【完美奸人】突发主持变御用奸人 　郑子诚：我唔会话自己系好人

要数最入屋的无线艺人，不是小生花旦，亦不是一众水著女神，而是有“完美奸人”称号的郑子诚，由《真情》子浩、《烈火雄心》Marco、《封神榜》纣王⋯⋯以至最近的一《同盟》柳议员，及明天大结局的《超时空男臣》张诚，郑子诚演绎的奸人，永远最吸引，每一个眼神、表情、笑容都奸到出汁，令人回味，96年入行，郑子诚奸足21年，不过最想不到，郑子诚初入行时是做忠的，他接受《香港01》访问，解说他的“成魔之路”，一切由《真情》开始⋯⋯

他说：“廿几年前嘅事喇，当时我本身做紧《城市追击》突发主持，采访邓家争产案，但我永远唔够娱记跑得快，永远都问唔到独家嘢，咁啱我做紧城追𠮶阵，佢哋cast紧一个《真情》新角色，一个来自大陆嘅戆直青年，自问当年真系相当戆居，或者当时监制（徐遇安），编审（陈宝华）定珍姐见到啩，角色原本系一个力争上游嘅大陆戆直青年，但有日监制同我讲，你做呢个角色永远唔够抢，因为剧中有阿海（黄智贤饰），佢系一个好人到唔存在喺呢个世界嘅人，你同佢斗好人唔得㗎，不如咁啦，将个性格扭一扭，结果我个角色，由力争上游变咗不择手段，我好记得监制讲个一句说话，佢话我眉宇间带点奸意，佢未讲之前，我觉得呢样嘢唔会发生我身上，因为我身边嘅人个个都话我好正直⋯⋯”

郑子诚演的奸角，不单止完美，更是御用奸人，每套剧都需要这角色，但套套都演奸角，他亦试过感到气馁，亦经历过低潮，他说：“我谂2000年左右啦，当你不断做奸角，一来觉得套套都系咁啦，当你要再续约嘅时候，公司话要减我骚，𠮶下觉得好气馁，因为减得，即系演出机会减少，咁我仲有冇得做呢？系咪都仲系做奸角呢？有一排真系唔知点演？我试过做到滑哑，我试过讲笑咁话，不如你攞返我上套剧啲大头奸人表情算喇⋯⋯”

而帮他渡过低潮的，除了太太外，就是他的黑胶碟、他的电台音乐节目，而郑子诚未入行前，已移民加拿大，在当地做了厨窗设计师几年，他说：“做紧设计师𠮶阵，望到成屋黑胶碟，真系觉得好嘥，我喺度谂有咩辧法，先可以令啲黑胶唱片唔会慢慢流失呢？唯一就系做电台节目主持，亦系咁我返咗嚟香港，而喺我低潮时期，我好彩有电台，我用声做嘢，得心应手过用样做嘢，自信心未致于被打破。” 在电视台他是十恶不赦的奸人，但在电台他是听众的音乐情人，两个极端，连郑子诚都觉得精神分裂，他说：“当你喺电视拍紧杀人放火，半个钟后返到电台开咪，然后要转晒成个tone𠮶阵，真系几辛苦㗎，我觉得自己有少少变态，简直系精神分裂。”

郑子诚演的奸角深入民心，现实中的他当然不是奸人，但他亦觉得人天生是带点奸的，他说：“我觉得自己唔系奸㗎，其实每个人都是性本善之余，亦有性本奸，有时因为自我保护，或者家人，你会做出一啲别人眼中应为好奸嘅事，我唔会话自己系好人，我亦唔系大奸大恶，但我识保护自己，太太当然知我唔系奸人啦，不过佢见过又做奸，又会话：“吓？又系咁呀？”

由子浩这个奸人角色开始，郑子诚演的奸角，亦一个接一个，而在他心目中《烈火雄心》的Marco，是他最深刻的，他说：“早期啲角色比较难忘，《烈火雄心》啦，𠮶个角色真系衰到仆街㗎喇，你谂下连个细佬女朋友都迷奸埋，剧入面又要同古仔喺火场打啦，仲要系真火嚟㗎，所以印象好深刻，（网友叫你完美奸人？）太过奖喇，其实咩叫完美？点为之完美呢？我只能够多谢大家支持。”