【早霸王】男听众等唔切女神回复单身　小仪：钟意唔一定要拥有

情人节将至，最新一集《早霸王》“你知道唔知道有人挂住你”男主角林仔，希望趁机向心仪对象表白，，过一个甜蜜情人节。至于二人相识经过，林仔话系因为打机。“佢level比较低，所以我带住佢玩。”并谓有私下与对方倾电话，亦有约过出嚟食饭。打机都可以有真爱？小仪为此十分好奇，不停追问到底如何发展到真实世界，林仔表示：“有日喺佢公司附近做嘢，问佢食唔食糖水。”成件事好似好简单咁款，而林仔亦都补充“最后唔小心去咗食饭。”

除咗食饭之外，林仔之后亦有同心仪对象出街，兼每日倾电话，之不过，当小仪问到“有无试探过对方有无拍拖时？”林仔就话对方系有拍拖，但强调“男友对佢好差，佢哋都就嚟分手，甚至佢身边啲朋友都叫佢揾过另一个……”得知女方有男朋友之后，小仪好认真咁问林仔到底钟意心仪对象啲咩，并寄语：“钟意一个人唔一定要拥有佢。”更认为大可以等女方回复单身再表白都唔迟，但林仔就话唔想错过。

见呢位男听众心口挂个勇字，小仪于是打电话一试，电话接通林仔嘅心仪对象Momo，小仪喺Momo开名前，顺带一提“你要对佢有意思先好讲佢个名，如果唔系可以拒绝。”Momo豪不犹豫咁讲出林仔全名，而林仔亦顺势表白：“我想喺你个list入面。”虽然小仪系咁催促林仔问一句:“可唔可以做我女朋友。”甚至连Momo都画出肠:“系未要问问题?”但林仔就净系讲咗句“我钟意你。”而Momo亦唔让步，再表明“呢个唔系问题。”但同时亦都讲咗句“我知呀”到底能唔能够成为情侣呢？时间关系，怕且要下星期先知道。

【周五心意运动】您捐一封$50利是，已可为基层送上温饱，01心意呼吁您支持【食德好】，每$50可为12个家庭提供一餐回收蔬果及食物：https://heart.hk01.com/zh/project/10003