【任噏影评．29+1】欣宜Chok声好难顶　娜姐收起性感好失望

入场睇《29+1》，本住支持港产片嘅心态，兼且舞台剧又大受好评，杜汶泽又拍晒片力赞好睇，咁就紧系唔好执输睇咗先喇。点知睇完真系好失望，好耐都无试过一路睇戏要一路望表，睇到一半心谂仲有成50分钟咁大获，点挨呀？内文有剧透，仲想亲身入戏院嘅唔好睇落去。

回顾返呢套戏嘅预告片，欣宜同BabyJohn 蔡瀚亿嘅一句说话：“不如我地做爱啰。”无疑系震撼咗唔少观众，所以都搞到我好期待欣宜出场。点知佢一出场我真系好震撼，佢𠮶把Chok高几度又要懒乐天嘅声音真系吓死人，佢把声其实本来都已经好响，加埋呢种讲嘢tone配合埋戏院嘅音响，基本上佢一开声我就要揞住对耳隔一隔声，如果唔系我真系惊佢内功深厚震聋我。至于佢演成点？除咗把声，将所有表情动作都放大，戏中佢饰演嘅角色黄天乐系一位好乐天嘅女人，所以周不时都会笑，有一幕系佢要教BabyJohn点样令自己开返心啲，真系Chok个笑样出嚟，𠮶一下我真系知道乜嘢叫做皮笑肉不笑。相反隔篱BabyJohn就自然好多，BabyJohn系欣宜青梅竹马嘅好朋友，呢位仁兄自从《拆弹专家》之后，演技开始被人睇到，呢套戏佢都算做得唔错喇，好自然，拍落欣宜度好大对比。戏中佢要摸欣宜胸，仲有机会同欣宜做爱添。其实喺《拆弹专家》佢已经要被人炸到粉身碎骨，今次仲要有如此情节，都真系几同情佢。睇嚟欣宜嘅演技仲好有进步空间，反而佢下一套戏《西谎极落之太爆太子太空舱》就比较似做返自己，不妨期待吓。

讲完欣宜，讲返另一个女主角周秀娜，佢做得不过不失喇，不过今次呢套戏娜姐完全收起性感，当然令到一班男观众失望。戏中佢系做一名事业女性，即将30岁喇，正正踏入中女的年纪。失恋、工作压力、家人离世、业主迫迁等等的烦恼一次过嚟晒，不过其实呢啲问题都未必系30岁先会出现，所以我都唔明点解要叫29+1，好似夹硬将女性标签一踏入中女年纪就会有好多问题咁。戏中娜姐嘅爸爸因为意外入医院，最终系救唔返嘅，咁当然会有啲回忆返佢同老窦嘅片段喇。可惜回忆时间太长，呢个感动位感动唔到我。而且其实成部戏都有啲位定镜时间又系太长，搞到部戏有太多闷场嘅时间。而套戏最尾讲娜姐轻轻将间屋幅墙推开，之后就无喇喇好似用咗随意门咁去咗巴黎，我仲以为呢套系一套写实戏，点解会咁舞台剧收尾？会唔会太过滑稽？好记得欣宜戏中有句对白系：“你有无试过觉得自己咩都无呀？”我睇完成套戏真系好深刻咁领会咗呢个对白，因为睇完之后我真系觉得自己乜都无接收到。