【港女讲感情】靓仔坏男人已失叫座力　天然呆马国明先系最佳男友

喺好耐好耐之前，潮流仲系好兴“男不坏，女不爱”，总之个男仔对你越衰，成日虾你闹你，然后畀10旧屎你再请你食1啖砂糖，“霸气总裁咁就最吸引”，最有代表嘅就梗系《流星花园》嘅道明寺，长拍长有，拍完台版、韩版、日版，之后再拍多次台版Version 2，你就知女仔系有几Buy！其他坏男人做卖点嘅《恶魔在身边》或者《恶作剧之吻》都红到爆炸，总之姊妹们就系钟意被虐，最好就好似格雷咁鞭打我。

但时代变，大家嘅口味都跟住变，依家大家唔兴被虐，反而个个都想做娘娘被暖男追，最好就好似《我可能不会爱你》入面嘅大仁哥咁，净系钟意你一个，默默守候你身边，只要你需要佢会随传随到喺你身边支持你。所以近年一直都流行韩剧，剧情唔需要好花巧，反正点都加个暖男就得架喇。

其实唔需要转台去韩国，我哋香港都有个代表，就系近期拍《降魔的》升咗上神台嘅马国明，佢系绝对系少有笋盘。佢真人就好似剧中“马季”一样平民贴地，平时兴趣就系打机上高登，闲时就陪屋企人行吓街买吓𩠌，完全好似套剧咁，陪心姐（谢雪心）家庭乐。马明即使上咗位，但亦唔会乱使钱，皆因佢嘅兴趣系储钱，觉得有钱揸手最实际，各位姊妹系咪听到都想畀个Like佢。

其实坏男人已经系退流行，好似《幕后玩家》嘅Bosco（黄宗泽）咁，有老婆都仲揾小三，就算几靓仔都冇用，都被网民闹爆。又好似近期同马明争视帝嘅王浩信咁，Signal Wong喺外型同演技都可以话完胜马明，但观众就一面倒支持马明，仲话如果唔系马明攞视帝就要罢睇TVB咁话。无他，Signal Wong传过偷食，之后仲断正被传媒偷拍到佢同达哥神秘消失几个钟，就算演技好都唔想投票畀你啦。相反，马明踏踏实实，咁多年嚟都做个老实人，最多都系上杂志爆过自己有睇AV，宅男就系有呢样好，你最多都系怕佢买一堆Figure砌又或者偷偷哋课金新Game，好过惊怕佢揾PTGF，因为你就系佢哋全世界，宅男闷有闷嘅好，起码有安全感唔使担惊服怕。