【后生仔倾吓偈】麦明诗热爱于家中天体营　冯盈盈：试过差啲出事

最新一集《后生仔倾吓偈》揾嚟麦明诗长兄麦明山（Vincent）做嘉宾，难得现真身，当然要问下佢十优港姐喺屋企有咩怪僻。麦明山一开始都答得好保守，话麦明诗比较静，之不过，转个头佢就话：“屋企明明有工人姐姐，但都几恐怖，我睇过一个研究，话啲屋企愈乱嘅人，愈有爱心同创意，佢应该系我见过最有爱心嘅人，其实你睇佢㗎车都知，明明系5人车，但就只系可以坐得1个人。”讲到呢度，麦明诗都无力反驳，而曾经系乘客嘅陆浩明同冯盈盈都表示十分认同。

麦明山继续爆料，指麦明诗除咗平时爱将隐形眼镜丢到洗手盆之外，夏天时仲会打大赤膊通屋走，到底所谓打大赤膊系咪好似天体营咁呢？麦明山就好紧张咁话唔系，但就冇再加以解释，而麦明诗就即时指出：“我好过盈盈，有着底裤。”又系时候回带，FYY曾经喺节目话自己有裸睡习惯，并自爆会喺房除晒内衣裤大解放，有时落街买嘢，仲会用厚衫遮掩自己嘅真空……而呢日，当大家讲起呢个话题时，FYY就补充：“屋企冇男仔时就会把握机会，完全未试过出事，不过有次除晒衫走入厕所冲凉，冲完之后听到妈妈话叫6人份pizza，话因为细佬带咗朋友返嚟玩，好在佢哋无出房，唔系就出事。”莫非港姐都系咁open?