【后生仔倾吓偈】麦明诗继续被哥哥爆料：佢口味“毒”突　

继上一集爆料十优港姐喺屋企钟意打大赤膊之后，麦明诗哥哥麦明山喺最新一集《后生仔倾吓偈》继续有嘢爆，而今集主力系讲妹妹嘅爱情观。“佢真系唔系钟意靓仔，即系醒得嚟谂嘢唔正路，好听啲可以话系骑呢。”当麦明山讲出麦明诗拣男友条件后，成班后生仔都十分认同，并指“佢钟意啲鬈发、戴眼镜”到底系口味独突定系毒突？相信两者皆是。

麦明山话其实都有谂过介绍啲朋友比麦明诗识，奈何有唔少都已经拍紧拖。“几年前我做实习时，有个高我两届我觉得唔错，姓钟嘅。”一听到姓钟，冯盈盈即时好大反应，点解？因为佢宝宝都系姓钟，而且又系医生，陆号即时回带FYY男友曾经大赞麦明诗靓女一事，虽然FYY系咁话“无事”，并指男友与麦明山同龄，所以应该唔会系佢，但麦明诗就好清晰咁话：“但高佢两届㖞。”麦明山为此努力回想呢位钟医生，结论系：“高大靓仔”同埋“两年前开始成日gym”(FYY曾经话过男友同佢拍拖初期疯狂做gym），虽然最关键嘅主修边科麦明山话已经唔记得咗，但以上条件都真系同FYY男友Martin非常吻合，难怪连佢自己大叫：“有无咁细呀个世界？”