【嫁到这世界边端3】陈贝儿尼日尼亚步步惊心：四尸命案被斩件

近年TVB好钟意将受欢迎嘅节目不断添食，除咗《食平啲》系列，《嫁到这世界边端》连续两辑都大受好评，并喺台庆颁奖礼连夺两次最佳非戏剧节目。上星期主持人陈贝儿又再次出发，为《嫁到这世界边端3》进行拍摄，点知喺第一站尼日尼亚已经发生惊险事，令出名大胆嘅贝儿都不禁话：“呢度彷佛系一个一出街就可能会遇到意外嘅国度。”

陈贝儿入行多年，去过世界各地唔同国家采访，应付各种突发事故都相当有经验，不过呢次一去到尼日尼亚就令贝儿吓破胆：“被提醒过好多次千祈千祈唔可以一个人出街、特别系入夜后。真系有咁危险吗？一落机，嫁到尼日利亚嘅港女人妻就话早两日佢屋企附近，发生咗单四尸命案，尸体更被斩件示众。原因就只系为咗一啲小纠纷。”

喺尼日尼亚，生命流逝比想像中更快更易，虽然贝儿话摄制队有荷枪实弹嘅军装警员24小时保护，但出入拍摄时都一步一惊心：“拍摄过程好严竣，寻晚我哋夜晚10:30pm收工返到酒店，凌晨03:30am又要再出车坐7个钟车入尼日利亚东部地区拍摄。刚刚出车前又再被人妻提醒唔可以喺车上面玩电话，因为天仲系黑嘅，外面嘅人见到入边有电话灯会知道入面系有电话嘅‘有钱人’、同埋啲 电话灯会照到我哋系外国人，佢哋就有可能想对我哋做啲咩⋯⋯呢度彷佛系一个一出街就可能会遇到意外嘅国度。”探访过多地人妻嘅贝儿都不禁问：“好难想像有港女会肯嫁到过嚟呢度。做乜要嫁到咁远呢？”