【港女讲感情】言承旭林志玲世纪复合　兜兜转转只有一位难以代替

成日听人讲话：“爱得深，爱得早，不如爱得刚刚好。”三样嘢好似只可以拣一样，谂起都有啲SAD，但Why not both？言承旭同林志玲复合就系最好嘅例子，由2001未拍《流星花园》𠮶阵，两个人已经因为做Model而认识，到2003年恋情首次曝光，之后一直被媒体影到拍拖，虽然佢哋冇公开认爱过，但言承旭同林志玲嘅恋情系大家默认嘅事实。𠮶时林志玲拍戏堕马伤得好严重，言承旭即刻放低手头上嘅工作去探佢，似乎地下情要浮上水面，但喺呢个时候又传出林志玲同某小开有绯闻，佢哋分分合合，两个人中间传过有同其他人拍过拖又散咗，到今年2017已经走到第14个年头，呢段纠缠不清嘅感情，似乎预告住佢哋真系命中注定嘅一对。

言承旭同林志玲“爱得早”，早喺2003年恋情曝光；“爱得深”，14年嚟兜兜转转，发现爱嘅都仲系大家；“爱得刚刚好”，佢哋两个再唔系廿几岁年少气盛嘅年轻人，唔再系寻找激情而系想稳定。台湾𠮶边仲有传佢哋准备结婚，两边都透过经理人同工作室回应话多谢关心，叫大家畀啲空间佢哋咁话，唔通真系好事近？

圈内人拍拖往往成为大家嘅焦点，即使系金童玉女都未必一定有好结果，就好似方力申同Stephy（邓丽欣），听完佢哋合唱《好心好报》，再睇埋佢哋戏假情真嘅叶念琛三部曲，最尾都系分手完场。当年胡杏儿对住黄宗泽讲过“难顶”的宣言，感动过13亿人口，“我知道我好多缺点，我都好难顶，但你都好多缺点，你都好难顶，我们一路顶住大家”，结果8年感情最尾都系顶唔顺。有时爱得深、爱得早，都唔一定爱到最后。

拍拖十几年固然系难得，但好似言承旭同林志玲咁，兜兜转转都系走回原点，就更系难能可贵。好多人一转身，就系一辈子，好似梁咏琪等咗郑伊健好多年，最尾郑伊健娶嘅系蒙嘉慧，虽然好MK，但都系唔少港女嘅心声，喺《我的最爱》唐宁入面咁讲过：“我话唔要，即系要，我发脾气，其实都系想你了解我，紧张我，如果我系街走左去，你一定要追住黎。”女仔讲分手都系意气说话，无非都系想有氹吓锡返，有时候一错过咗真系追都追唔返。

最动人嘅感情，莫过于你一回头，原来佢一直都企喺原地等你转身。