【降魔的．专访】马国明都会上高登：网络潮语我都会识嘅

《降魔的》中，马国明一直被人大赞，除了演技了得之外，其贴地抵死的性格亦大获好评。由当年被人说是天然呆，本身样子呆呆下之外，在颁奖典礼上的经典时刻也令人印象十分深刻。其实在上一套《心理追凶Mind Hunter》马明饰演一个阴暗冲动的心理学家，演技已经受人力赞，今次在《降》也有出色的表现，年尾争奖有望。

究竟如何由一个天然呆变成贴地司机呢？在接受《香港01》访问时他说：“其实无话点样做嘅，感觉贴地系因为本身个角色贴地呀嘛。戏入面佢（马季）又唔系有钱，个角色本身已经好贴地，所以我哋都会用返啲贴地嘅感觉啰，观众都会留意到我哋用返啲短裤、T-shirt，我知道有啲的士司机系好有型，好似掉低架车就可以去蒲咁，我哋唔系要𠮶种。”虽然剧集好评众多，不过都有人投诉太多粗口，“其实系嘅，尤其是赵永洪，佢系会讲多啲，我哋度故仔𠮶阵监制已经话俾佢呢个角色粗啲，我觉我ok嘅，大部份现实嘅的士哥哥都唔会太斯文。”除了粗口，剧中也有一定的潮语出现，例如：推到完场、J一吓、有请小凤姐等等，原来都有原因，他说：“有啲系编剧嘅，亦有啲系我哋现场爆少少咁，因为大家都知道系要啲乜嘢，好多时赵永洪都会爆肚。我都会上网睇呢啲嘢，所以某一啲网络潮语我都会识嘅，我咩网都上㗎，香港讨论区、高登都有上。”

上两回的专访都提及过，马明对《降》的剧本是十分喜欢的，连《心》也是，不过他就慨叹这套剧在香港不被大众接纳，他说：“《心理追凶Mind Hunter》剧本个布局系好正，奈何可能有啲家庭观众未必睇得明，连我阿妈都话睇唔明，监制野心好大，我直情觉得有少少西片嘅格局。讲返我个角色，因为佢本身系一个心理学家，佢女朋友俾人害死，佢好想查返系边个杀死佢女朋友，佢本身系心理学家呀嘛，咁佢自己就营造返一个幻象令女朋友出现返。佢以前钟意食烟，佢一食烟女朋友就会出嚟叫佢唔好食，再将自己屋企书房布置返做女朋友个office，完全一模一样。喺心理学上，同一个环境、气味下，幻觉就会容易出现。呢一个布局，我一睇剧本就觉得好正，有少少荷李活布局嘅电视剧，但系观众系睇唔明嘅，我都明白嘅。好似你第一次睇荷李活电视咁，第一次觉得好好睇但未必明，系要翻睇第二第三次先明。《心理追凶》系一个好好嘅剧本，但睇怕香港电视模式嘅人真系未必会明，但唔可以话香港观众明乜就去拍乜，作为一个创作，深嘢同观众明嘅嘢都要拍，正如早几年TVB一直无拍鬼怪嘅题材，因为返唔到大陆，无咗个市场，直至呢几年有返《鬼同你OT》、《一屋老友记》同《降魔的》，你会发现香港观众都钟意睇鬼怪嘢，所以其实唔应该俾个市场焗住你拍咩，唔好限制自己个空间。当然，公司一定想顾观众的口味，所以拍出来的剧也就比较一式一样，也是无可厚非的。”

除了在香港，马明也开始向大陆发展，始终内地赚钱的机会多太多，他说：“我而家拍紧大陆一套电影叫《美丽战争》，但系香港唔会上，因为个题材好内地嘅，今次成廿几三十个女仔围住我，因为系一套model嘅励志片，仲有谭耀文份。我都想揾多啲钱，上一次上去拍我全广东话，今次我都用返国语，希望可以适应返上面，谭耀文因为上咗去好多年，佢嘅经验帮到我好多，可能对我将来上去发展都会有帮助。我而家都叫识多咗大陆嘅制片人，希望可以透过咁而倾多啲合作，佢哋唔会再睇边个系视帝视后㗎喇。”原来连马明都开始向大陆发展，希望TVB不要再流失人才喇。

不过其实香港演员在大陆十分吃香，连马明自己也感受到大陆导演对香港人的爱戴，但由于一些原因，香港演员在大陆的市场还未能全面展开，他说：“我哋香港演员喺内地评价好高，一来因为我哋价钱平，同内地嘅红星比我哋系好平。其次系大陆人觉得我哋香港演员好容易服侍，一啲都唔麻烦，我哋TVB出身就系咁样，会对戏，会企喺度俾对方讲对白（有啲位单头讲嘢，对手演员可能只系求其一个人），大陆嘅红星系唔会咁做，佢哋无可能咁做，可能佢哋拍两个大头就走，其他镜头你揾替身同佢做，好夸张㗎。但大陆导演觉得香港演员好好，仲要抵用，奈何内地每套剧用香港台前幕后嘅人数仲有个限制，如果放宽，香港演员会愈来愈多机会，尤其是TVB挨惯𠮶班，又识走位，又挨得唔麻烦。我听过一个内地好红嘅演员，佢著咗件好靓嘅衫去到片场，就同导演讲我今日唔换衫㗎喇，拍就拍，唔拍我就走，连咗戏佢都唔理你。原来而家佢哋嘅气燄系劲到咁样，你要连戏就唯有后期剪接，当然呢个系极端，唔系全部大陆演员都系咁，大家唔好误会，只不过系大陆某啲好红嘅演员已经去到咁，亿亿声𠮶堆，所以导演会觉得香港演员好好。”的确身价上亿的演员，又真的可以有风驶尽𢃇，不过就会惹人话柄，说到底对自己也没有甚么好处。