【港女讲感情】戴唔戴婚戒唔系重点　男人唔想做总有千百个理由　

大台热爆剧集《踩过界》啱啱播完，点知套剧第二季都仲未播，就传套剧主角王浩信同蔡思贝有“续集”，有报导话喺庆功宴上两个人神秘失踪咗，仲传出王浩信同陈自瑶分开住嘅传闻，讲到似层层咁，大家都大叫可惜，话唔值得因为达哥而唔要Yoyo。最后Signal Wong喺活动度回应两公婆一啲问题都冇，觉得自己好无辜，只要一同女同事行近少少就传绯闻，而一直都唔戴婚戒呢件事，佢就咁讲，“我一向都少戴，因为怕整唔见，我唔会因传闻改变自己嘅习惯，呢个只系形式，最紧要系心。”

通常睇戏成日见，男人偷食之前都会除咗只戒指，好似象征自己放低“已婚”呢个身份，一除就以为自己变做“单身”，结婚戴戒指，系代表住爱嘅承诺，仲话戴喺无名指，系因为无名指血管最接近去连接心脏，咁讲就似乎太夸张。

其实婚戒最重要嘅用途系代表对其他异性嘅拒绝，大家见到你只手有戒指，就好似话畀人听你系“unavailable”咁，意义远比爱嘅承诺嚟得实际好多。但时至今日，好多人都因为觉得唔方便，又或者自由主义而唔戴婚戒，好似Jay Z、威廉王子、Will Smith都冇戴。

系，的确唔一定要去戴婚戒去证明对婚姻嘅忠诚，要去滚嘅，依旧可以戴住只戒指去出轨。但问题Signal哥你个底咁花，结婚前已经传跟Cammi挞着，之后拍亲剧又同套剧嘅女星传绯闻，虽则话十个男人九个滚，靓仔唔靓嘅男人都会偷食，但你都起码扮吓嘢，戴返只婚戒扮专一。但依家讲到明话唔戴，话怕唔见，唔会因传闻改变自己嘅习惯，其实真系有心去戴嘅话，边会咁易话整唔见，事在人为嘅啫，戴只戒指咁简单就可以畀到安全感老婆。

所以真系唔怪得Yoyo隔几日就要喺IG到分享正能量，做女人唔咁时时鼓励安慰吓自己，日子都唔知点过！