【果栏‧黄嘉乐‧专访】北上发展遇公司财困 获TVB拯救做亲生仔
《果栏中的江湖大嫂》终于大结局了，剧情发展其实有不少催泪位，尤其是勇哥（黄嘉乐饰）死去的时候，小狼女（冯盈盈饰）的爆喊演出，多么动人。其实黄嘉乐在今次剧中也是发挥出色的一人，饰演一名退隐的江湖大佬十分入形入格，能够演绎出这种唏嘘的江湖味，当然人生也要有如此的经历。
曾经在训练班出来后便一帆风顺，可惜自己年少气盛并没有好好把握，在TVB打滚多年依然只是做“细佬”的角色。毅然北上中国发展，正当打响名堂之际，却又因为经理人的问题而前途尽毁。好在这时娘家TVB一个电话，嘉乐立即像抱到了救生圈，重回香港，更首次签下TVB的经理人合约做亲生仔。
黄嘉乐，相信有收看TVB的人一定会认识他，说到底，他在TVB已经17年了。由2001年到现在，他从训练班出来后便一直维持著年年有剧上，但原来当初入行并不是自己的初衷，他说：“我当时做电讯业，有一日，艺员科有个电话坏咗，就叫咗我上去整。上到去个艺员科嘅人拎咗份表问我有无兴趣读训练班，可能𠮶时比较小鲜肉feel啩？但当时我系拒绝咗嘅，自己都唔系立志入演艺圈，虽然有做兼职模特儿。到佢第二次又问我，咁我𠮶阵又后生，受唔住引诱，就入咗行。”
虽然重戏份，但当年一个新人又点会好识做戏，所以很自然地经历滑铁卢。回想的时候，他说：“其实做路人甲系有好处，你先知啲镜头摆位，自问唔系天份高嘅演员，当然系撞板多过食饭。好彩当时所有前辈都无俾压力我，仲好耐心咁教我。无奈天资有限，𠮶时错失咗好多机会，开始做返路人甲嘅角色，一段时间之后开始觉得自己做紧咩呢？我同自己讲要努力喇㖞，𠮶时先觉得自己系真正起步。终于做做吓等到有机会做《青出于蓝》，好专心好勤力，因为一路拍一路个剧本都写紧，当时小青姐慢慢加咗我嘅戏，之后亦都拍咗几部小青姐嘅剧，就一路到而家。”
在2011年，嘉乐做了一个对自己事业有很大改变的决定，便是北上中国寻机会，更签下当地的经理人公司，他说：“因为𠮶段时间我已经做咗好多‘细佬’嘅角色，𠮶时已经有好多监制或者观众已经入咗脑，我就谂点做先可以令到人觉得我有转变。而咁啱出面又有出面嘅经理人公司揾我，话会喺大陆开几多剧，咁我就心动，结果我就签咗。但因为𠮶间公司出现咗啲问题，我系要同我当时嘅经理人不停喺北京叩门试镜，用咗一年时间，其实我无所谓嘅，因为演员试镜系一个好合理嘅行为。终于得到一个机会，就系《妈祖》，都算系多戏份，第一套之后就开始打开咗大陆嘅缺口。坦白讲，你唔够知名度，除咗不停试镜，如果唔系都几难话一定有剧开，除非打咗个缺口。”
不过拍完《妈祖》后，他在中国的发展便停滞不前，但却不是因为自己的问题，他表示：“当时经理人比较贪心，因为《妈祖》系中央电视台拍，虽然而家无咁劲但始终系全国性。佢就拎住呢样嘢开个价就有啲过份，开成一倍有多，成十万一集，《妈祖》𠮶阵我只系几万，我已经好开心㗎喇。就系因为呢件事，我觉得当时嘅经理人系浪费紧我嘅机会，你睇好我唔系问题，但唔好开天杀价。我都同佢讲不如拍多几套，等多啲人识我先，之后拍咗少少大陆、台湾电影，签咗约俾人始终都系人哋控制。整段时间就系两三年左右，但当时间公司喺最后一年因为资金周转不灵，但我仲有一年约，𠮶年就搞到好惨喇！（大陆）又无工开，TVB又以为我走咗，爸爸𠮶时又身体唔好，好徬徨。”
好在，这个时候娘家TVB抛出了一个救生圈，适时拯救了这个迷途的小伙子，“其实旧经理人公司系有月薪，但去到后期开始唔准时，大获喇，咁大个仔都未试过咁样，𠮶阵TVB份约亦唔系月薪制。好彩𠮶阵佢唔同行最后一年合约，有啲嘢真系好感恩，𠮶个时间才叔（梁材远）就打嚟叫我拍《守业者》，我即刻答应咗。我仲问才叔可唔可以包我多啲戏份，咁就多啲钱，挨过咗段真空期，之后就签返TVB，第一次签经理人合约。”回想起这段经历，绝对是一个变幻无常的人生，难怪黄嘉乐在《果栏中的江湖大嫂》饰演勇哥时，可以如此入戏了。