【早霸王】男听众靠交友app揾到真爱女神　森美：我都想试下

近年似乎愈来愈多人透过交友apps结识异性朋友，而喺《早霸王》嘅“你知道唔知道有人挂住你”呢个环节，每隔一阵子，都会有男听众分享使用交友apps嘅经验。今集男主角阿洋，一年几前透过交友apps认识到现任女友，听到阿洋话喺apps睇相时，见到对方“白雪雪、眼大大，真人都系咁靓”时，森美都忍唔住话想试下玩交友apps，而阿洋呢日打去节目，其实系准备求婚。
 

阿洋话自己当初因为无聊，所以先玩交友apps，但相信连佢自己都估唔到可以咁快咁顺利约会到女仔。“到依家拍咗一年半拖，都有小拗撬，因为自己讲嘢唔叻、唔浪漫，但佢又好有心思整小手作、卡片、公仔、嘢食，佢生日我都系送扎花。”其实打得去《早霸王》求婚，就已经系浪漫一种啦，不过为免阿洋有甩漏，森美就教路“你要令对方知道佢喺你生命中几重要、几爱佢。”阿洋就话自己用纸写低咗要讲啲咩。

电话接通之后，女友嘉慧傻笑一轮后，逐一回答森美嘅问题“有拍拖，关系几好，哈哈，点好法？我唔知点形容。好难谂……哈哈!爱佢乜?嗯……佢对我好好、好细心，唔开心会陪住我， 呢个都好紧要。”电话再次接入阿洋，佢一开口就话：“知道你好钟意听呢个节目。所以试下，我系想借呢个机会向你正式求婚 。我知自己口才唔好、又唔浪漫，所以我想拎多啲勇气出嚟、细心啲，花更多的心思、比更多浪漫你，爱你更多更多，我想再同你讲我爱你 ，你可唔可以嫁比我？继续包容你口中蠢猪猪嘅我 。”虽然阿洋讲到又有啲乱，又有啲重复，但电话另一边嘅嘉慧已经十分感动，喊晒话：“其实你已经做得好好，多谢你。”咁系未表示已接受求婚？！