【任噏影评．毒。诫】成套戏四不像　纯粹靠影星卖座

入场睇《毒。诫》，好主要原来是被古天乐同刘青云这两个老拍档吸引，仲加埋新晋影帝林家栋，呢个组合真系够晒重份量。不过卡士重就重，反而个剧本就显得有啲平凡。故事系讲述前黑帮人物陈慎芝的真人真事，其实22年前已经有一部《慈云山十三太保》系同样题材，今次再拍一次而且揾嚟咁多大星，紧系希望票房收得。不过睇完出嚟真系有啲失望，好似全程都只系观赏几位男主角演出，剧情真系无高潮位，好闷！

话明《毒。诫》，最好睇紧系睇佢喺戒毒嘅时候点样挣扎，睇青云好痛苦嘅口面，不过戏中我谂只系得一两分钟，咁就交代咗佢已经戒咗毒，会唔会太儿戏呀？讲起时间快，喺套戏一开头𠮶阵，啲时间不停咁交替穿插，一跳就跳几年，有时又讲返起十几年前，啲年份不停咁弹出嚟，系咪要同观众玩记忆游戏呀？睇到我好鬼混乱呀！

讲返几位主角呀，林家栋作为主角，都好令人期待喺《树大招风》之后会再有经典演出。点知成套戏佢嘅戏份出奇地少，反而特别演出嘅张晋同古天乐仲多戏份过佢，咁点解要落佢做主角？就系因为拎咗影帝？唔讲林家栋讲张晋，作为出晒名嘅武打星，谂住套戏几闷都有啲打斗场面睇吓，点知全套戏俾佢出手嘅场面就得𠮶一场，就系喺天台打差佬，一开头𠮶场烂仔交乱到都唔知做紧乜，不过睇佢最后做一个就死嘅病君，啲演技渗紧出嚟都争返唔少分数。成套戏系以刘青云做大主角，佢嘅演技当然系唔使质疑，喺厕所打针𠮶幕直头可以直逼佢好拍档古天乐喺《门徒》入面吸毒𠮶个衰样。至于古仔，一开头睇宣传以为佢只算系客串吓，点知原来佢都有好多戏份，一贯招牌chok样就唔多讲，要做一个黑社会大佬对佢嚟紧亦都驾轻就熟，完全无空间可以再发挥只有喺楼梯同另一个黑帮大佬只揪时露出𠮶个惊慌样就系全场嘅特出位。其他老戏骨好似吴孟达、谭耀文、欧锦棠系好戏，不过都无乜特别出色嘅戏份。

呢套戏睇头一半都以为系江湖电影，讲喺呢个龙蛇混杂嘅九龙城寨点样生存，点样靠卖毒维生，但系又唔太见到典型嘅江湖桥段，连劈友都系得俾人追杀𠮶一两幕，完全无死过人，只系最后古天乐俾车撞死了事。讲起俾车撞死呢一幕，𠮶场戏古仔几个人喺一条隧道口上紧楼梯𠮶阵俾人伏击，讲真，你见到自己班人手无寸铁，人地就拎晒武器，你都会谂住走喇？点知古仔唔系掉头走，而系好似赵云上身咁冲入万军之中，咁紧系以为佢会叶问上身一打十，点知都系要揾路走，咁点解唔一开始就掉头向另一边隧道口走？明明后面就无人。讲返套戏，江湖味不足唔紧要，套戏讲戒毒，应该系励志片。但正如上文讲过，戒毒过程少之又少，之后讲青云拆解咗几单江湖事，同埋喺戒毒所帮人戒毒就拎咗个杰青，但提都无提过佢点帮人戒毒，纯粹系剧情话你知系就系，咁真系好励志㖞。那么咁多大男人演出，唔通系讲兄弟情？其实就算系讲刘青云、林家栋同张晋三兄弟嘅感情描述都唔多，只系最紧张晋有病就嚟死先有少少兄弟同心嘅感觉。仲有青云同古仔两个本来无交流嘅人，突然间就化敌为友肝胆相照，就系因为古仔一句话：“因为你唔再系江湖嘅人。”个关系变得咁大，点接受呀？江湖唔系，励志唔系，兄弟又唔系，你唔会同我讲《毒。诫》系一套爱情片吓嘛？睇完真系呼出一口凉气，即使作为古天乐嘅死忠，我都真系好失望。