摆边度？亲以色列支持者，同外国及阿拉伯国家领袖比较，咁梗系fan屎重要啲啦！无fan屎，今日点会喺呢个台呀？多谢我啲fan屎！
值得留意嘅系，Bibi同艾德森其实本身都系老友嚟，不过今年1月Bibi爆出贪污丑闻，其中一项指控系Bibi向《新消息报》老板Noni Mozes表示，佢可以限制《新消息报》竞争对手《今日以色列报》（Israel Hayom）的发行量，换取《新消息报》报道更多有利佢嘅报道。《今日以色列报》是支持内塔尼亚胡嘅免费报，由Bibi Friend子艾德森持有，因为发行量大影响到《新消息报》嘅广告收入。
Bibi亲证出卖艾德森，请看：
Bibi话自己同艾德森喺2012年至2015年间打电话倾密计100次，力证同艾德森系密友，不过Bibi今次咁反咬艾德森一口，艾德森已经嬲猪咗Bibi，话对Bibi“好失望好嬲”。Bibi国内受丑闻打击，会唔会最后都好似乒乓咁，陪完侵侵经历后自己消失㗎？好sad呀个story！