【年度奸人大赏】愈丧心病狂观众愈buy！ 呢4个奸角最值得攞奖
古语有云：“识拣一定做奸人！”根据非正式统计，几乎套套剧弹起，都系因为有个奸人做到大家都想掐死佢！不过可惜吖，做得几好又点，始终颁奖礼唔会有个“奸到出汁奖”畀佢哋，然后一年又过去…佢哋嘅努力就无疾而终。所以！今次《01娱乐》就为大家介绍返2017年4位终极奸人，睇下佢哋做过几多伤天害理嘅事！
奸人入门级：《超时空男臣》－张诚（郑子诚饰）
向来都一副奸样嘅郑子诚，你要佢奸，Easy Job喇。不过今次佢喺超时空男臣入面，已经叫做冇咁奸！因为佢只不过系寻仇，时空穿越揾萧正楠算帐。最正都系佢哋嘅Marvel式对打，又红又蓝都唔知睇紧Star Wars定复仇者联盟喇…不过好少事啫，最多咪判佢“非法入境罪”、“蓄意伤害他人身体”同埋“毁坏建筑物”！
【平安谷】御用奸人郑子诚演兽医 同沈卓盈有感情：今次唔算奸人
慢性变奸：《降魔的》－郭展明（黄子恒饰）
呢位魔警，真系要赠佢一句：“问世间情为何物！”有“魔”嘅出现，直接引发咗佢嘅dark side，所以马国明追咗佢钟意嘅人，就要开展杀人行动，开始教唆他人，一连串队冧马国明身边嘅人。去到后期，仲掐死埋最爱嘅人…以为咁样就可以永远拥有佢？你只系傻仔嚟㗎咋！判你“教唆他人犯罪”、“公职人员行为失当”、“伤人或对他人身体加以严重伤害”同埋“谋杀罪”！
重型奸人：《乘胜狙撃》－蒋天龙（吴岱融饰）
看到鹫哥…呀唔系，系蒋天龙就一定会估到佢会爆seed喇，除咗指定对白，臭嘟之外，佢喺最后一集仲有大爆发…去婚礼乱枪扫射，然后返屋企队冧个仔，仲要临死都要闹老婆：“我话你系鸡啫，你唔使真系当自己系鸡嘅”，然后喷血…完！杀人犯入面，都算系反高潮喇，判你谋杀入去坐廿年喇！
【Cult到裂开】吴岱融原来做过导演 “大作”《社团之撚位》票房仅6万
终极奸人大奖：《反黑》－招积（张建声饰）
睇招积一副Joker样，鹫哥同佢比？根本就系蚊比同牛比！我用例子答你。除咗绑架退休警员、袭警、杀人之外，招积最癫嘅一幕，大家唔会唔记得喇！就系佢将火屎（吴毅将饰）个咀用一针一线缝埋，你以为咁就完？话口未完，招积就擘大口，火屎嘅一口眼球刺身就完成…仲要将眼珠摆上台好似Web Cam咁望住火屎…唔知有几多人睇完呕埋肠呀肾呀出嚟！虽然佢有杀过大佬B，但系呢种慢性折磨…告佢“谋杀”呀！坐到终身监禁都唔够啰