【早霸王】女听众想主动向暖男表白：因为要霸住佢，唔可以错过

表白都可以话系一门几高深嘅学问，有听开《早霸王》 嘅听众相信就会更加认同。最新一集嘅“你知道唔知道有人挂住你”，女主角阿琪就话准备表白，对方系一大班朋友出嚟玩时认识。“感觉佢系暖男，好贴心，冻𠮶阵会买褛比我著。”听到呢个举动，森美同小仪都不禁“哗”咗好多声，仲笑言“如果佢听到你话想去旅行，应该成个地球都买比你”阿琪解释系因为有次去睇戏时觉得冻，于是男方提议去买外套，虽然佢有话比钱，但男方就一口拒绝，如此细心，唔怪之有暖男感觉啦，连森美都话“呢啲系男朋友先先会做嘅嘢。”
 

阿琪仲话试过行花市时，因为人太多，对方一手捉实佢。“同埋佢有时起身会Whatsapp我，问我做紧咩，但由始至终佢都无表白过。”既然男方无任何提示，点解阿琪会咁大胆呢？“因为要霸住佢，唔可以错过。”呢个理由又真系非常之充足。
 

电话接通一名叫鸡仔嘅男生，虽然佢听到森美有话女仔钟意佢时，好似有少少意外，但都补充了一句“系对一个女仔有意思，不过唔知系未你哋讲𠮶个，佢成日都好大意，好多时都唔系好识照顾自己。佢叫咩名？阿琪。”双方电话都接通后，阿琪似乎因为太紧张，所以唔系好识讲嘢。“嗯……我唔识讲……”听到森美好肉紧咁话“把握”之后，阿琪终于讲出“我钟意你”男方傻笑一轮之后，就以“我都钟意你”作为回应，身为红娘嘅森美虽然大叫毛管戙，但都忍唔住大赞成件事非常梦幻，更指要得到“我都钟意你”呢个答案其实好难，尤其系今次女主角不善辞令。“平时男仔我多数都会教路，但女仔真系一句就会令男仔融晒。”