【每逢大事讲故事】以港女式向穆加贝咆哮 “你以前都唔系咁嘅”
只要喺Google搜寻输入“穆加贝”，你应该会揾到“穆加贝 生日”嘅相关搜寻。每年2月11号穆加贝生日都好大阵仗，豪洗200万美金开生日party，又巨型蛋糕又全国停课又登24页广告乜乜乜。
200万美金算少？喂陈生，你知唔知穆加贝统治嘅津巴布韦系边先？非洲啊！全世界最穷嘅国家全部都集中喺呢度啊！你唔系冇听过喺非洲每60秒就有一分钟过去.... 吖唔系，系非洲每年有几多人死于饥荒啊？！
不过依家啲8、90后真系未必知，其实津巴布韦有多到用唔晒嘅煤啦铁啦矿物。80年代（飞云我𠮶阵未出世），津巴布韦币1蚊等于1蚊美金，贵过港纸㗎仲笑！
𠮶阵津巴布韦有米到就算经历紧旱灾，都出口几十万吨粟米去15个非洲国家，养活成个非洲千千万万个饥民，畀人叫做“非洲面包篮”。
做乜搞到依家咁？问下穆生啰。
想当年穆加贝仲系一位解放国家嘅人民英雄，昔日风光史足以比得上南非国父曼德拉。直到佢做咗总统，再娶埋个情妇Grace之后，成个人变晒，唔理国民系生系死、日日过住离地奢侈生活，自甘堕落嘅程度仲夸张过楼下𠮶位啲演技，飞云真系当堂O咀...
话说喺59年前，当时仲叫罗德西亚（Rhodesia）嘅津巴布韦有位老师，佢就系穆加贝，无啦啦飞到无雷公咁远嘅加纳教书。
▲Google话坐车要百几个钟头......
可能上天念在佢出身寒微但仍刻苦读书，竟然畀佢喺一间中学遇上同样系教书嘅Sally。
当时嘅穆加贝系一位孤独精，每日沉迷书海；相反Sally系一个阳光活泼嘅女仔。除咗性格之外，两人嘅背景都好悬殊。穆加贝出身喺穷家庭，两个阿哥死咗，10岁阿爸走埋佬，凄凉过啲韩剧主角。Sally？佢从来唔需要为钱而烦恼，佢家族仲同当时加纳总理好friend㖭。
穷书生配有钱女，乜咁似大台啲剧集嘅？不过呢次系真人真事。穆加贝同Sally呢对佳人虽然有好多嘢唔夹，但就有一样共通点──关心政治，唔做“非猪”。
喺加纳𠮶阵，穆加贝见到呢个国家啱啱脱离英国独立。佢好似突然受到圣灵感动咁，由书虫变成热血青年，希望祖国可以学加纳一样脱离英国殖民统治。无耐，穆加贝带埋Sally飞返去罗德西亚，做咗民主党嘅秘书长，仲做埋党报“民主之声”嘅编辑，喺国内同一班黑人社运人士誓要队冧当时嘅白人政府。
至于Sally都唔系一个普通嘅非洲女性。结咗婚都拒绝留喺屋企做煮饭婆，落手落脚支持穆加贝参加民主运动。佢试过因为协助丈夫反对政府而被捕，坐咗6个礼拜监。
但系自己坐监都事少，老公坐监先大剂。两人结婚4年左右，穆加贝因为颠覆国家罪而坐足11年监。就系佢哋被牢狱所隔嘅时候，佢哋个仔出咗世，3年后因疟疾死亡。当时仲坐紧监嘅穆加贝连亲眼睇住个仔落葬嘅机会都冇。
Sally唔单止冇老公喺身边、冇埋个仔，仲要受政治打压。为咗逃避罗德西亚嘅政治打压，Sally逃回祖国加纳，再流亡到英国伦敦。之后8年，佢过住流亡日子，争啲畀英国踢出国，都为穆加贝四出奔走，帮佢买书、借书，等佢喺狱中完成法律学位，仲组织活动要求当权者释放包括穆加贝在内嘅政治犯。
呢啲高质女人喺边度揾？！
直到1975年，穆加贝终于出狱返到Sally身边。人嚟！可以Set场BBQ大团圆跳起Yeah喇。
咪住先。都未讲到高潮，唔好咁心急住，返入黎先。
得到Sally嘅支持，穆加贝全心投入民主运动，Lead住游击队打一场持久嘅独立战争，话咁快就喺1980年推翻白人领导的殖民政府，成功令国家独立，佢就变成国家英雄，由总理做到总统。
听到呢到，系咪以为自己听梗曼德拉嘅故事呢？穆加贝的确曾经同曼德拉齐名，话佢哋都系非洲英雄。可惜一个做咗诺贝尔和平奖得主，一个就变成津国希特拉。
穆加贝做咗总理2年，就开始表露出邪恶嘅性格。批斗战友，炒咗当时嘅内政部长恩科莫，仲派咗队曾经喺朝鲜受训嘅军人，去到恩科莫嘅族群大‧开‧杀‧戒，死咗成2万个人，血流成河、尸横遍野、人间炼狱、惨绝人寰，穆加贝啊你夜晚瞓得着咩？
最精彩嘅系，穆加贝仲临老入花草丛。自从仔仔夭折后，Sally冇再怀孕，仲有血压高，身体唔好成日出入医院。咁啱总统府嚟咗个又青春又靓女嘅秘书Grace。久旱逢甘露......总之穆加贝就同细佢41年嘅阿Grace搭上，背住Sally搞婚外情。
呢位鼎鼎大名嘅阿Grace，我细细个就听过佢个名。咪就系𠮶位能文能武，又钟意买嘢又钟意打人𠮶位非洲第一夫人啰。
Grace同穆加贝搭上𠮶阵亦都系人妻同人母。只系佢两个无惧世事变改，还是愈难愈爱，爱到当各自嘅元配唔存在，连BB都有埋，𠮶位就系喺城市大学浸过咸水仲疑似睇中咗一名高登仔嘅津巴布韦公主Bona。
穆加贝出轨仲有埋私生女，Sally一直都只眼开只眼闭，直至1992年因肾病而死，一路以来都从来冇公开讲过穆加贝出轨嘅事半句，后来系传媒爆出嚟咋。Sally为咗穆加贝付出咗大半生，到头黎都畀穆加贝伤透了心（#押韵）。
Sally死咗之后，Grace将穆加贝体内嘅邪恶分子完全释放出嚟，唔止搞到穆加贝癫癫地，就连任达华都要走出黎讲句：成个津巴布韦都畀佢哋搞弯晒。
穆加贝虽然已经在位多年，但其实佢嘅世界观真系无咩变过，讲嘅都系“津巴布韦嘅经济问题系西方国家的阴谋”，要推翻佢系因为当年佢充公咗由白人拥有嘅农场…… 批评者话佢完全唔知道咩系“现代经济学”，成日挂住谂点样分个饼，而唔系谂点样造大个饼。穆加贝就话讲呢啲嘢嘅就系叛国，要判死罪。
可能穆加贝细个唔畀心机读数学啦，以为钱唔系喺ATM揿出黎就系print出黎，要万印万、要亿印亿、要兆印兆。佢又真系咁傻猪走去印一叠叠100兆津币，飞云数几多个0都数咗10秒啊。
就系咁畀穆加贝印下印下，就印到由1美金兑1津币，变成1美金兑35,000,000,000,000,000津币。香港啲师奶推架车仔落街市装住啲𩠌，津巴布韦啲师奶就调返转，将一幢幢银纸装落架车仔到落街买个包。
岩先讲到津巴布韦咁多资源，个个争住要，点解仲系咁印钱？想知啊？咁就要讲返历史先。嗱你迫我讲㗎，唔准嫌闷㗎！
因为昔日英国殖民关系，国家好多土地都喺白人手上。穆加贝成功推翻咗白人政府，就当然要做多步，喺白人手上拎返啲资源啦。
一开始国家同英国倾掂数，一齐夹钱向白人地主买地，再分返畀黑人，白人黑人个个有so打和Super。不过到咗90年代（即系识咗阿Grace开始），国家经济开始差，英国又唔肯再夹钱㖞，冇钱畀点算？
抢啰，唔得啊？穆加贝好似当日我地盲抢盐咁盲抢白人嘅地，话啲地系国家拥有，再分配畀黑人。哗咁都得，即系当啲白人系戆居啫，唔怪得成班白人冲出嚟又发脾气又撤资，农业产量跌到阿妈都唔认得，英美呢班国际和事佬都冲埋出嚟，要经济制裁津巴布韦。
咪就系咁，津巴布韦嘅经济一落千丈。2000年议会选举，人民可以用选票惩罚穆加贝所属嘅执政党，由反对派领袖茨万吉拉伊（Morgan Tsvangirai）领导嘅民主改革运动（MDC）赢到开巷。
议会入面一下子冇咗一堆自己人，穆加贝冇自我反省不特止，仲要惩罚选民，继续抢地、打压异己。
8年后嘅总统大选，茨万吉拉伊原本可以取代穆加贝成为总统，但一轮暴力事件发生之后，茨万吉拉伊就将总统之位拱手让返畀穆加贝，自己屈就做总理。盲嘅都知，系穆加贝出手喺茨万吉拉伊手上抢返总统呢个位啦！
枉佢喺一代英雄，选唔到总统仲要磨烂席，你话佢丑唔丑？𠮶年就职典礼，成个非洲冇一个领导人肯出嚟贺佢，大学收返佢嘅荣誉学位，连英女王都顶佢唔顺，褫夺佢嘅爵位。真系丑到飞云都唔敢睇。
▲一讲到＿到唔敢睇，点可以唔回带？
系津巴布韦咁嘅经济环境下，Grace的存在真在造成太大对比。身为非洲人嘅Grace可能鬼妹仔性格啦，最钟意“鸠呜”，对佢黎讲每日最大难题唔系lunch食乜，而系买Gucci定burberry。去一次欧洲旅行，Grace一日可以洗成7.5万英镑（75万港元）Shopping，去新加坡扫货更加要15架手推车先装得晒啲战利品。
佢仲疑似有躁狂症，成日撩交打。2009年喺香港Shopping就试过打伤个摄影师，今年又试过打到一位廿岁𡃁模爆缸。呢位野蛮老婆恃住自己系津巴布韦第一夫人，一句外交豁免权就拍拍屁股甩身。咁都得，飞云真系黑人问号。
一向都胸无大志嘅Grace，几年前忽然醒起，穆加贝都九张嘢，已经系人生嘅尽头。佢用黎谂今日买乜名牌嘅个脑，终于发育到谂到其他嘢。
佢拎部计数机出黎计下，冇咗穆加贝，等于冇得做第一夫人，等于冇得用公帑，等于冇．钱．Shopping。Grace计到呢点，简直就晴天霹雳，吓到三魂唔见七魄，肾上腺指数爆升，直程变咗只树熊一样叼住块树叶呆咗。
为咗Keep住“Gucci Grace”呢个“美誉”，Grace谂到条桥，决定铺路等自己做总统“赚钱”。哗~咁难谂都畀佢谂到，钦敬钦敬！
嗱阿Grace绝对唔系得个谂字，仲有做嘢㗎。点解识做就自行参透啦。首先佢用光速3个月＂Ｒ＂到个津巴布韦大学博士学位，话自己研究社会结构和家庭功能的转变乜乜乜。之后仲叉只脚落政治，做咗执政党女性联盟主席，跻身党内最高决策组织。
上位就是咁上的。爱妻心切嘅穆加贝为咗阿Grace，仲炒埋副总统捧老婆上位。我真系恭喜你啊Grace。
说谎的人要吞一千根针，出轨的人要吞一只“老虎乸”，𠮶只昔日又Young又索嘅Grace已经变成极具野心的政客，仲讲到名“我都系津巴布韦人啦，点解我唔可以选总统”。
呢只乸穆加贝一个啃就够了，要全津巴布韦人一齐啃就No Way!
觉得意犹未尽？ 键入【新闻讲故事】专页，等飞云将国际大事慢慢讲你听！
穆加贝曾经讲过，只有上帝先可以炒佢，点知上帝又真系听穆加贝话，炒咗佢。
难怪嘅，好地地一个国家英雄，搞到成个国家又穷又废，仲养埋个拜金老婆，依家仲话畀老婆做总统？！系咪搞笑啊穆加贝？抵你临老畀国民唾弃，激到军方都唔gur要反台迫你落台。一路好走喇穆加贝。
▲嗱嗱嗱，仆亲喇系咪呢？行路带眼穆加贝。
PK中的穆加贝，引爆网民P图无限创意，系节目完结前带大家欣赏下：