【港女讲感情】余文乐王棠云拍拖一年闪电结婚　Timing真系好重要

星期二本来就唔系一个好日子，啱啱过咗星期日，但又有排先到星期六，点知拎起电话碌吓IG，余文乐PO结婚相，吓？乜佢结婚咩？冇任何先兆，明明记得佢上年冇耐先认拍拖，间唔中会系IG放闪晒吓女友，但突然就话结婚，唉，好Sad，今日应该系“Blue Tuseday”，乐仔终于封盘结婚做人夫，相信大家都冇异议，将今日定为法定失恋日。

余文乐自从同Kary（吴雨霏）分咗手之后，尽管大家都笑佢系Fishermen Lok（费沙文‧洛），恶搞佢系NBA球星同高比打波，佢自创嘅服装品牌“Madness”又被陈冠希笑系Copyness，好多款都疑似同其他知名品牌“致敬”，但冇可否认佢系城中少有嘅型男，著衫有自己嘅一套风格，仲带起咗著阿伯波鞋New Balance嘅热潮，网民仲因为咁而命名做𠮶只色做“乐仔灰”。陈冠希被赶返大陆之后，乐仔就接手咗佢以前所有潮牌嘅工作，基本上佢著咩系身，一众潮童都会照办煮碗跟住著，自从佢开始留须之后，仲多咗阵男人味，真心系正嘅。

余文乐IG度写话：“在对的时间，遇到对的人，感谢上天把最好的妳安排在最好的时候出现。”其实都啱嘅，有咩嘢赢得到Timing？其实佢之前同过卢巧音、黄伊汶同Kary公开过恋情，佢自己都讲过钟意叻嘅，又照顾到自己嘅女仔，其实以上嘅女仔要求都fit，但问题个男仔冇心定落嚟，咩都系假。就好似郑伊健同梁咏琪咁，拍拖几耐有几爱都冇用，最尾都系被蒙嘉慧后来先上马，年纪到咗，唔知系唔系荷尔蒙关系，周董、郭富城都浪子回头，甘心戴上戒指做老衬。

“乐仔结婚了，新娘不是我”，相信系所有乐仔粉丝嘅心声，“佢遇唔到对的人，系因为佢冇遇到我啫！”，算啦，冇遇到就系冇遇到，点都要认命，这些机会不是属于你的。